បន្ទាយមានជ័យៈ យុវតីវ័យ ១៧ ឆ្នាំម្នាក់ បានក្អួតចង្អោរ និងប្រកាច់បែកពពុះមាត់រហូតដល់ស្លាប់នៅវេលាម៉ោង ១ រំលងអធ្រាត្រឈានចូលថ្ងៃទី ១៧ សីហា បន្ទាប់ពីនាងបានបរិភោគអាហារពេលល្ងាច និងផឹកទឹកក្រូចអស់ ២ ដប ដែលករណីនេះត្រូវសមត្ថកិច្ចសន្និដ្ឋានថា អាចជាការពុលអាហារ និងជំងឺចាស់រើឡើង។
លោក ទន់ សុវណ្ណារ៉េត នាយនគរបាលប៉ុស្តិ៍ឃុំគោករមៀត ប្រាប់ ភ្នំពេញ ប៉ុស្តិ៍ថា យុវតីរងគ្រោះឈ្មោះ ឆេន ស្រីមុំ អាយុ ១៧ ឆ្នាំ មានទីលំនៅភូមិតាម៉ាំង ឃុំគោករមៀត ស្រុកថ្មពួក ខេត្តបន្ទាយមានជ័យ។
លោកថា៖ «តាមការពិនិត្យកោសល្យវិច័យរបស់គ្រូពេទ្យជំនាញសពរបស់នាង គឺអវិជ្ជមានជំងឺកូវីដ ១៩ ហើយក៏គ្មានស្លាកស្នាមអ្វីពាក់ព័ន្ធទៅនឹងអំពើឃាតកម្មនោះដែរ។ ដោយសំអាងទៅលើការបញ្ជាក់ពីស្ត្រីជាម្ដាយ និងអ្នកភូមិ ក្រុមគ្រូពេទ្យជំនាញបានសន្និដ្ឋានថា ការស្លាប់របស់នាងបណ្ដាលមកពីពុលចំណីអាហារ និងការរើឡើងវិញនៃជំងឺចាស់»។
ម្ដាយយុវតីរងគ្រោះអ្នកស្រី ឆេន សុផល អាយុ ៤២ ឆ្នាំ បានប្រាប់ ភ្នំពេញ ប៉ុស្តិ៍ថា កាលពីតូចនាងធ្លាប់មានបញ្ហាក្ដៅខ្លួនខ្លាំង និងឧស្សាហ៍សន្លប់។ នៅពេលមានអាយុ ៦ ឆ្នាំ គាត់បាននាំនាងទៅកាន់មន្ទីរពេទ្យគន្ធបុប្ផាក្នុងខេត្តសៀមរាប ដើម្បីព្យាបាល។
អ្នកស្រីបានបញ្ជាក់ថា៖ «នៅពេលនោះ ក្រុមគ្រូពេទ្យជំនាញបានប្រាប់ខ្ញុំថា នាងមានបញ្ហាជំងឺរលាកស្រោមខួរធ្ងន់ធ្ងរ ប៉ុន្តែក្រុមគ្រូពេទ្យមិនបានធ្វើការព្យាបាលដោយវះកាត់នោះទេ គឺគ្រាន់តែព្យាបាលចាក់ថ្នាំ និងព្យួរសេរ៉ូម ដើម្បីបំបាត់ការឈឺចាប់ប៉ុណ្ណោះ។ ក្រោយពីនាងមានអាការធូរស្រាល ក្រុមគ្រូពេទ្យក៏អនុញ្ញាតឱ្យខ្ញុំនាំនាងត្រឡប់មកផ្ទះវិញ ដោយតម្រូវឱ្យខ្ញុំទៅបើកថ្នាំសម្រាប់នាងលេបរៀងរាល់ ១ ខែម្ដង»។
ដោយសារអ្នកស្រីជាស្ត្រីមេម៉ាយ និងមានជីវភាពក្រីក្រផងនោះអ្នកស្រី សុផល ពុំសូវមានពេលនៅមើលថែ ស្រីមុំ នោះទេ ហើយការទៅបើកថ្នាំយកមកព្យាបាលជំងឺរបស់នាង ក៏មិនបានជាប់លាប់តាមកាលកំណត់របស់គ្រូពេទ្យផងដែរ។
កាលពី ៥ ឆ្នាំមុន អាការជំងឺស្រីមុំបានរើឡើងជាថ្មីម្ដងទៀត គឺក្ដៅខ្លួន និងប្រកាច់បែកពពុះមាត់។ ប៉ុន្តែសំណាងល្អត្រូវបានក្រុមគ្រូពេទ្យជួយសង្គ្រោះព្យាបាលឱ្យធូរស្រាលឡើងវិញ។ ប៉ុន្តែចាប់ពីពេលនោះមក នាងមានភាពប្រែប្រួលខុសប្រក្រតីដោយនិយាយអ្វីប្លែកៗ ដើរមិនចូលផ្ទះ និងឧស្សាហ៍សន្លប់បាត់ស្មារតី។
អ្នកស្រីបន្តថា៖ «នៅល្ងាចថ្ងៃទី ១៦ ខែ សីហា ឆ្នាំ ២០២១ ក្រោយបរិភោគអាហារពេលល្ងាច នាងបានផឹកទឹកក្រូចអស់ ២ ដបតូច។ ១ ម៉ោងក្រោយមក នាងក៏ចាប់ផ្ដើមចុកពោះ និងក្អួតចង្អោរ ឃើញដូច្នោះខ្ញុំក៏បានយកថ្នាំ Paracetamol ២ គ្រាប់ឱ្យនាងលេប ប៉ុន្តែមិនបានធ្វើឱ្យអាការរបស់នាងបានធូរស្រាលឡើយ។ នាងបានបន្តក្អួតចង្អោរ រហូតបែកពពុះមាត់ ហើយស្លាប់»។
លោកស្រី ខ្លុង ប្រធានមណ្ឌលសុខភាពអូរបីជាន់ ដែលបានចុះធ្វើកោសល្យវិច័យសាកសពរបស់យុវតីរងគ្រោះថ្លែងថា មុនដំបូងសមត្ថកិច្ចសង្ស័យការស្លាប់របស់នាងបណ្ដាលមកពីជំងឺកូវីដ ១៩។ ប៉ុន្តែពិនិត្យមិនឃើញមានវិជ្ជមានជំងឺកូវីដនោះទេ ហើយក៏គ្មានស្លាកស្នាមអ្វីកើតមានលើរូបនាងដែរ។ «ក្រោយពីពិនិត្យកោសល្យវិច័យរួចក្រុមការងារយើងបានសន្និដ្ឋានថា ការស្លាប់របស់នាងគឺបណ្ដាលមកពីពុលចំណីអាហារផង និងការរើឡើងវិញនៃជំងឺចាស់របស់នាង»៕