.jpg)
ជនជាប់ចោទពេលនាំមកសាលាដំបូងរាជធានីភ្នំពេញកន្លងមក។ រូបថត ហ្វេសប៊ុក
ភ្នំពេញៈ សាលាដំបូងរាជធានីភ្នំពេញកាលពីថ្ងៃទី ១៨ សីហា បានសម្រេចផ្តន្ទាទោសបុរសម្នាក់ឱ្យជាប់ពន្ធនាគារ ១៨ ខែ និងពិន័យប្រាក់ ២ លានរៀល ព្រមទាំងបង្គាប់ឱ្យសងសំណងទៅដើមបណ្ដឹង ២០ លានរៀលពាក់ព័ន្ធនឹងប្រើពាក្យលើបណ្ដាញសង្គមពីគម្រោងចង់ទិញម៉ាស់ពាក់ឱ្យសត្វមាន់របស់ខ្លួនដែលជាការដៀមដាមដល់រដ្ឋាភិបាលរឿងទិញម៉ាស់ចែកជូនពលរដ្ឋ។
លោក ប្លង់ សុផល អ្នកនាំពាក្យសាលាដំបូងរាជធានីភ្នំពេញបានប្រាប់ ភ្នំពេញ ប៉ុស្តិ៍ ពីម្សិលមិញថា ជនជាប់ចោទឈ្មោះ នី ណាក់ ត្រូវបានតុលាការប្រកាសសាលក្រមពីថ្ងៃទី ១៨ សីហា ដោយសម្រេចផ្តន្ទាទោសដាក់ពន្ធនាគារ ១៨ ខែក្រោមបទចោទជេរប្រមាថជាសាធារណៈ និងញុះញង់ឱ្យមានការរើសអើងតាមបញ្ញត្តិមាត្រា ៣០៨ មាត្រា ៤៩៤ និងមាត្រា ៤៩៦ នៃក្រមព្រហ្មទណ្ឌ»។
លោកថ្លែងថា៖ «តុលាការសម្រេចទី១ ផ្តន្ទាទោស ១ ឆ្នាំ ៦ ខែ និងពិន័យជាប្រាក់ចំនួន ២ លានរៀល។ ទី២ បង្គាប់ឱ្យសងសំណងទៅដើមបណ្តឹងរដ្ឋប្បវេណី ២០ លានរៀលទៅក្រសួងកសិកម្ម រុក្ខាប្រមាញ់ និងនេសាទ»។
តាមអង្គហេតុរបស់តុលាការ ឈ្មោះ នី ណាក់ ត្រូវបានសមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃឃាត់ខ្លួនកាលពីថ្ងៃទី ១១ ខែ ធ្នូ ឆ្នាំ ២០២០។ ការឃាត់ខ្លួននេះពាក់ព័ន្ធនឹងការនិយាយរិះគន់តាមអនឡាញដល់រាជរដ្ឋាភិបាលកម្ពុជា និងនិយាយដៀមដាមពីការទិញម៉ាស់ឱ្យមាន់ពាក់ ខណៈដែលខ្លួនបើកកសិដ្ឋានចិញ្ចឹមមាន់។
ប៉ុន្តែក្រោយពីបង្ហោះតាមហ្វេសប៊ុកមកក៏ត្រូវបានក្រសួងកសិកម្ម រុក្ខាប្រមាញ់ និងនេសាទប្តឹងទៅសាលាដំបូងរាជធានីភ្នំពេញ។ ក្រោយមកត្រូវបានអយ្យការអមសាលាដំបូងរាជធានីភ្នំពេញបានចេញដីកាបង្គាប់ឱ្យសមត្ថកិច្ចស្វែងរកចាប់ខ្លួន។ នេះបើតាមអង្គហេតុដដែល។
បើតាមដីកាបង្គាប់ឱ្យឃុំខ្លួនចុះថ្ងៃទី ១២ ធ្នូ ឆ្នាំ ២០២០ របស់លោកចៅក្រមស៊ើបសួរ ហុង សុគុណវឌ្ឍនា បង្ហាញថា បុរសឈ្មោះ នី ណាក់ អាយុ ៤១ ឆ្នាំ មានរបរលក់សាច់ក្រកតាមអនឡាញ និងមានលំនៅផ្ទះជួលក្រុមទី២ ភូមិសន្សំកុសល សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។ ជននេះពាក់ព័ន្ធនឹងបទជេរប្រមាថជាសាធារណៈ និងញុះញង់ឱ្យមានការរើសអើងប្រព្រឹត្តនៅរាជធានីភ្នំពេញកាលពីថ្ងៃទី ៧ ខែធ្នូ ឆ្នាំ ២០២០។
លោក អំ សំអាត អនុប្រធានអង្គការការពារសិទ្ធិមនុស្សលីកាដូបានថ្លែងកាលពីម្សិលមិញថា លោកយល់ថា រយៈពេលចុងក្រោយនេះការចាប់ និងការឃុំខ្លួនក៏ដូចជាបើកសវនាការពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ឬក៏ញុះញង់ឱ្យមានការរើសអើងបានកើតឡើងជាបន្តបន្ទាប់ចំពោះអ្នកបញ្ចេញមតិតាមបណ្តាញសង្គម។
លោកបញ្ជាក់ថា៖ «ជាការពិតសេរីភាពនៃការបញ្ចេញមតិវាជាការធានានៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា និងបទដ្ឋានអន្តរជាតិ។
ប៉ុន្តែការបញ្ចេញមតិទាំងឡាយគឺបងប្អូនប្រជាពលរដ្ឋគួរតែស្វែងយល់អំពីអ្វីទៅជាព័ត៌មានពិត និងអ្វីទៅជាព័ត៌មានមិនពិត មុនធ្វើការបញ្ចេញមតិ...ការបញ្ចេញមតិ គួរប្រកបដោយក្រមសីលធម៌កុំយកវេទិកានៃបណ្តាញសង្គមហ្នឹងទៅប្រើប្រាស់ដោយអសីលធម៌ជេរប្រមាថ»។
លោក សំអាត បានបន្តថា ក្នុងនាមជាអង្គការសង្គមស៊ីវិលលោកនៅតែលើកទឹកចិត្តសម្រាប់ពលរដ្ឋក្នុងការចូលរួមការបញ្ចេញមតិ ដើម្បីស្ថាបនា។
ព្រោះនៅប្រទេសកាន់លទ្ធិប្រជាធិបតេយ្យ សេរីភាពនៃការបញ្ចេញមតិជាការចូលរួមអភិវឌ្ឍប្រទេស។
លោកបញ្ជាក់ថា៖ «ខ្ញុំគ្រាន់តែទទូចទេថា អាជ្ញាធរ ឬក៏តុលាការលោកគួរតែពិនិត្យដែរ។ អ្វីដែលពលរដ្ឋបញ្ចេញមតិតាមបណ្តាញសង្គមហ្នឹងគួរតែពិនិត្យថាអ្វីដែលជាការបញ្ចេញមតិរបស់គាត់ អ្វីជាបទល្មើសកុំឱ្យមានការចោទប្រកាន់ពីការរំលោភបំពាននៃការបញ្ចេញមតិ»៕
វីដេអូ៖
