កណ្តាលៈ មន្ត្រីនគរបាលម្នាក់ដែលដកកាំភ្លើងបាញ់សត្វឆ្កែ និងអួតអាងថា ក្នុង ១ សប្ដាហ៍ធ្វើការតែ ១ ថ្ងៃ គឺលោក អ៊ុន សំអាត នាយរងផ្នែកនគរបាលយុត្តិធម៌នៃអធិការដ្ឋាននគរបាលក្រុងតាខ្មៅ ត្រូវបានក្រសួងមហាផ្ទៃប្រកាសដកហូតតំណែង ឋានន្តរស័ក្ដិ និងបណ្ដេញចេញពីក្របខ័ណ្ឌមន្ត្រីនគរបាលជាតិ បន្ទាប់ពីក្រុមអធិការកិច្ចបានរកឃើញថា បុគ្គលរូបនេះបានប្រព្រឹត្តល្មើសវិន័យរបស់កងកម្លាំងនគរបាលជាតិ។
យោងប្រការ ១ ប្រការ ២ និងប្រការ ៣ នៃប្រកាសស្ដីពី «ការបណ្ដេញចេញពីក្របខ័ណ្ឌមន្ត្រីនគរបាលជាតិ» ចុះថ្ងៃទី ៤ ខែសីហា ឆ្នាំ ២០២១ ដែលភ្នំពេញប៉ុស្តិ៍ទើបទទួលបាននៅថ្ងៃទី ១៧ សីហាឆ្នាំ ២០២១ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានសម្រេចអនុវត្តវិន័យចំពោះអនុសេនីយ៍ឯក អ៊ុន សំអាត អត្តលេខ ៦៥១៤៤ នាយរងផ្នែកនគរបាលយុត្តិធម៌ នៃអធិការដ្ឋាននគរបាលក្រុងតាខ្មៅ ចំណុះស្នងការដ្ឋាននគរបាលខេត្តកណ្តាល ក្រោមរូបភាព «ដកហូតមុខតំណែង ឋានន្តរស័ក្តិ និងបណ្តេញចេញពីក្របខ័ណ្ឌមន្ត្រីនគរបាលជាតិ។ មូលហេតុ ល្មើសវិន័យរបស់កងកម្លាំងនគរបាលជាតិ។ ប្រាក់បៀវត្សរ៍ និងរបបឧបត្ថម្ភផ្សេងៗត្រូវកាត់ផ្ដាច់ និងលុបចេញពីក្របខ័ណ្ឌមន្ត្រីនគរបាលជាតិចាប់ពីខែវិច្ឆិកាឆ្នាំ ២០២១ តទៅ ហើយបទប្បញ្ញតិ ដែលផ្ទុយនឹងប្រកាសនេះត្រូវចាត់ទុកជានិរាករណ៍»។
ទន្ទឹមនឹងនេះ លោក ស ខេង ក៏បានជំរុញឱ្យអគ្គលេខាធិការនៃអគ្គលេខាធិការដ្ឋាន អគ្គស្នងការនៃអគ្គស្នងការដ្ឋាននគរបាលជាតិ អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុអភិបាលនៃគណៈអភិបាលខេត្តកណ្តាល ប្រធាននាយកដ្ឋានបុគ្គលិក ប្រធាននាយកដ្ឋានអង្គភាពពាក់ព័ន្ធស្នងការនៃស្នងការដ្ឋាននគរបាលខេត្តកណ្តាលត្រូវអនុវត្តតាមសេចក្ដីសម្រេចនៃប្រកាសនេះឱ្យបានសម្រេចចាប់ពីថ្ងៃចុះហត្ថលេខាតទៅ។
លោក ឈឿន សុចិត្រ ស្នងការនគរបាលខេត្តកណ្ដាលថ្លែងនៅថ្ងៃទី ១៧ ខែសីហាថា ឈ្មោះ អ៊ុន សំអាត នោះត្រូវបានបណ្ដេញចេញពីការងារហើយគឺចាប់ពីថ្ងៃទី ៤ ខែសីហា ឆ្នាំ ២០២១ មក។
លោកថ្លែងថា៖ «យើងបានអនុវត្តតាមប្រកាសនោះ ដោយបានដកហូតមុខតំណែង ឋានន្តរស័ក្តិ និងបណ្ដេញអតីតមន្ត្រីនគរបាលរូបនោះចេញពីក្របខ័ណ្ឌមន្ត្រីនគរបាលជាតិ ប៉ុន្មានម៉ោងក្រោយពីសម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃបានចេញប្រកាសនោះ»។
ទោះយ៉ាងណាលោក សុចិត្រ មិនបានអធិប្បាយបន្ថែមចំពោះការឈានទៅដល់មានការដកហូតតំណែង ឋានន្តរស័ក្តិ និង បណ្តេញចេញពីក្របខ័ណ្ឌមន្ត្រីនគរបាលជាតិបែបនេះនោះឡើយ។
យោងតាមរបាយការណ៍ព័ត៌មានដែលភ្នំពេញប៉ុស្តិ៍ទទួលបាននាពេលកន្លងមក លោក អ៊ុន សំអាត កាលពីព្រលប់ថ្ងៃទី ១៦ ខែ ឧសភា ឆ្នាំ ២០២១ ព្រោះតែខឹងក្រោធនឹងសត្វឆ្កែរបស់អ្នកភូមិ ដេញខាំគាត់ម្ដងហើយម្ដងទៀត គាត់ក៏បានដកកាំភ្លើងបាញ់សត្វឆ្កែទាំងនោះ ចំនួន ៣ គ្រាប់ធ្វើឱ្យមានការភ្ញាក់ផ្អើលដល់អ្នកភូមិ និងសមត្ថកិច្ចមូលដ្ឋាន។ បន្ទាប់មក គាត់ត្រូវបានកម្លាំងស្នងការដ្ឋាននគរបាលខេត្តកណ្ដាលកោះហៅទៅសួរនាំ និងដាក់ពិន័យតាមច្បាប់រដ្ឋបាល និងបទបញ្ជាផ្ទៃក្នុងរបស់កម្លាំងនគរបាលជាតិ។
ប៉ុន្តែគាត់នៅមិនបានពិចារណាពីកំហុសឆ្គង ដែលគាត់បានប្រព្រឹត្តនោះទេ ថែមទាំងបានថតបង្ហោះតាមបណ្ដាញសង្គម ដោយប្រើពាក្យអួតអាងថា៖ «ខ្ញុំជាមន្ត្រីនគរបាលជាតិពិតប្រាកដមែន ប៉ុន្តែក្នុង ១ សប្តាហ៍ ខ្ញុំមកធ្វើការតែ ១ ថ្ងៃប៉ុណ្ណោះ»៕
វីដេអូ៖