ព្រៃវែងៈ រដ្ឋបាលខេត្តព្រៃវែង នៅថ្ងៃទី ១៩ ខែសីហា ឆ្នាំ ២០២១ បានប្រកាសពីការបន្តរកឃើញ ករណីអ្នកវិជ្ជមានជំងឺកូវីដ ១៩ ចំនួន ៤៤ នាក់បន្ថែមទៀត និងជាសះស្បើយចំនួន ៦៣ នាក់ នៅក្នុងមូលដ្ឋានក្រុង-ស្រុកចំនួន ៩ ដែលធ្វើឱ្យចំនួនអ្នកឆ្លងជំងឺកូវីដសរុបក្នុងខេត្តនេះកើនឡើងដល់ ៥ ៤៣១ នាក់ និងស្លាប់ ១០២ នាក់។
ក្រុង-ស្រុកទាំង ៩ ដែលបន្តរកឃើញអ្នកវិជ្ជមានជំងឺកូវីដបន្ថែមទៀតនេះ មានក្រុងព្រៃវែង ចំនួន ១ នាក់ ស្រុកពារាំង ចំនួន ១៨ នាក់ ស្រុកពាមរក៍ ចំនួន ៨ នាក់ ស្រុកមេសាង ចំនួន ៨ នាក់ ស្រុកកំចាយមារ ចំនួន ៣ នាក់ស្រុកស្វាយអន្ទរ ចំនួន ២ នាក់ ស្រុកបាភ្នំ ចំនួន ១ នាក់ ស្រុកព្រះស្តេច ចំនួន ១ នាក់ ស្រុកស៊ីធរកណ្ដាល ចំនួន ១ នាក់ និងម្នាក់ទៀតមកពីខេត្តតាកែវ។
បច្ចុប្បន្ន អ្នកវិជ្ជមានជំងឺកូវីដ ១៩ ទាំង ៤៤ នាក់ កំពុងសម្រាកព្យាបាលនៅមន្ទីរពេទ្យបង្អែកខេត្ត និងតាមមន្ទីរពេទ្យបង្អែកស្រុកនីមួយៗ។
រដ្ឋបាលខេត្តព្រៃវែងបានបញ្ជាក់ថា៖ «ជាថ្មីម្តងទៀត ចំពោះអ្នកដែលបានប្រាស្រ័យទាក់ទង ប៉ះពាល់ដោយផ្ទាល់ ឬប្រយោល ជាមួយបុគ្គលវិជ្ជមានកូវីដ ១៩ ខាងលើ សូមដាក់ខ្លួនដាច់ដោយឡែកតាមដានសុខភាពរយៈពេល ១៤ ថ្ងៃ និងរាយការណ៍មកអាជ្ញាធរ ដើម្បីយកសំណាក និងធ្វើចត្តាឡីស័ក»។
ក្រៅពីនេះ ត្រូវបន្តអនុវត្តឱ្យបានខ្ជាប់ខ្ជួននូវវិធានការ ៣ ការពារ គឺត្រូវពាក់ម៉ាស់នៅគ្រប់ទីសាធារណៈ លាងដៃជាមួយសាប៊ូ អាល់កុល ឬ ជែល និងត្រូវរក្សាគម្លាតសុវត្ថិភាព សង្គមចាប់ពី ១ ម៉ែត្រកន្លះឡើងទៅ រួមទាំងត្រូវបន្តអនុវត្ត ៣ កុំ គឺកុំចូលទៅកន្លែងបិទជិតគ្មានខ្យល់ចេញចូល កុំចូលទៅកន្លែងមានមនុស្សច្រើនកុះករ និងកុំប៉ះពាល់គ្នាជាដើម។
គិតត្រឹមថ្ងៃទី ១៩ ខែសីហា ខេត្តព្រៃវែងបានរកឃើញអ្នកវិជ្ជមានជំងឺកូវីដ ១៩ សរុបចំនួន ៥ ៤៣១ នាក់ អ្នកព្យាបាលជាសះស្បើយ ៤ ៧៧១ នាក់កំពុងសម្រាកព្យាបាល ៥៥៨ នាក់ និងស្លាប់សរុបចំនួន ១០២ នាក់៕