.jpg)
សមត្ថកិច្ចរាជធានីភ្នំពេញ ចុះហាមឃាត់អ្នកលក់ល្មើសនឹងបម្រាមគោចរ កាលពីយប់ថ្ងៃទី១៧ខែសីហាឆ្នាំ២០២១។ រូបថត នគរបាល
ភ្នំពេញៈ សមត្ថកិច្ចបានឃាត់ខ្លួន និងធ្វើការអប់រំនិងពិន័យមនុស្សចំនួន ១ ៨៦៧ នាក់ បញ្ជូនទៅតុលាការ ១ នាក់ ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលនៅថ្ងៃទី ១៨ ខែសីហា។
នេះបើតាមការប្រកាសរបស់ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក)នៅថ្ងៃទី ១៩ ខែសីហានេះ។
យោងតាមសេចក្តីជូនដំណឹង (គ.អ.ក) នៅព្រឹកថ្ងៃទី ១៩ ខែសីហានេះ បានឲ្យដឹងថា សមត្ថកិច្ចបានឃាត់យានយន្តចំនួន ៩៨៧ គ្រឿង ឃាត់ខ្លួនមនុស្សធ្វើការអប់រំនិងពិន័យចំនួន ១ ៨៦៧នាក់ បញ្ជូនទៅតុលាការ ១ នាក់ នៅថ្ងៃទី ១៨ ខែសីហា ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលដើម្បីទប់ស្កាត់ការឆ្លងរាលដាលជំងឺកូវីដ ១៩។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ៨៩៣ ករណី ទៅលើទីតាំងសរុបចំនួន ១ ៣០០ កន្លែង និងពិន័យជាប្រាក់បានចំនួន ១៧ ៥០០ ០០០ រៀល៕
