.jpg)
លោក ឥត សារ៉ាត់ ត្រួតពិនិត្យកន្លែងបោះពុម្ពបណ្ណចាក់វ៉ាក់សាំងរបស់កងទ័ព។ រូបថត ក្រសួងការពារជាតិ
ភ្នំពេញៈ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំងក្រសួងការពារជាតិ លោក ឥត សារ៉ាត់ បានអំពាវនាវទៅដល់ប្រជាពលរដ្ឋដែលបានចាក់វ៉ាក់សាំងជាមួយនឹងក្រុមការងារចាក់វ៉ាក់សាំងរបស់ក្រសួងការពារជាតិដែលទទួលបន្ទុកចាក់វ៉ាក់សាំងនៅក្នុងរាជធានី-ខេត្តចំនួន ៩ កុំបារម្ភពីការមិនបានទទួលបណ្ណចាក់វ៉ាក់សាំងនេះ។
លោកបានថ្លែងដូចនេះកាលពីថ្ងៃទី ១៧ ខែសីហា ក្នុងពេលលោកចុះពិនិត្យមើលការផលិតបណ្ណចាក់វ៉ាក់សាំងសម្រាប់ប្រជាពលរដ្ឋនៅបញ្ជាការដ្ឋានកងពលតូចលេខ ៧០ (ចោមចៅ) និងនៅវិទ្យាស្ថាន វិទ្យាសាស្ត្រសុខាភិបាល ខ.ភ.ម។ ជាមួយគ្នានោះលោកបានលើកឡើងបន្ថែមថា ក្រុមការងារផលិតបានបណ្ណនេះរួចរាល់ជាង ១ លានបណ្ណហើយ ហើយក៏បានប្រគល់បណ្ណជូនប្រជាពលរដ្ឋបានប្រមាណ ៨០ ម៉ឺននាក់រួចហើយផងដែរ។
លោកបានថ្លែងថា៖ «ក្រុមការងារចាក់វ៉ាក់សាំងរបស់ក្រសួងការពារជាតិ ទទួលបន្ទុកចាក់វ៉ាក់សាំងនៅក្នុងរាជធានីខេត្តចំនួន ៩ ដែលមានរាជធានីភ្នំពេញ ខេត្តព្រះសីហនុ កោះកុង កំពង់ស្ពឺ តាកែវ ស្វាយរៀង កំពង់ចាម សៀមរាប និងបន្ទាយមានជ័យ ដែលមានប្រជាពលរដ្ឋសរុបជិត ៣ លាននាក់ ដែលត្រូវចាក់វ៉ាក់សាំង»។
លោក ឥត សារ៉ាត់បានបញ្ជាក់ថា សម្រាប់ដូសទី១ ចាក់រួចរាល់ស្ទើរតែទាំងស្រុងហើយក្នុងទីតាំងភូមិសាស្ត្រទាំង ៩ រាជធានី-ខេត្តនេះ នៅសល់តែក្នុងខេត្តសៀមរាប និងខេត្តបន្ទាយមានជ័យប៉ុណ្ណោះ។
ទាក់ទងនឹងការមិនផ្តល់បណ្ណចាក់វ៉ាក់សាំងភ្លាមៗ បន្ទាប់ពីចាក់វ៉ាក់សាំងហើយ លោក ឥត សារ៉ាត់ បានធ្វើការពន្យល់ថា ក្នុងការងារកងទ័ពមានច្បាប់មួយគឺត្រូវរក្សាការសម្ងាត់រាល់ទិន្នន័យរបស់កងទ័ព ដែលជាហេតុក្រុមការងារចាក់វ៉ាក់សាំងរបស់ក្រសួងការពារជាតិត្រូវផលិតបណ្ណនេះដោយខ្លួនឯង។
