The Phnom Penh Post Search

Search form




Logo of Phnom Penh Post newspaper Phnom Penh Post - ស.ស.អ.ក. និង​គ្រឹះស្ថាន​អប់រំ​កុមារ​លើកទឹកចិត្ត​ឱ្យ​ជំរុញ​កុមារ​រៀន​ពី​ចម្ងាយ​

ស.ស.អ.ក. និង​គ្រឹះស្ថាន​អប់រំ​កុមារ​លើកទឹកចិត្ត​ឱ្យ​ជំរុញ​កុមារ​រៀន​ពី​ចម្ងាយ​

Content image - Phnom Penh Post
សកម្មភាព​កុមារ​ម្នាក់​ពេល​កំពុង​រៀន​ពី​ចម្ងាយ​តាម​អនឡាញ​កាលពី​ខែមីនា ឆ្នាំនេះ​។ ហេង ជីវ័ន

ស.ស.អ.ក. និង​គ្រឹះស្ថាន​អប់រំ​កុមារ​លើកទឹកចិត្ត​ឱ្យ​ជំរុញ​កុមារ​រៀន​ពី​ចម្ងាយ​

ភ្នំពេញៈ ​សហព័ន្ធ​សេវា​អប់រំ​នៅ​កម្ពុជា​ (​ស.ស.អ.ក.) ​និង​គ្រឹះស្ថាន​អប់រំ​កុមារ​តូច​នានា​នៅ​កម្ពុជា​បាន​លើកទឹកចិត្ដ​ដល់​​មាតាបិតា​អាណាព្យាបាល​ឱ្យ​បន្ត​ផ្ដល់​ការសិក្សា​ការអប់រំ​ដល់​កុមារ​ក្នុង​បរិបទ​កូ​វីដ​តាមរយៈ​វិធីសាស្ដ្រ​ផ្សេងៗ ព្រោះ​កុមារ​គឺជា​ធនធាន​មនុស្ស​សំខាន់​សម្រាប់​ការអភិវឌ្ឍ​ប្រទេស​នាពេល​អនាគត​។

ការជំរុញ​បែបនេះ​ធ្វើឡើង​តាមរយៈ​ការធ្វើ​វេទិកា តាម​អនឡាញ​រួមគ្នា​ស្តីពី​បញ្ហា​ប្រឈម​ដំណោះស្រាយ​ និង​សារៈសំខាន់​​នៃ​ការសិក្សា​ពី​ចម្ងាយ​សម្រាប់​កុមារ​តូច​ក្នុង​អំឡុងពេល និង​ក្រោយ​ការឆ្លង​រីករាលដាល​ជំងឺ​កូវីដ​ ១៩ កាលពី​ម្សិលមិញ​។

លោក​ ប៊ុន សុផាត សមាជិក​ក្រុមប្រឹក្សាភិបាល​នៃ ស.ស.អ.ក. ​បាន​ថ្លែងថា ក្នុង​បរិបទ​កូវីដ​ ១៩ ​ជាង​ ១ ​ឆ្នាំ​មកនេះ​បាន​ធ្វើឱ្យ​ប៉ះពាល់​ធ្ងន់ធ្ងរ​ដល់​ការអប់រំ​នៅ​កម្ពុជា​ និង​សកលលោក ពិសេស​ការអប់រំ​ដល់​កុមារ​តូច​។

លោក​ថ្លែងថា​៖ «​យើង​ទាំងអស់​គ្នា​ក៏​ទទួលស្គាល់​ដែរ​ថា​ការបង្រៀន​ និង​រៀន​តាមរយៈ​អនឡាញ​នេះ​គឺ​បានផ្ដល់​ផលវិជ្ជមាន គុណភាព និង​លទ្ធផល មិនបាន​ល្អប្រសើរ​ដូច​ការបង្រៀន និង​រៀន​ផ្ទាល់​ក្នុង​សាលារៀន​នោះឡើយ​»​។

លោក​បន្តថា​៖ «​ប៉ុន្ដែ​ទោះយ៉ាងណា យើង​ទាំងអស់​គ្នា​ជា​អ្នក​អប់រំ ជា​មាតាបិតា អាណាព្យាបាល​សិស្ស មិនអាច​បណ្ដោយឱ្យ​កុមារ​តូច ឬ​សិស្សានុសិស្ស​ទាំងអស់​កាត់​ផ្ដាច់ និង​ឃ្លាតឆ្ងាយ​ពី​ការសិក្សា​នោះទេ​។ យើង​ត្រូវ​រួមគ្នា​ជំរុញ​លើក​ទឹកចិត្ដ សិស្សានុសិស្ស​ទាំងអស់​ឱ្យ​​បាន​បន្ត​ការសិក្សា​រៀនសូត្រ​ជាប់​រហូត​ទោះបី​ស្ថិតក្នុង​បរិបទ​​នៃ​កូវីដ​ ១៩ ​ក៏ដោយ​»​។

