ភ្នំពេញៈ គម្រោងភាពជាដៃគូលើវិស័យព្រៃឈើ និងជលផលក្នុងប្រទេសកម្ពុជា (PaFF) ត្រូវបានប្រកាសឱ្យអនុវត្តបន្តក្នុងដំណាក់កាលទី ៣ បន្ទាប់ពីការអនុវត្តគម្រោងចំនួន ២ ដំណាក់កាលនាពេលកន្លងមកនេះត្រូវបានរកឃើញថា បានចូលរួមពង្រឹងលើការអនុវត្តសិទ្ធិរបស់ប្រជាសហគមន៍រាប់ម៉ឺននាក់នៅក្នុងខេត្តគោលដៅ។
កាលពីម្សិលមិញ គម្រោង PaFF ត្រូវបានប្រកាសឡើងក្នុងដំណាក់ទី ៣ តាមរយៈប្រព័ន្ធវីដអូហ្ស៊ូម ដោយមានការចូលរួមជាមន្ត្រីតំណាងឱ្យរដ្ឋបាលព្រៃឈើរដ្ឋបាលជលផលក្រសួងបរិស្ថាន ក្រសួងទេសចរណ៍ អាជ្ញាធរមូលដ្ឋាន។
ក្នុងនោះក៏មានតំណាងអង្គការក្រៅរដ្ឋាភិបាល និងដៃគូអភិវឌ្ឍន៍ វិស័យឯកជន និងតំណាងសហគមន៍មូលដ្ឋានមកពីបណ្តារាជធានី-ខេត្តចូលរួមសរុបជាង ១០០ នាក់។
តាមការប្រកាសក្នុងសិក្ខាសាលាបានឱ្យដឹងថា កម្មវិធី PaFF ដំណាក់កាលទី ៣ នឹងបន្តអនុវត្តនៅក្នុងខេត្តក្រចេះ ខេត្តស្ទឹងត្រែង ខេត្តកំពង់ធំ និងខេត្តព្រះវិហារ ដែលមានទឹកប្រាក់ចំនួន ៦,២ លានដុល្លារអាមេរិក សម្របសម្រួលអនុវត្តដោយអង្គការចំនួន ៤ គឺអង្គការ រីខូហ្វ RECOFTC),អង្គការកម្មវិធីផ្លាស់ប្តូរបទពិសោធអនុផលព្រៃឈើនៅអាស៊ី (NTFP-EP),មូលនិធិសកលដើម្បីអភិរក្សធនធានធម្មជាតិ (WWF) និងសមាគមថែរក្សាបរិស្ថាន និងវប្បធម៌ (CEPA)។
គម្រោងរបស់ PaFF មាន ៣ ដំណាក់កាលដែលមានរយៈពេល ៨ ឆ្នាំ ចាប់ផ្តើមពីខែវិច្ឆិកាឆ្នាំ ២០១៤ រហូតដល់ខែមិថុនាឆ្នាំ ២០២៣។ គម្រោងនេះត្រូវបានអនុវត្ត ដើម្បីរៀបចំផែនការគ្រប់គ្រងអភិវឌ្ឍន៍សហគ្រាសសហគមន៍/សហគមន៍អេកូទេសចរណ៍ បង្កើត និងអនុវត្តឥណទានសហគមន៍ព្រៃឈើ និងនេសាទ និងពង្រឹងបណ្តាញសហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ។
លោក សេង ទៀក នាយកអង្គការ WWF ដែលបានដឹកនាំកម្មវិធី PaFF អស់រយៈពេល ៤ ឆ្នាំកន្លងមកនេះ បានថ្លែងថា ការរួមសហការគ្នារបស់អង្គការដៃគូនៃកម្មវិធី PaFF គឺជាគំរូល្អមួយដែលបានបង្ហាញឱ្យឃើញពីសារៈសំខាន់ និងភាពប្រសើរនៃកិច្ចសហប្រតិបត្តិការរួមគ្នា ដើម្បីទទួលបាននូវភាពជោគជ័យកាន់តែប្រសើរសម្រាប់មនុស្ស និងធម្មជាតិ ។
លោកបានបញ្ជាក់ថា៖ «តាមរយៈការពង្រឹងសមត្ថភាព និងផ្តល់ធនធាននានាចាំបាច់ដល់សហគមន៍ដើម្បីឱ្យពួកគេអាចធ្វើការសម្រេចចិត្ត គ្រប់គ្រង និងប្រើប្រាស់ធនធានធម្មជាតិរបស់ខ្លួន គឺជាតម្រូវការចាំបាច់សម្រាប់ការអនុវត្តបន្តទៅមុខទៀត ដើម្បីលើកកម្ពស់ភាពជាម្ចាស់ និងការគាំទ្រដល់ការអភិវឌ្ឍជីវភាពរស់នៅរយៈពេលវែង និងដល់ការអភិរក្សធនធានជីវចម្រុះ»។