លោកថា៖ «ក្រសួងការពារជាតិបានកំពុងបង្កើនល្បឿន និងខិតខំក្នុងការផលិតបណ្ណវ៉ាក់សាំងនេះឱ្យបានលឿនសម្រាប់ផ្តល់ជូនប្រជាពលរដ្ឋ ដោយយើងរំពឹងថានឹងអាចរួចរាល់ក្នុងពេលឆាប់ៗខាងមុខនេះ ដែលមកដល់ពេលនេះបណ្ណវ៉ាក់សាំងដែលត្រូវផលិតប្រមាណ ២ លាន ៧ សែនបណ្ណ ដែលក្រុមការងារផលិតបានរួចរាល់ប្រមាណ ១ លាន ២ សែនហើយផងដែរ»។
លោក ឥត សារ៉ាត់ ក៏បានផ្តាំផ្ញើទៅដល់ប្រជាពលរដ្ឋទាំងអស់កុំមានការបារម្ភពីការមិនបានទទួលបណ្ណចាក់វ៉ាក់សាំងនេះឡើយ ដោយលោកបានស្នើឱ្យពលរដ្ឋទាំងអស់មានការអត់ធ្មត់ក្នុងការចាំទទួលយកបណ្ណនេះទៅប្រើប្រាស់នៅថ្ងៃបន្តបន្ទាប់ទៀត។
លោកថា៖ «យើងទើបទទួលបានម៉ាស៊ីនផលិតបណ្ណដែលអាចផលិតបាន ១ ថ្ងៃចំនួន ១០ ម៉ឺនបណ្ណ ដូចនេះបណ្ណដែលយើងនៅសល់ចំនួន ១ លាន ៥ សែនបណ្ណទៀតនោះ យើងចំណាយពេលតែប្រមាណ ១៥ ថ្ងៃទៀតប៉ុណ្ណោះនឹងបញ្ចប់ការផលិតបណ្ណនេះហើយ»។
លោកក៏បានបញ្ជាក់ផងដែរថា ការចែកបណ្ណចាក់វ៉ាក់សាំងមិនមានតម្រូវឱ្យយកលុយកាក់ពីប្រជាពលរដ្ឋនោះឡើយក្នុងករណីមានអ្នកទារលុយត្រូវរាយការណ៍ទៅកាន់សមត្ថកិច្ច ឬក្រសួងការពារជាតិលោកនឹងចាត់វិធានការតាមច្បាប់ជាធរមាន។
លោក ឥត សារ៉ាត់ ក៏បានបញ្ជាក់ថា៖ «ការធ្វើបណ្ណនេះដល់កងទ័ព និងបងប្អូនប្រជាពលរដ្ឋនេះ គឺមានអត្ថប្រយោជន៍ជាខ្លាំង ដោយសម្គាល់ និងបញ្ជាក់អំពីភាពចូលរួមសង្គមរបស់ពួកគាត់ជាមួយរាជរដ្ឋាភិបាលក្នុងការកាត់បន្ថយការរីករាលដាលនូវមេរោគកូវីដ ១៩ និងក៏ដើម្បីការពារអាយុជីវិតរបស់ពួកគាត់ផងដែរ»។
ពាក់ព័ន្ធនឹងការចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសវិញ យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមយប់ថ្ងៃទី ១៧ ខែសីហា ប្រជាពលរដ្ឋជាង ៨,៥ លាននាក់ ឬស្មើនឹង ៨៥,២៣% ធៀបជាមួយចំនួនប្រជាជនគោលដៅ ១០ លាននាក់។
ចំណែកការចាក់វ៉ាក់សាំងទៅដល់ក្រុមមនុស្សដែលមានអាយុពី ១២ ឆ្នាំ ទៅក្រោម ១៨ ឆ្នាំ ចាក់បានចំនួនជាង ៦៣ ម៉ឺន នាក់ឬស្មើនឹង ៣២,២៥% ធៀបជាមួយនឹងប្រជាជនគោលដៅជិត ២ លាននាក់៕