លោក​ សុផាត បាន​លើកឡើង​ថា ជីវិត​ក្នុងសម័យ​កូវីដ​ពោរពេញ​ដោយ​ភាពតានតឹង ការថប់​អារម្មណ៍ ចំពោះ​មនុស្ស​ជាច្រើន​ក្នុងនោះ​សូម្បីតែ​កុមារ​តូច​ក៏​រង​សម្ពាធ​នេះដែរ​។ ​កុមារ​ត្រូវការ​សេរីភាព​ក្នុងការ​រៀនសូត្រ ស្វែងរក​នូវ​ក្ដី​ស្រមៃ​របស់​ពួកគេ​ហើយក៏​ងាយ​ថប់​អារម្មណ៍​ និង​​ងាយ​ប៉ះទង្គិច​ផ្លូវចិត្ត​ផងដែរ​បើ​ពួកគេ​ត្រូវបាន​រឹតត្បិត​ខ្លាំង​។

លោក​បាន​បន្តថា​៖ «​ដូច្នេះ​យើង​មាន​កាតព្វកិច្ច​បង្កើត​បរិយាកាស​រីករាយ​សម្រាប់​កុមារ តាមរយៈ​ការបន្ត​ផ្ដល់ឱ្យ​ពួកគេ​នូវ​សេរីភាព​ក្នុង​ការសិក្សា និង​សកម្មភាព​ផ្សេងៗ​ដែលជា​ជំនួយ​ដល់​ការលូតលាស់​នៃ​រាងកាយ បញ្ញា ស្មារតី និង​សតិអារម្មណ៍​ទៅតាម​វ័យ​របស់​ពួកគេ​»​។

លោកស្រី គង់ សូរីតា នាយិកា​សាលា​អន្តរជាតិ​ប្រ៊ិតធីសប៊្លូប៊ើដ បាន​លើកឡើងថា ក្នុង​បរិបទ​កូវីដ​ ១៩ ​នេះ​ចង់​មិន​ចង់​សាលារៀន​ត្រូវ​កែប្រែ​ខ្លួនឯង​ទៅ​​រក​ការរៀន​ និង​ការបង្រៀន​ដល់​សិស្ស​តាមបែប​ឌីជីថល​។

លោកស្រី​ថ្លែងថា​៖ «​អ្វីដែល​យើង​មាន​បញ្ហា​ប្រឈម​គឺ​វា​ដូច​​គ្នា​ទេ ជាពិសេស​សាលា​ដែល​ផ្ដល់​​នូវ​សេវា​ផ្នែក​អប់រំ​កម្រិត​មត្តេយ្យ​សិក្សា និង​បឋមសិក្សា​។ យើង​មើលឃើញ​ពី​បញ្ហា​ប្រឈម​នោះ គឺ​ទាក់ទង​នឹង​ការប្រើ​បច្ចេកវិទ្យា បញ្ហា​ទាក់ទង​ទៅនឹង​ការសហការ​ជាមួយ​អ្នក​អាណាព្យាបាល​ដោយសារ​ [​ពួកគាត់​] ​អត់​មាន​ពេល​ជំរុញ​ការរៀន​តាម​​អនឡាញ​ដល់​កុមារ​ឱ្យមាន​ប្រសិទ្ធភាព​»​។

លោកស្រី​បាន​ឱ្យដឹងថា មាន​​អាណាព្យាបាល​កុមារ​តូច​ខ្លះ​​គិតថា ឱ្យ​កូន​រៀន​តាម​អនឡាញ​ជា​ការខាតបង់​ស្របពេល គ្រួសារ​នីមួយៗ​មាន​បញ្ហា​ហិរញ្ញវត្ថុ​។ ​បើ​អាណាព្យាបាល​ភាគច្រើន​គិតបែបនេះ​សម្រាប់​គ្រឹះស្ថាន​អប់រំ​មិន​បារម្ភ​ពី​ការខាតបង់​ ដោយសារ​គ្មាន​អ្នក​ចូលរៀន​នោះទេ​។ ​ប៉ុន្ដែ​ត្រូវ​គិតពី​ការលូតលាស់​របស់​កុមារ​ទាក់ទង​នឹង​ការអប់រំ និង​វ័យ​របស់​កុមារ ដោយសារ​មិនដឹងថា​បញ្ហា​កូវីដ​ ១៩ ​នឹង​បញ្ចប់​ពេលណា​។

