ភ្នំពេញៈ ក្នុងរយៈពេល ២ ខែខាងមុខនេះ ក្រសួងប្រៃសណីយ៍ និងទូរគមនាគមន៍ត្រៀមនាំចូលឧបករណ៍តេស្តរហ័សឱ្យបានគ្រប់គ្រាន់ទៅតាមតម្រូវការរបស់ក្រសួង ស្ថាប័ន រោងចក្រ ក្រុមហ៊ុន សហគ្រាស គ្លីនីក ឱសថស្ថាន ដោយនឹងបើកលក់ក្នុងតម្លៃដើម ខណៈត្រឹមថ្ងៃទី ១៧ សីហា ក្រសួងបានលក់ឧបករណ៍នេះបានចំនួន ១,៧ លានតេស្ត។
លោក សូ វិសុទ្ធី រដ្ឋលេខាធិការ និងជាអ្នកនាំពាក្យក្រសួងប្រៃសណីយ៍ និងទូរគមនាគមន៍បានថ្លែងប្រាប់ភ្នំពេញប៉ុស្ដិ៍កាលពីថ្ងៃទី ១៧ សីហាថា ក្រសួងប្រៃសណីយ៍បានទិញឧបករណ៍តេស្តរហ័សពីរោងចក្រនៅក្នុងប្រទេសចំនួន ២ គឺកូរ៉េខាងត្បូង និងប្រទេសចិន ហើយឧបករណ៍តេស្តដែលបានបញ្ជាទិញពីប្រទេសចិននឹងមកដល់ក្នុងពេលឆាប់ៗខាងមុខនេះ។
លោកបានថ្លែងថា៖ «បច្ចុប្បន្នក្រសួងនៅបន្តផ្គត់ផ្គង់ឧបករណ៍តេស្តមកពីប្រទេសកូរ៉េជាធម្មតា ហើយបើកលក់ជូនសម្រាប់គ្រប់គ្នា។ ក្រសួងលក់ឧបករណ៍តេស្តរហ័សបានចំនួន ១,៧ លានតេស្ត»។
លោក វិសុទ្ធី បានបញ្ជាក់ថា ក្នុងរយៈពេល ២ ខែខាងមុខទៀត ក្រសួងប្រៃសណីយ៍ត្រៀមនាំចូលឧបករណ៍តេស្តរហ័សក្នុងបរិមាណគ្រប់គ្រាន់តាមតម្រូវការរបស់ក្រសួង ស្ថាប័ន រោងចក្រ ក្រុមហ៊ុន សហគ្រាស គ្លីនិក ឱសថស្ថាន ជាដើម។
លោកបានថ្លែងថា៖ «ដោយសារមានសំណូមពរពីប្រជាពលរដ្ឋជាច្រើនចាប់ពីថ្ងៃនេះតទៅ ក្រសួងនឹងបើកលក់កាន់តែទូលំទូលាយទាំងឧបករណ៍តេស្ដមកពីប្រទេសកូរ៉េ និងចិន សម្រាប់ការប្រើប្រាស់តាមក្រសួង ស្ថាប័ន រោងចក្រ ក្រុមហ៊ុន សហគ្រាស គ្លីនិក ឱសថស្ថាន និងសម្រាប់ការប្រើប្រាស់តាមគ្រួសារ ដោយមិនមានកំណត់លក្ខខណ្ឌទេ»។
លោកបានបន្តថា ប៉ុន្តែសម្រាប់ការប្រើប្រាស់តាមគេហដ្ឋានសូមអនុវត្តតាមការណែនាំរបស់ក្រសួងសុខាភិបាល សម្រាប់ព័ត៌មានលម្អិតអាចចូលមើលតាមតំណភ្ជាប់វីដេអូពីរបៀបប្រើប្រាស់ https://fb.watch/v/2Sc5HvMbT/ ។
កាលពីថ្ងៃទី ១០ ខែសីហា លោក ជា វណ្ណដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជាបានប្រាប់ភ្នំពេញប៉ុស្ដិ៍ថា ក្នុងសប្តាហ៍នេះ ក្រសួង នឹងដាក់លក់ឧបករណ៍ធ្វើតេស្តរហ័សរកមេរោគកូវីដ ១៩ (Rapid Test) ដែលនាំចូលមកពីប្រទេសចិនចំនួន ២ លានតេស្ដក្នុងតម្លៃដើម ២ ដុល្លារក្នុង ១ តេស្ដជូនដល់ពលរដ្ឋ។
លោកបានបញ្ជាក់ថា ការលក់ត្រឹម ២ ដុល្លារនេះ គឺដើម្បីចូលរួមចំណែកជួយដល់ការស្វែងរកមេរោគកូវីដ ១៩ ក៏ដូចជា ទប់ស្កាត់ការរីករាលដាលជំងឺកូវីដ ១៩ ឱ្យទាន់ពេលវេលា។ បើតាមលោករដ្ឋមន្ដ្រី ឧបករណ៍តេស្ដរហ័សទិញពីចិននេះគឺងាយស្រួលប្រើជាងមុន ដោយលូកតេស្តចូលរន្ធច្រមុះរាក់ៗ ប៉ុន្ដែមានគុណភាពខ្ពស់ដដែល។
ដោយបានអនុវត្ដតាមការណែនាំរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែ កក្កដា ឆ្នាំ ២០២១ និងដើម្បីរួមចំណែកក្នុងការទប់ស្កាត់ការរីករាលដាលជំងឺកូវីដ ១៩ ឱ្យបានទាន់ពេលវេលា ក្រសួងនេះក៏ធ្លាប់បាននាំចូលឧបករណ៍តេស្តរហ័សអង់ទីហ្ស៊ែនកូវីដ ១៩ (Covid-19 Rapid Antigen Test) ពីប្រទេសកូរ៉េហើយបាន និងកំពុងចែកចាយបន្តរហូតដល់បច្ចុប្បន្នក្នុងតម្លៃដើម ៣,៧ ដុល្លារ ក្នុង ១ គ្រឿងផងដែរ៕