បាត់ដំបង/ប៉ៃលិនៈ លោកនាយករដ្ឋមន្ត្រី ហ៊ុន សែន ប្រាប់ឱ្យក្រុមការងារទទួលទិញផ្លែមៀនក្នុងខេត្តបាត់ដំបងផ្តោតគោលដៅប្រមូលផ្លែមៀនពីកសិករក្រីក្រដែលដាំមៀនដោយផ្ទាល់ ចំណែកឈ្មួញធំៗត្រូវរកទីផ្សារដោយខ្លួនឯង ខណៈតួលេខបឋមក្នុងការប្រមូលទិញផ្លែមៀនពីប្រជាកសិករក្នុងរយៈពេល ២ ថ្ងៃ បានជាង ១០០ តោន។
កាលពីថ្មីៗនេះលោកនាយករដ្ឋមន្ត្រីបានចេញបញ្ជាឱ្យលោក ហ៊ីង ប៊ុនហៀង នាយករងខុទ្ទកាល័យរបស់លោកដឹកនាំកម្លាំងទៅប្រមូលទិញផ្លែមៀនពីកសិករ ដែលមិនអាចរកទីផ្សារ ដើម្បីលក់បាន ដើម្បីយកផ្លែមៀនទាំងនោះទៅចែកជូនកងទ័ពនគរបាល កងរាជអាវុធហត្ថ គ្រូពេទ្យ អ្នកជំងឺដែលកំពុងធ្វើចត្តាឡីស័កទទួលទានដោយមិនគិតថ្លៃ។
លោក ហ៊ុន សែន បានសរសេរនៅលើទំព័រហ្វេសប៊ុករបស់លោកនៅថ្ងៃទី ១៨ សីហាថា នេះគឺជាវិធីដោះទាល់មួយក្នុងកាលៈទេសៈដ៏លំបាកកុំឱ្យកសិករក្រីក្រខាតបង់ធ្ងន់ធ្ងរពេក ហើយជាដំណោះស្រាយសម្រាប់រយៈពេលខាងមុខ គឺក្រសួងកសិកម្ម ក្រសួងពាណិជ្ជកម្ម អភិបាលខេត្តបាត់ដំបង និងប៉ៃលិន ត្រូវខិតខំដោះស្រាយរកទីផ្សារជូនកសិករ។
បន្ថែមពីនេះលោក ហ៊ុន សែន ក៏បានសង្កត់ធ្ងន់ថា លោកមិនបានប្រើថវិកាជាតិ ដើម្បីទិញផលិតផលទាំងនេះនោះទេ ហើយក្នុងគោលដៅប្រមូលទិញផ្លែមៀនដែលកំពុងគ្មានទីផ្សារនៅពេលនេះ គឺត្រូវផ្តោតសំខាន់ទៅលើប្រជាកសិករក្រីក្រ ដែលជួបប្រទះការខ្វះខាត និងការអត់ទីផ្សារលក់ផ្លែមៀនពិតប្រាកដ។
លោកបញ្ជាក់ថា៖ «ឯកឧត្តម ហ៊ីង ប៊ុនហៀង ឯកឧត្តម ងួន រតនៈ អភិបាលខេត្តបាត់ដំបង លោកជំទាវ បាន ស្រីមុំ អភិបាលខេត្តប៉ៃលិនត្រូវចងចាំពាក្យ (ទិញពីកសិករ) សំដៅដល់កសិករក្រីក្រដែលដាំមៀនដោយផ្ទាល់។ សម្រាប់ចម្ការមៀនរបស់មន្ត្រីទាំងស៊ីវិល ទាំងកងកម្លាំងប្រដាប់អាវុធ ឬរបស់ឧកញ៉ា អ្នកឧកញ៉ា ឬអ្នកជំនួញត្រូវរកទីផ្សារដោយខ្លួនឯង។ ខ្ញុំអាចបញ្ចាំផ្ទះយកលុយទៅទិញពីកសិករដែលកំពុងជួបការលំបាក តែខ្ញុំពុំមានលទ្ធភាពជួយដល់ម្ចាស់ដី ដែលមានចម្ការមៀនច្រើននោះទេ សុំការយោគយល់ផង»។
លោក ហ៊ីង ប៊ុនហៀង បានលើកឡើងពីថ្ងៃទី ១៩ សីហា ក្នុងពេលចុះដល់ចំការមៀន ប្រជាកសិករនៅក្នុងខេត្តបាត់ដំបងថា ការប្រមូលទិញផ្លែមៀនទាំងនេះ គឺមិនមែនយកមកធ្វើអាជីវកម្មនោះទេ។ ផ្លែមៀនដែលប្រមូលទិញបាន នឹងចែកដល់ប្រជាពលរដ្ឋ និងកងកម្លាំងក្នុងម្នាក់ ២ គីឡូក្រាម។
លោករៀបរាប់ថា៖ «នេះគ្រាន់តែការទប់ទល់ការលំបាកក្នុងរយៈពេលខ្លីទេ។ សូមកុំច្រឡំថា នេះជាការទិញសម្រាប់នាំចេញទៅណាផ្សេងទៀត គឺមិនមែនទេ។ មិនមែនជាការលក់ដូរទេ គឺទិញហើយ គឺប្រមូលឱ្យគណៈអភិបាលខេត្តប្រគល់ឱ្យគណៈអភិបាលស្រុកខ្លះ និងអធិការហូបនៅហ្នឹង។ នេះមិនមែនទីផ្សារសេរី នាំចេញទៅក្រៅប្រទេសទេ គឺទិញហើយធ្វើអំណោយមនុស្សធម៌»។