លោក ព្រីង ដារ៉ា នាយករង​នៃ​សាលា​ហ្វូតព្រីន​អន្តរជាតិ បានលើកឡើង​ដែរ​ថា ក្នុង​​ពេល​មាន​វិបត្តិ​កូវីដ​ ១៩ ​នេះ គឺមាន​បញ្ហា​ប្រឈម​ខ្លាំង​ទាំង​ភាគី​សាលា និង​អ្នក​អាណាព្យាបាល និង​សិស្ស​។ ​«​ប៉ុន្ដែ​ទោះបី​ជាមាន​ផល​លំបាក​យ៉ាងណា គឺ​យើង​មិនអាច​បោះបង់ចោល​ទេ​គឺ​ត្រូវ​រក​ដំណោះស្រាយ​ក្នុង​បញ្ហា​កូវីដ​ ១៩ ​នេះ​ ដើម្បី​ធនធាន​​មនុស្ស​ពិសេស​ក្មេងៗ​ជំនាន់​ក្រោយ​របស់​កម្ពុជា​»​។

លោកស្រី សរ ម៉ុន្ថា នាយិកា សាលា​អប់រំ​កុមារ​តូច ស៊ីជីដាកម្ពុជា បានស្នើ​ដល់​មាតាបិតា អាណាព្យាបាល​បន្ត​លើកទឹកចិត្ត​ដល់​កូន​ ឬ​កុមារ​ឱ្យ​សិក្សា​តាម​អនឡាញ​ និង​សិក្សា​ដោយផ្ទាល់​​នៅ​សាលា​ពេលខាងមុខ​។

លោកស្រី​ថ្លែងថា​៖ «​ពិតប្រាកដ​ណាស់​ពេល​ផ្អាក​ដំណើរការ​សាលារៀន កុមារ​ត្រូវ​បន្ត​សិក្សា​តាម​អនឡាញ​ និង​មាន​ពេល ប៉ុន្ដែ​ការសិក្សា​អាច​នឹង​​មិន​ទទួលបាន​ផលល្អ​ដូចជា​ការរៀន​ក្នុង​ថ្នាក់​ទេ​។ ដូច្នេះ​មាតាបិតា​ត្រូវ​ចេះ​ប្រមូល​អារម្មណ៍ និង​លើក​ទឹកចិត្ដ​កូន​ឱ្យ​ខំ​សិក្សា​មិន​​ត្រូវដាក់​សម្ពាធ​បន្ថែម​ដល់​ពួកគេ​ចំពោះ​ការសិក្សា​នោះទេ​»​។

លោក រស់ សុវាចា អ្នកនាំពាក្យ​ក្រសួង អប់រំ យុវជន និង​កីឡា​ថ្លែងថា​៖ «​មុន​និង​ក្នុង​បរិបទ​កូវីដ​ ១៩ ក្រសួង​អប់រំ​បាននិង​កំពុង​បន្ត​ផ្តល់​ប្រយោជន៍​​ដល់​សិស្ស-និស្សិត​ក្នុង​ការបំពេញ​​គោលបំណង​នៃ​ការសិក្សា និង​ស្វ័យ​សិក្សា​គ្រប់​កម្រិត​។ ​ចំពោះ​វត្តមាន​កូវីដ​ ១៩ ​ក្រសួង​អប់រំ​បាន​​ផលិត​នូវ​យន្តការ​រៀន​ពី​ចម្ងាយ​ និង​តាម​ប្រព័ន្ធ​អេឡិចត្រូនិក​​ ដើម្បី​ឆ្លើយតបបាន​ទាន់ពេល​»​។

លោកនាយក​រដ្ឋមន្ដ្រី​ធ្លាប់បាន​ថ្លែង​ក្នុងពេល​បើក​យុទ្ធនាការ​ចាក់​វ៉ាក់សាំង​បង្ការ​ជំងឺ​កូវីដ​ ១៩ ​ដល់​កុមារ​ និង​យុវវ័យ​អាយុ​ចាប់ពី​ ១២ ​ឆ្នាំ​ដល់​ ១៧ ​ឆ្នាំ កាលពី​ថ្ងៃទី​ ១ ខែសីហា ថា ផលប្រយោជន៍​នៃ​ការចាក់​វ៉ាក់សាំង​ដល់​កុមារ និង​យុវវ័យ​អាច​អនុញ្ញាត​ដល់​ការបើក​ដំណើរការ​សាលា​ឡើងវិញ​យ៉ាងហោច​​ណាស់ ថ្នាក់​អនុវិទ្យាល័យ​សម្រាប់​បវេសនកាល​ឆ្នាំ​សិក្សា​ ២០២១-២០២២ នៅ​ខែកញ្ញា​ ឬ​ខែតុលា ខាងមុខ​៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។