.jpg)
លោក ណុប ដារ៉ា អភិបាលរងខេត្តកណ្តាល ដឹកនាំកិច្ចប្រជុំកាលពីម្សិលមិញ។ រូបថត រដ្ឋបាលខេត្ត
កណ្តាលៈ អាជ្ញាធរខេត្តកណ្តាល បានបើកកិច្ចប្រជុំ ដោយបានកំណត់ឱ្យរៀបចំដាក់អ្នកសង្ស័យ មានផ្ទុកមេរោគកូវីដ ១៩ បំប្លែងថ្មី ឱ្យនៅដាច់ដោយឡែក ពីបុគ្គលធ្វើចត្តាឡីស័កផ្សេងទៀត និងត្រូវរៀបចំផែនការសកម្មភាព ក្នុងការគ្រប់គ្រងការនាំចូលជំងឺកូវីដ ១៩ នៅតាមច្រកព្រំដែនគោក និងព្រំដែនទឹក ដើម្បីធានាប្រសិទ្ធភាពក្នុងការទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩។ នេះបើតាមរដ្ឋបាលខេត្តកណ្តាល។
លោក ណុប ដារ៉ា អភិបាលរងខេត្តកណ្តាល កាលពីរសៀលថ្ងៃទី ១៩ ខែ សីហា ឆ្នាំ ២០២១ បានដឹកនាំកិច្ចប្រជុំអនុគណៈកម្មការគ្រប់គ្រងច្រកទ្វារចេញ-ចូលប្រទេស ការធ្វើចត្តាឡីស័ក និងការពង្រឹងការអនុវត្តច្បាប់កូវីដ ១៩ ជាមួយមន្ទីរជំនាញ អង្គភាពពាក់ព័ន្ធ និងរដ្ឋបាលក្រុង-ស្រុក ទាំង ១១ តាមប្រព័ន្ធ (Video Zoom)។
លោក ណុប ដារ៉ា បានបញ្ជាក់ថា អនុគណៈកម្មការ គ្រប់គ្រងច្រកទ្វារចេញ-ចូលប្រទេស ការធ្វើចត្តាឡីស័ក និងការពង្រឹងការអនុវត្តច្បាប់កូវីដ ១៩ មានភារកិច្ចរៀបចំកន្លែងធ្វើចត្តាឡីស័កឱ្យបានសមស្របទៅតាមស្ថានភាពវិវត្តនៃជំងឺកូវីដ ១៩ ដោយត្រូវរៀបចំដាក់អ្នកសង្ស័យថា ផ្ទុកមេរោគកូវីដ ១៩ បំប្លែងខ្លួនថ្មី ឱ្យនៅដាច់ដោយឡែក ពីបុគ្គលធ្វើចត្តាឡីស័កផ្សេងទៀត។
គ្រប់គ្រងការធ្វើចត្តាឡីស័ក ត្រូវធានាឱ្យបាននូវការអនុវត្តយ៉ាងម៉ឺងម៉ាត់ និងមានប្រសិទ្ធភាពនូវវិធានការធ្វើចត្តាឡីស័ក។
លោកបញ្ជាក់ថា៖ «ត្រូវរៀបចំផែនការសកម្មភាព ក្នុងការគ្រប់គ្រងការនាំចូលជំងឺកូវីដ ១៩ នៅតាមច្រកព្រំដែនគោក និងព្រំដែនទឹក ដើម្បីធានាប្រសិទ្ធភាពក្នុងការប្រយុទ្ធ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩។ ត្រួតពិនិត្យការអនុវត្តពិន័យអន្តការណ៍ ចំពោះបុគ្គលមិនគោរព ដោយចេតនា នូវវិធានការរដ្ឋបាលរបស់រាជរដ្ឋាភិបាល និងរដ្ឋបាលខេត្ត ដែលបានដាក់ចេញ ក្នុងគោលបំណងទប់ស្កាត់ការឆ្លងរាលដាលជំងឺកូវីដ ១៩»។
លោក ណុប ដារ៉ា ក៏បានស្នើដល់អាជ្ញាធរស្រុក ដែលពាក់ព័ន្ធតាមខ្សែបន្ទាត់ព្រំដែន ត្រូវពង្រឹងការអនុវត្តច្បាប់ឱ្យបានម៉ឺងម៉ាត់ ចំពោះអ្នកលួចឆ្លងដែនខុសច្បាប់ និងរៀបចំមណ្ឌលចត្តាឡីស័ក មណ្ឌលព្យាបាលឱ្យបានត្រឹមត្រូវតាមស្តង់ដា។
លើសពីនេះលោកបានស្នើឱ្យរដ្ឋបាលក្រុង-ស្រុក ទាំង ១១ នៃខេត្តកណ្តាល ត្រូវបន្តផ្សព្វផ្សាយច្បាប់កូវីដ ១៩ ជូនដល់ប្រជាពលរដ្ឋឱ្យដល់តាមខ្នងផ្ទះ និងត្រូវពង្រឹងវិធានការរដ្ឋបាលឱ្យបានល្អផងដែរ៕