លោក ងួន រតនៈ អភិបាលខេត្តបាត់ដំបងបានប្រាប់ភ្នំពេញ-ប៉ុស្តិ៍នៅថ្ងៃទី ១៩ សីហាថា ក្នុងរយៈពេល ២ ថ្ងៃ ចាប់ពីថ្ងៃទី ១៨ ដល់ថ្ងៃទី ១៩ សីហា ក្រុមការងារបានប្រមូលទិញផ្លែមៀនពីប្រជាកសិករបានប្រមាណជាង ១០០ តោនហើយ។ ចំនួនកសិផលទាំងនេះក៏បានបញ្ជូនទៅចែកជូនប្រជាពលរដ្ឋ នៅមណ្ឌលចត្តាឡីស័ក និងកងកម្លាំងប្រដាប់អាវុធភ្លាមៗផងដែរ។
ជាមួយនឹងបទពិសោធនៃការប្រមូលទិញផ្លែមៀនក្នុងរយៈពេល ២ ថ្ងៃនេះ លោកបានបញ្ជាក់ថា ក្រុមការងារបានចុះទៅទិញផ្លែមៀនទាំងនេះ ដល់ចម្ការរបស់ប្រជាកសិករដោយផ្ទាល់ ដើម្បីធានាថា ផ្លែមៀនដែលទិញទាំងអស់នឹងផ្តល់ផលប្រយោជន៍ដល់ប្រជាកសិករដែលជួបប្រទះការលំបាកពិតប្រាកដ។
លោកបានរៀបរាប់ថា៖ «យើងអត់ទទួលទិញតែមួយកន្លែងទេ ព្រោះមិនអ៊ីចឹងទេ គឺប៉ះពាល់ម្ចាស់ចម្ការ ហើយឈ្មួញនឹងឆ្លៀតឱកាសក្នុងពេលនេះ។ យើងបានចុះទៅទិញបាន ២ ទៅ ៣ ចម្ការហើយយើងយកឡានទៅដឹក និងជួយបេះគាត់ ដល់ចម្ការតែម្តង កុំឱ្យពួកគាត់ខាតថ្លៃដឹកជញ្ជូន»។
បើតាមលោក រតនៈ ការប្រមូលទិញផ្លែមៀនពីប្រជាកសិករគឺបានផ្តល់ជូនតម្លៃស្របទៅតាមស្ថានភាពនៃការចរចាជាក់ស្តែងរវាងអ្នកលក់ និងអ្នកទិញដោយតម្លៃផ្តល់ជូនចន្លោះពី ១ ៨០០ រៀល ទៅដល់ ២ ៥០០ រៀលតាមលក្ខខណ្ឌដែលប្រជាកសិករអាចទទួលយកបាន។
លោកថា៖ «តម្លៃគឺស្របទៅតាមលក្ខណៈទូទៅ និងលក្ខខណ្ឌវេចខ្ចប់ បើសិនជាមានការវេចខ្ចប់ត្រឹមត្រូវហើយ គឺតម្លៃថ្លៃ ប៉ុន្តែ បើមិនទាន់មានការវេចខ្ចប់នោះទេ គឺតម្លៃទាបជាងអ៊ីចឹងទៅ។ ដូចថ្ងៃនេះ យើងយកឡានទៅដល់ចម្ការគាត់ ហើយមានអ្នកជួយបេះអី គឺតម្លៃតែ ១ ៨០០ រៀលក្នុង ១ គីឡូទេ»។
លោក យឹម ប៊ុនធឿន ម្ចាស់ចម្ការមៀនស្ថិតក្នុងស្រុកកំរៀង ខេត្តបាត់ដំបង ដែលបានលក់ផ្លែមៀនរបស់ខ្លួនបាន ២ តោន ប្រាប់ ភ្នំពេញ ប៉ុស្តិ៍ នៅថ្ងៃទី ១៩ សីហាថា ការប្រមូលទិញពីក្រុមការងាររបស់លោក ហ៊ុន សែន ក្នុងពេលនេះ គឺបានចូលរួមដល់បញ្ហាប្រឈមរបស់ប្រជាកសិករ។
គ្រាន់តែថា លោកចង់ឱ្យរដ្ឋាភិបាលរកទីផ្សារសម្រាប់លក់ផ្លែមៀននេះជូនប្រជាកសិករដូចជាការនាំចេញទៅប្រទេសចិនឱ្យបានឆាប់ គឺកាន់តែល្អ។ «ផែនការនេះគឺអាចជួយពួកខ្ញុំបានមួយរយៈនៅពេលមៀនលក់អត់ចេញ។ គ្រាន់តែថាចង់ឱ្យថ្នាក់ដឹកនាំគាត់ជួយជំរុញក្នុងការនាំចេញទៅក្រៅប្រទេស ហើយបើបាននាំទៅចិនគឺកាន់តែល្អសម្រាប់តម្លៃរបស់កសិករយើង»៕