.jpg)
មន្ត្រីប្រាប់ឱ្យពលរដ្ឋប្រយ័ត្ន ចំពោះកាំរស្មីព្រះអាទិត្យ UV ដោយកាំរស្មីនេះអាចបង្កឱ្យប៉ះពាល់ខ្លាំងដល់សុខភាពស្បែក និងភ្នែក។ ហុង មិនា
ភ្នំពេញៈ មន្ត្រីជាន់ខ្ពស់ក្រសួងធនធានទឹក និងឧតុនិយមប្រាប់ឱ្យពលរដ្ឋ ឱ្យមានការប្រុងប្រយ័ត្នខ្ពស់ ចំពោះកាំរស្មីព្រះអាទិត្យ UV ខណៈដែលនៅតំបន់ឥណ្ឌូចិននឹងទទួលរងឥទ្ធិពលកាំរស្មីព្រះអាទិត្យ UV ដោយកាំរស្មីនេះអាចបង្កឱ្យប៉ះពាល់ខ្លាំងដល់សុខភាពស្បែក និងភ្នែក បើប៉ះពាល់ផ្ទាល់ជាមួយពន្លឺព្រះអាទិត្យចន្លោះម៉ោង ១០ ព្រឹកដល់ម៉ោង ២ រសៀល ចាប់ពីថ្ងៃទី ១៨ ដល់ថ្ងៃទី ២៤ ខែសីហា។
លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម ថ្លែងនៅថ្ងៃទី ១៨ ខែសីហាថា កាំរស្មីព្រះអាទិត្យ UV អាចប៉ះពាល់ជាពិសេស សុខភាពស្បែក និងសុខភាពភ្នែកក្នុងចន្លោះម៉ោង ១០ ព្រឹក ដល់ម៉ោង ២ រសៀល។ ហេតុនេះបើមិនមានការចាំបាច់ គួរតែនៅក្នុងផ្ទះ ឬនៅក្នុងកន្លែងដែលមានម្លប់ចៀសវាងការប៉ះពាល់ដោយផ្ទាល់ជាមួយពន្លឺព្រះអាទិត្យ។
លោក ចាន់ យុត្ថា បន្តថា យ៉ាងណាប្រសិនបើចៀសវាងមិនបានដោយត្រូវតែចេញទៅក្រៅ ត្រូវប្រើសម្លៀកបំពាក់ក្រាស់ៗឱ្យជិតខ្លួន ដើម្បីកុំឱ្យសាច់មានការប៉ះពាល់ផ្ទាល់ ជាមួយនឹងពន្លឺព្រះអាទិត្យ។
លោកថ្លែងថា៖ «វាអាចធ្វើឱ្យរលាកស្បែក ហើយបើធ្ងន់ធ្ងរខ្លាំងទៅជារ៉ាំរ៉ៃ វាអាចទៅជាមហារីកស្បែកជាដើម។ ពេលចេញទៅក្រៅបើខ្លួនពាក់ជិតហើយ មុខនៅមិនទាន់ជិតត្រូវពាក់មួកដែលមានហាមធំៗ ដើម្បីម្លប់មុខ ហើយចំពោះភ្នែកយើងត្រូវប្រើវ៉ែនតាខ្មៅ ឬវ៉ែនតាប្រែពណ៌»។
បើតាម លោក យុត្ថា ទោះបីមេឃមានពពកក្រាស់ ប៉ុន្តែអាកាសធាតុក្តៅហប់ ហេតុនេះពន្លឺព្រះអាទិត្យ UV នេះក៏បណ្តាលឱ្យប៉ះពាល់ដល់រុក្ខជាតិដែលនាំឱ្យមានការស្រពាប់ស្រពោនផងដែរ ប្រសិនបើផ្ទៃមេឃមិនមានពពកសោះ។
លោកថ្លែងថា៖ «បើវាក្តៅខ្លាំងវាធ្វើឱ្យរុក្ខជាតិស្រពោន សត្វក៏វាប៉ះពាល់ បើវានៅហាលក្តៅ ប៉ុន្តែបើវានៅក្នុងម្លប់អាហ្នឹងក៏ជួយកាត់បន្ថយផលប៉ះពាល់បានច្រើនដែរ»។
សេចក្តីជូនដំណឹងរបស់ក្រសួងធនធានទឹក និងឧតុនិយមនៅថ្ងៃទី ១៧ ខែសីហា បានលើកឡើងពីការស្រាវជ្រាវរបស់អង្គការឧតុនិយមពិភពលោក WMO ដែលបង្ហាញថា នៅតំបន់ឥណ្ឌូចិនចាប់ពីថ្ងៃទី ១៨ ដល់ថ្ងៃទី ២៤ ខែសីហា ឆ្នាំ ២០២១ នឹងទទួលរងនូវឥទ្ធិពលកាំរស្មីព្រះអាទិត្យ UV ដែលនឹងបង្កឱ្យមានហានិភ័យ និងធ្វើឱ្យប៉ះពាល់ដល់សុខភាពមនុស្ស សត្វ និងរុក្ខជាតិ។
ក្នុងសេចក្តីជូនដំណឹងក្រសួងធនធានទឹក និងឧតុនិយមនេះបានបញ្ជាក់ថា នៅចន្លោះម៉ោង ១០ ព្រឹករហូតដល់ម៉ោង ២ រសៀលសន្ទស្សន៍នៃកំដៅកើនឡើងដល់កម្រិត ១០ ដែលជាកម្រិតធ្វើឱ្យមានការប្រុងប្រយ័ត្ន ចំពោះការកើនឡើងនៃកាំរស្មីព្រះអាទិត្យនេះ។
សេចក្តីជូនដំណឹងក្រសួងបានសរសេរថា៖ «សូមសាធារណជនជ្រាបជាព័ត៌មាន និងសូមបង្កើនការយកចិត្តទុកដាក់ ប្រុងប្រយ័ត្នខ្ពស់ចំពោះបាតុភូតនេះ។ ក្រសួងធនធានទឹក និងឧតុនិយម បាននិងកំពុងបន្តតាមដានយ៉ាងយកចិត្តទុកដាក់លើបាតុភូតធម្មជាតិនេះ ហើយនឹងជម្រាបជូនព័ត៌មានជាបន្តបន្ទាប់ទៀត នៅក្នុងករណីដែលមានការប្រែប្រួល»៕