តាមរបាយការណ៍របស់ក្រុមអង្គការអនុវត្តគម្រោង PaFF បានឱ្យដឹងថា ដំណាក់កាលដំបូងទាំង ២ របស់ PaFF បានជួយដល់ប្រជាជនប្រមាណ ៤៤ ៦០០ នាក់ដែលពឹងផ្អែកលើព្រៃឈើ និងជលផលនៅក្នុងសហគមន៍។
នៅក្នុងដំណាក់កាលទាំង ២ នេះ PaFF បានជួយដល់សហគមន៍ចំនួន ៦០ ឱ្យទទួលបានសិទ្ធិលើព្រៃឈើ និងជលផលនៅក្នុងមូលដ្ឋានជាផ្លូវការ និងបានគាំទ្រដល់សហគមន៍ចំនួន ១៣៤ ក្នុងការអភិវឌ្ឍ និងអនុវត្តផែនការគ្រប់គ្រងធនធានទាំងនេះ។
បន្ថែមពីនេះកម្មវិធីនេះក៏បានបង្កើតនូវបរធនខ្នាតតូចចំនួន ១៤ និងគម្រោងឥណទានចំនួន ៤៦ ដើម្បីជួយផ្ដល់ជាហិរញ្ញប្បទានដល់ការគ្រប់គ្រងព្រៃឈើ និងសហគមន៍នេសាទបានខ្ចីប្រាក់។
លោក Markus Buerli នាយកនៃទីភ្នាក់ងារសម្រាប់ការអភិវឌ្ឍ និងកិច្ចសហប្រតិបត្តិការប្រទេសស្វ៊ីស (SDC) ប្រចាំនៅប្រទេសកម្ពុជា បានថ្លែងថា សមាជិកសហគមន៍នៅជនបទរបស់កម្ពុជាមានសិទ្ធិផ្នែកសេដ្ឋកិច្ច សង្គម និងវប្បធម៌ ដែលផ្សារភ្ជាប់ទៅនឹងធនធានធម្មជាតិដែលពួកគេពឹងអាស្រ័យសម្រាប់ជីវភាពរស់នៅ។ លោកយល់ថា នេះគឺជាមូលហេតុដែល PaFF អនុវត្តអភិក្រម ដែលផ្ដោតលើសិទ្ធិស្របច្បាប់។
លោកបានបញ្ជាក់ថា៖ «អភិក្រមនេះកំពុងតែជួយដល់សហគមន៍ឱ្យមានសិទ្ធិទទួលបាន និងប្រើប្រាស់ធនធានព្រៃឈើ និងជលផលនៅមូលដ្ឋានរបស់ពួកគេ ស្របពេលជាមួយនឹងការលើកកម្ពស់ការយល់ដឹងដល់សហគមន៍ និងអាជ្ញាធរលើការប្រែប្រួលអាកាសធាតុ និងការគ្រប់គ្រងធនធានធម្មជាតិប្រកបដោយនិរន្តរភាព»។
អ្នកស្រី សាយ អាំ លេខានៃគណៈកម្មការគ្រប់គ្រងសហគមន៍ព្រៃឈើ ព្រៃក្បាល ៣ នៅក្នុងខេត្តកំពង់ធំ បានថ្លែងថា សព្វថ្ងៃនេះ អ្នកស្រីបានចូលរួមនៅក្នុងកិច្ចពិភាក្សាជាច្រើន ហើយក៏បានដឹងច្បាស់ពីរបៀបដែលប្រជាសហគមន៍គួរតែចំណាយថវិកាសម្រាប់ផែនការគ្រប់គ្រងព្រៃសហគមន៍ដែលទទួលបានពីគ្រោងការឥណទាន។
អ្នកស្រីបានបញ្ជាក់ថា៖ «បច្ចុប្បន្ននេះ ខ្ញុំបានយល់ដឹងបន្ថែមពីសកម្មភាពដែលយើងអាចធ្វើបាន ដើម្បីគ្រប់គ្រងព្រៃឈើ ដោយសារខ្ញុំបានចូលរួមក្នុងកិច្ចប្រជុំរបស់គម្រោងឥណទានជារៀងរាល់ខែ»។
លោក សៀ រ៉ា អនុប្រធាន រដ្ឋបាលព្រៃឈើកម្ពុជាមានបានបង្ហាញការអបអរសាទរ ដែលប្រជាសហគមន៍ទទួលបានការលើកកម្ពស់ជីវភាពរស់នៅ និងពង្រឹងសមត្ថភាព។ លោកបានបញ្ជាក់យ៉ាងដូច្នេះថា៖ «ខ្ញុំសូមសម្ដែងនូវភាពត្រេកអរចំពោះសមិទ្ធផលរបស់កម្មវិធី PaFF នៅដំណាក់កាលទាំង ២ កន្លងមក និងរំពឹងថា PaFF ដំណាក់កាលទី ៣ នឹងទទួលបានសមិទ្ធផលកាន់តែច្រើនបន្ថែមទៀត»៕