.jpg)
ឈើប្រណីតដែលសមត្ថកិច្ចបង្ក្រាបបានកាលពីថ្ងៃទី ១៨-១៩ សីហា។ រូបថត ហ្វេសប៊ុក
ព្រះវិហារៈ កម្លាំងជំនាញផ្នែករដ្ឋបាលព្រៃឈើខេត្តព្រះវិហារកំពុងស្រាវជ្រាវស្វែងរកម្ចាស់ឈើប្រណីតដែលលាក់ទុកនៅឃុំរណសិរ្ស ស្រុកសង្គមថ្មី ខេត្តព្រះវិហារ ក្រោយពីចុះបង្ក្រាបហើយបានរកឃើញចំនួន ១៦៥ ដុំ កាលពីថ្ងៃទី ១៨ និងថ្ងៃទី ១៩ ខែសីហា។
លោក ស៊ុម សុវុត្ថា នាយផ្នែករដ្ឋបាលព្រៃឈើរវៀងបានថ្លែងនៅរសៀលថ្ងៃទី ១៩ ខែសីហាថា កម្លាំងជំនាញរបស់ផ្នែករដ្ឋបាលព្រៃឈើរវៀងកំពុងស្វែងរកម្ចាស់ឈើប្រណីត ដែលបានយកទៅលាក់ទុកនៅ៣ទីតាំងផ្សេងគ្នា ក្នុងឃុំរណសិរ្ស ស្រុកសង្គមថ្មី ក្រោយពីបានបង្ក្រាបឈើប្រណីតប្រភេទឈ្លីកបានចំនួន ១៦៥ ដុំ នៅថ្ងៃទី ១៨ និង ១៩ ខែសីហា។
លោកនាយផ្នែករដ្ឋបាលព្រៃឈើរវៀងបានឱ្យដឹងថា នៅថ្ងៃទី ១៨ ខែសីហា កម្លាំងផ្នែករដ្ឋបាលព្រៃឈើសហការជាមួយកម្លាំងប៉ុស្ដិ៍រដ្ឋបាលរណសិរ្ស និងកម្លាំងកងរាជអាវុធហត្ថស្រុកសង្គមថ្មីបានចុះបង្ក្រាបដោយដកហូតប្រភេទឈើឈ្លីកដែលមាន ២ ទីតាំង នៅក្នុងឃុំរណសិរ្ស។
លោកថ្លែងថា៖ «ទីតាំងទី១ នៅទួលចម្ការចេក ភូមិតាសែងជើង ដែលមានឈើចំនួន ១៦ ដុំ និងទីតាំងទី២ នៅប្រឡាយកូនស្ពានខាងកើត ភូមិតាសែងកណ្តាលមានចំនួន ១២១ ដុំ សុទ្ធតែប្រភេទឈើឈ្លីកសរុបទាំង ២ ទីតាំង មានទាំងអស់ចំនួន ១៣៧ ដុំ» ។
លោក ស៊ុម សុវុត្ថា បានឱ្យដឹងទៀតថា ដោយឡែក នៅព្រឹកឡើងថ្ងៃទី ១៩ ខែសីហា ក្រុមការងារបានបន្តចុះបង្ក្រាប ១ ទីតាំងទៀត នៅប្រឡាយកូនស្ពានខាងកើត ភូមិតាសែងស្វាយ រកឃើញឈើចំនួន ២៨ ដុំបន្ថែមទៀត។ លោកថ្លែងថា៖ «ក្រុមល្មើសទាំងនោះប្រហែលប្រុងនឹងដឹកជញ្ជូនតាមរថយន្ដចេញតាមច្រកតាសែងឆ្ពោះទៅស្រុកស្ទោងចូលក្នុងខេត្តកំពង់ធំ» ។
បើតាមលោក សុវុត្ថា ឈើដែលបង្ក្រាបបាន កម្លាំងសមត្ថកិច្ចបានដឹកជញ្ជូនតាមរថយន្តយកមករក្សាទុកនៅទីស្នាក់ការផ្នែករដ្ឋបាលព្រៃឈើរវៀង ដើម្បីវាស់វែងនិងកសាងសំណុំរឿងតាមនីតិវិធីច្បាប់ស្តីពីព្រៃឈើបញ្ជូនទៅថ្នាក់លើពិនិត្យសម្រេច។
លោក អួន រុន មេប៉ុស្តិ៍រដ្ឋបាលឃុំរណសិរ្សបានថ្លែងនៅថ្ងៃទី ១៩ សីហាថា កម្លាំងនគរបាលប៉ុស្តិ៍រដ្ឋបាលឃុំរណសិរ្សចំនួន ៣ នាក់ បានចូលរួមសហការក្នុងការចុះទៅបង្ក្រាបករណីឈើប្រណីតនេះ ប៉ុន្តែពេលចុះទៅដល់មិនបានឃើញជនសង្ស័យនោះទេ។
លោកថ្លែងថា៖ «កម្លាំងប៉ុស្តិ៍រដ្ឋបាលគ្រាន់តែចូលរួមសហការក្នុងកិច្ចការងារហ្នឹងហេតុនេះឈើប្រណីតមានចំនួនប៉ុន្មានខ្ញុំមិនដឹងច្បាស់ទេ។ ចំពោះការបង្ក្រាបករណីឈើប្រណីតនេះ មិនមានឃាត់បានជនសង្ស័យឡើយ ព្រោះចុះទៅដល់ឃើញ តែឈើនៅគរលើគ្នារាយប៉ាយពេញហ្នឹង» ៕
