.jpg)
លោក សាយ សំអាល់ (ស្តាំ) ក្នុងជំនួបជាមួយឯកអគ្គរដ្ឋទូតកូរ៉េ កាលពីថ្ងៃទី ១៨ សីហា។ រូបថត ក្រសួងបរិស្ថាន
ភ្នំពេញៈ រដ្ឋមន្ដ្រីក្រសួងបរិស្ថាន លោក សាយ សំអាល់ បានបញ្ជាក់ថា ក្រសួងបរិស្ថានគាំទ្រចំពោះសាធារណរដ្ឋកូរ៉េ ក្នុងនាមជាបេក្ខភាពម្ចាស់ផ្ទះនៃកិច្ចប្រជុំលើកទី ២៨ នៃភាគីជាសមាជិកអនុសញ្ញាប្រែប្រួលអាកាសធាតុឆ្នាំ ២០២៣ ខាងមុខនេះ។
លោក សាយ សំអាល់ ថ្លែងបែបនេះក្នុងពេលដែលលោកទទួលជួបជាមួយលោក Park Heung Kyeong ឯកអគ្គរដ្ឋទូតនៃសាធារណរដ្ឋកូរ៉េប្រចាំនៅកម្ពុជា ចូលជួបសម្តែងការគួរសមកាលពីថ្ងៃទី ១៨ ខែសីហា នាទីស្តីការក្រសួងបរិស្ថាន។ នៅក្នុងជំនួបនោះ លោកឯកអគ្គរដ្ឋទូតបានថ្លែងកោតសរសើរកម្ពុជា ជាពិសេសប្រមុខរាជរដ្ឋាភិបាលកម្ពុជា ចំពោះយុទ្ធនាការលើកិច្ចការងារចាក់វ៉ាក់សាំងជូនដល់ប្រជាពលរដ្ឋនៅទូទាំងប្រទេសកម្ពុជា។
លោកឯកអគ្គរដ្ឋទូតបានស្នើសុំនូវកិច្ចគាំទ្រពីកម្ពុជា ដើម្បី កូរ៉េ អាចធ្វើជាម្ចាស់ផ្ទះកិច្ចប្រជុំ cop-28 ស្របពេលដែលបណ្តាប្រទេសក្នុងតំបន់អាស៊ី និងកូរ៉េមានការប្តេជ្ញាចិត្តខ្ពស់ក្នុងការដោះស្រាយបញ្ហា និងការផ្តល់នូវថវិកាចំពោះការប្រែប្រួលអាកាសធាតុតាមរយៈមូលនិធិអាកាសធាតុបៃតង (GCF)។
ឆ្លើយតបនឹងសំណើនេះ លោករដ្ឋមន្ត្រី សាយ សំអាល់ បានសម្តែងការគាំទ្រ និងស្វាគមន៍ចំពោះការស្នើសុំដែលនឹងផ្តល់ផលប្រយោជន៍ដល់ប្រទេសទាំង ២ ក្នុងវិស័យបរិស្ថាន និងកសិកម្មក៏ដូចជាទីផ្សារការងារសម្រាប់កម្ពុជា។
លោករដ្ឋមន្ដ្រីថ្លែងថា៖ «ក្រសួងបរិស្ថានគាំទ្រចំពោះសាធារណរដ្ឋកូរ៉េ ក្នុងនាមជាបេក្ខភាពម្ចាស់ផ្ទះ នៃកិច្ចប្រជុំលើកទី ២៨ នៃភាគីជាសមាជិកអនុសញ្ញាប្រែប្រួលអាកាសធាតុឆ្នាំ ២០២៣ ខាងមុខនេះ»។
ជាមួយគ្នានេះលោក សាយ សំអាល់ ក៏បានស្នើសុំឱ្យកូរ៉េបន្តជំរុញបច្ចេកទេសលើវិស័យកសិកម្មដែលបន្ស៊ីទៅនឹងការប្រែប្រួលអាកាសធាតុ ដូចពូជស្រូវ និងពូជដំណាំជាដើម។
លោកឯកអគ្គរដ្ឋទូតក៏បានបង្ហាញនូវការពង្រីកវិសាលភាពបន្ថែមទៅលើគម្រោង ODA (Official Development Assistant) ដែលបានគាំទ្រកិច្ចសហប្រតិបត្តិការក្នុងការបណ្តុះបណ្តាលធនធានមនុស្សលើវិស័យផ្សេងៗជាមួយកម្ពុជា និងបានស្នើសុំឱ្យកម្ពុជាគាំទ្រផងដែរដល់ក្រុមហ៊ុនវិនិយោគកូរ៉េដែលមានបំណងមកដាំឫស្សីក្នុងពេលឆាប់ៗនេះ។
លោក Park Heung kyeong ថ្លែងកាលពីកិច្ចប្រជុំកំពូល P4G (Partnering for Green Growth and the Global Goals 2030) លើកទី ២ កាលពីថ្ងៃទី ៣០ និង ៣១ ខែឧសភា ឆ្នាំ ២០២១ នេះថាប្រទេសកម្ពុជាត្រូវបានផ្តល់ជូននូវមូលដ្ឋានធនធានធម្មជាតិដ៏សម្បូរបែបដែលជាគន្លឹះសម្រាប់ សន្តិសុខស្បៀង និងការចិញ្ចឹមជីវិតរបស់ប្រជាជន ប៉ុន្តែត្រូវបានគំរាមកំហែងដោយការប្រែប្រួលអាកាសធាតុ។
លោកថ្លែងថា ដើម្បីឆ្លើយតបទៅនឹងកិច្ចខិតខំប្រឹងប្រែងជាសកលក្នុងការដោះស្រាយការប្រែប្រួលអាកាសធាតុ សាធារណរដ្ឋកូរ៉េ បានប្រកាសនូវផែនការមហិច្ឆតារបស់ខ្លួន ដើម្បីសម្រេចគោលដៅនៃអព្យាក្រឹតភាពកាបូនត្រឹមឆ្នាំ ២០៥០។ យោងតាមសេចក្តីប្រកាសកាលពីឆ្នាំមុនរបស់ដំណោះស្រាយសភាដែលបានដាក់ចេញផែនការដ៏ធំមួយសម្រាប់ការដោះស្រាយការប្រែប្រួលអាកាសធាតុ រដ្ឋាភិបាលកូរ៉េមានគម្រោងវិនិយោគ ៦២ ពាន់លានដុល្លារក្នុងគម្រោងរយៈពេលខ្លី និងរយៈពេលវែង ដើម្បីជួយស្តារសេដ្ឋកិច្ចឡើងវិញពីការធ្លាក់ចុះ ដែលបណ្តាលមកពីជំងឺកូវីដ ១៩។
លោកបានឱ្យដឹងថា ផែនការមួយចំនួនរួមមានការបំប្លែងឧស្សាហកម្ម ដែលពឹងផ្អែកខ្លាំងលើកាបូនភាគច្រើននៅក្នុងប្រទេសឱ្យទៅជាប្រព័ន្ធកាបូនទាប និងការជំរុញការប្រើប្រាស់ប្រភពថាមពលមិនមែនហ្វូស៊ីលដូចជាថាមពលពន្លឺព្រះអាទិត្យ ខ្យល់ និងថាមពលវារីអគ្គិសនី៕
