ភ្នំពេញៈ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានប្រកាសផ្អាកមិនឱ្យនេសាទគ្រំក្រឡាហូលក្នុងសមុទ្រកម្ពុជារយៈពេល ២ ខែ ចាប់ពីថ្ងៃទី ១ ខែកញ្ញា ដល់ថ្ងៃទី ៣១ ខែតុលា ដោយសារជារដូវពងកូន។ នេះបើតាមសេចក្តីជូនដំណឹងរបស់រដ្ឋបាលជលផលពីថ្ងៃទី ១៧ ខែសីហា។
សេចក្តីជូនដំណឹងបញ្ជាក់ថា ការបិទនេសាទអូសគ្រំក្រឡាហូល ២ ខែនេះ ព្រោះជារដូវពងកូនរបស់គ្រំក្រឡាហូល និងដើម្បីថែរក្សាការពារធនធានជលផលសមុទ្រឱ្យបានគង់វង្ស។
លោក ស៊ុំ គង់ ប្រធានការិយាល័យនេសាទសមុទ្រនៃរដ្ឋបាលជលផល ថ្លែងថា ក្នុងរយៈពេល ២ ខែនេះ ជារដូវបន្តពូជរបស់ប្រភេទគ្រំក្រឡាហូលស្ថិតក្នុងដែនសមុទ្រកម្ពុជា។ ទោះជាយ៉ាងណា គ្រំក្រឡាហូលនេះមានច្រើនជាងគេនៅក្នុងតំបន់ថ្មស ខេត្តកោះកុង និងតំបន់កោះខ្យង ស្ថិតនៅព្រំប្រទល់ខេត្តកំពត និងខេត្តព្រះសីហនុ។
លោកបានបន្តថា បន្ទាប់ពីចប់ក្នុងរយៈពេល ២ ខែនេះ ប្រជានេសាទអាចបន្តធ្វើការនេសាទវិញបានហើយ។ ប៉ុន្តែ បើប្រជានេសាទធ្វើការនេសាទក្នុងរដូវហាមឃាត់នេះ ពួកគាត់នឹងត្រូវមានទោសទណ្ឌ ឬក៏ត្រូវព្រមានតាមច្បាប់របស់ជលផល។
លោក ស៊ុំ គង់ ថ្លែងថា៖ «នៅពេលដែលរដ្ឋបាលជលផលចេញសេចក្តីជូនដំណឹងនេះ ខាងជលផលដែនសមុទ្រនឹងចុះទៅពង្រឹង និងទប់ស្កាត់លើការធ្វើនេសាទ ដែលបំពានចំពោះសេចក្តីជូនដំណឹងនេះ»។
លោក នៅ សាម៉ាប់ ប្រធានគណៈកម្មការសហគមន៍នេសាទ ស្រុកស្រែអំបិល ខេត្តកោះកុង បានឱ្យដឹងដែរថា ក្នុងដែននេសាទរបស់លោកមិនមានប្រភេទគ្រំក្រឡាហូលទេ ប៉ុន្តែគ្រំទាំងនេះបាននាំចូលមកពីតំបន់ថ្មស យកមកចែកក្នុងតំបន់របស់លោក។
ទោះជាយ៉ាងណាលោកបានស្វាគមន៍ចំពោះរដ្ឋបាលជលផល ដែលបានប្រកាសផ្អាកមិនឱ្យធ្វើអាជីវកម្ម ឬនេសាទក្នុងអំឡុងពេល ២ ខែដែលជារដូវពងកូននេះ ព្រោះវានឹងរក្សាបាននូវកំណើន និងធនធានសមុទ្រឱ្យរក្សាបានគង់វង្សទៅមុខទៀត៕