ភ្នំពេញៈ អាជ្ញាធរខណ្ឌពោធិ៍សែនជ័យបាននិងកំពុងកាយស្តារប្រឡាយមេ នៅអមផ្លូវរថភ្លើងស្ថិតក្នុងភូមិប៉ប្រកខាងជើង សង្កាត់កាកាបទី ១ បន្ទាប់ពីពលរដ្ឋនៅទីនោះប្រមាណ ២០ គ្រួសារយល់ព្រមរុះរើសំយាបផ្ទះ និងសំណង់អនាធិបតេយ្យចេញពីលើប្រឡាយ។
លោក ប៉ាង លីដា អភិបាលរងខណ្ឌពោធិ៍សែនជ័យថ្លែងនៅថ្ងៃទី ១៩ ខែសីហាថា លោកបានចុះទៅពិនិត្យទីតាំងផ្ទាល់ និងធ្វើការសម្របស្រួលជាមួយប្រជាពលរដ្ឋស្ថិតនៅភូមិប៉ប្រកខាងជើង សង្កាត់កាកាបទី ១ កាលពីថ្ងៃទី ១៨ ខែសីហា។ ប្រជាពលរដ្ឋដែលនៅអមសងខាងផ្លូវរថភ្លើងបានយល់ព្រមសហការជាមួយអាជ្ញាធរក្នុងការរុះរើយ៉ាប ឬសំណង់ផ្សេងៗនៅលើប្រឡាយនោះចេញ។ បើតាមលោក លីដា ការស្តារប្រឡាយមេនេះធ្វើចាប់ពីវត្តពោធិ៍ចិនតុងក្នុងភូមិប៉ប្រកខាងជើង បុកទៅរហូតដល់ព្រំប្រទល់ខណ្ឌសែនសុខ ដើម្បីបង្ហូរទឹកទៅក្នុងបឹងទំនប់កប់ស្រូវ។
លោកថ្លែងថា៖ «ពីមុនយើងដាក់សាឡង់អេស្កាវាទ័រចូលអត់បានទេ ប៉ុន្តែឥឡូវពលរដ្ឋគាត់សហការទៅ យើងបានកាយហើយ។ ខ្ញុំកាយឱ្យទៅជាទំហំប្រឡាយហ្នឹងប្រហែល ២០ ម៉ែត្រហើយការកាយជំហានដំបូង ប្រហែលជាង ១ គីឡូម៉ែត្រ»។
លោក ប៉ាង លីដា បញ្ជាក់ថា អាជ្ញាធរខណ្ឌពោធិ៍សែនជ័យត្រូវតែធ្វើការស្តារប្រឡាយមេនេះឱ្យបានជោគជ័យ ដើម្បីរំដោះជំនន់ទឹកភ្លៀង ឬក៏ទឹកលូចេញពីតំបន់នោះ។ អាជ្ញាធរខណ្ឌបានឱ្យសាឡង់ដាក់អេស្កាវ៉ាទ័រចូលទៅកាយពង្វាងដោយធ្វើការយកភក់ចេញបានមួយសារួចហើយ ប៉ុន្តែយ៉ាងណានៅមិនទាន់កាយបានស៊ីជម្រៅនៅឡើយ ព្រោះពលរដ្ឋបានចាក់អាចម៍ដីធ្វើឱ្យគោកយូរឆ្នាំមកហើយ។
លោកថ្លែងថា៖ «ខណ្ឌពោធិ៍សែនជ័យ តំបន់ដែលមានការលិចលង់ក្នុងរយៈពេលយូរគឺនៅទីតាំងហ្នឹង ភូមិប៉ប្រកខាងជើងហ្នឹង ដែលមានប្រឡាយអមផ្លូវរថភ្លើងជាប្រឡាយមេរបស់សាលារាជធានីភ្នំពេញហើយកន្លងមកប្រឡាយនោះត្រូវបានប្រជាពលរដ្ឋគាត់ចេះតែរំកិលចូលមកលើប្រឡាយនៅលើលូ»។
លោក ប្រាក់ សំណាង ពលរដ្ឋម្នាក់ដែលរស់នៅភូមិប៉ប្រកខាងជើង ថ្លែងប្រាប់ភ្នំពេញប៉ុស្តិ៍នៅថ្ងៃទី ១៩ ខែសីហាថា អាជ្ញាធរបានចុះមកសម្របសម្រួល និងបានជូនដំណឹងមុនបានត្រឹមត្រូវ ដូចច្នេះការស្តារប្រឡាយនេះក្នុងនាមពលរដ្ឋគួរតែមានការចូលរួម ដើម្បីឱ្យបរិស្ថានស្អាតល្អ និងលែងមានទឹកលិចបន្តទៀតដូចរាល់ឆ្នាំ។
លោកថ្លែងថា៖ «ការចុះមកធ្វើការងាររបស់អាជ្ញាធរ គឺមានភាពត្រឹមត្រូវ ព្រោះគាត់សុទ្ធតែបានជូនដំណឹងជាមុនហើយបានពន្យល់ណែនាំពីបញ្ហាទឹកលិចទៀតផង។ ខ្ញុំយល់ព្រមចំពោះការចុះស្តារប្រឡាយនេះ ហើយខ្ញុំសង្ឃឹមថា ក្រោយពេលស្តារនឹងមិនមានការលិចលង់ទៀតទេ។ ធម្មតាវាមានការប៉ះពាល់ធ្វើឱ្យយើងមានការអន់ចិត្តខ្លះហើយ ប៉ុន្តែខ្ញុំក៏ដឹងច្បាស់ថា ការរំកិលចូលលើដីប្រឡាយ ក៏មិនមែនជារឿងត្រឹមត្រូវដែរ»៕