.jpg)
សាខាកាកបាទក្រហមកម្ពុជាខេត្តត្បូងឃ្មុំ បើកយុទ្ធនាការអប់រំ និងផ្សព្វផ្សាយ អំពីសុខភាពផ្លូវចិត្តក្នុងបរិបទជំងឺកូវីដ ១៩ កាលពីម្សិលមិញ។ រូបថត CRC
ភ្នំពេញៈ សាខាកាកបាទក្រហមកម្ពុជា ខេត្តត្បូងឃ្មុំ បានបើកយុទ្ធនាការអប់រំ និងផ្សព្វផ្សាយ អំពីសុខភាពផ្លូវចិត្ត ចិត្តសាស្ត្រសង្គម និងភាពទទួលខុសត្រូវ របស់សហគមន៍ក្នុងបរិបទជំងឺកូវីដ ១៩ ដល់ប្រជាពលរដ្ឋជាង ២ ០០០ គ្រួសារ ដែលមានពលរដ្ឋសរុប ៧ ១៣៨ នាក់ ស្ថិតនៅក្នុងភូមិចំនួន ១០ ឃុំចំនួន ៥ នៃស្រុកត្បូងឃ្មុំរយ:ពេល ៥ ថ្ងៃ ចាប់ពីថ្ងៃទី ១៤ ដល់ ១៨ ខែសីហាកន្លងមក។
យុទ្ធនាការនេះបានធ្វើឡើងក្នុងគោលបំណងផ្សព្វផ្សាយជូនដល់ប្រជាពលរដ្ឋឱ្យបន្តអនុវត្តឱ្យបានខ្ជាប់ខ្ជួនពីវិធានការទប់ស្កាត់ និងការពារជំងឺកូវីដ ១៩ របស់លោកនាយករដ្ឋមន្ត្រី ហ៊ុន សែន។
យោងតាមរបាយការណ៍របស់កាកបាទក្រហមប្រចាំខេត្តត្បូងឃ្មុំ បានឱ្យដឹងថា ក្នុងយុទ្ធនាការនេះក៏មានការចុះសាកសួរពីអារម្មណ៍ផ្លូវចិត្ត និងសំណូមពររបស់ប្រជាពលរដ្ឋ ដើម្បីធ្វើការប៉ាន់ប្រមាណពីតម្រូវការជាក់ស្ដែងរបស់សហគមន៍ស្តីពីសុខភាពផ្លូវចិត្ត ចិត្តសាស្ត្រសង្គម ការចូលរួម និងការទទួលខុសត្រូវរបស់សហគមន៍ក្នុងបរិបទជំងឺកូវីដ ១៩។
ក្នុងយុទ្ធនាការនោះដែរ ក៏មានការចែកនូវម៉ាស់ ខិត្តប័ណ្ណអប់រំ និងមានចាក់ជាសារសំឡេងអប់រំពីវិធានការ ទប់ស្កាត់ និងការពារជំងឺកូវីដ ១៩ គឺអនុវត្តតាមប្រសាសន៍ណែនាំ ៣ការពារ ៣កុំ និង ២ចូលរួមរបស់ប្រមុខរាជរដ្ឋាភិបាល។
យុទ្ធនាការនេះបានប្រើប្រាស់ ម៉ាស់ចំនួន ១០ ប្រអប់ និងអាល់កុល ១៥ លីត្រ ព្រមទាំងបានចែកខិត្តប័ណ្ណ៣ការពារ ៣កុំ ចំនួន ៣០០ សន្លឹក វិធីទប់ស្កាត់ជំងឺកូវីដ ១៩ ខ្នាត A4 ចំនួន ៥០០ សន្លឹក វិធីទប់ស្កាត់កូវីដ ១៩ ផ្ទាំង ៣០០ ផ្ទាំង ជូនប្រជាពលរដ្ឋដែលបានចូលរួមផងដែរ។
គួរបញ្ជាក់ផងដែរថា នៅព្រឹកថ្ងៃទី ១៦ ខែសីហាកន្លងមក ក្រសួងសុខាភិបាល បានប្រកាសបើកដំណើរការយុទ្ធនាការជាតិ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩» ដែលជាវិធានការបន្ថែម ដើម្បីទប់ស្កាត់ការឆ្លងរីករាលដាល ជំងឺកូវីដ ១៩ នៅទូទាំងប្រទេស។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅក្នុងពិធីបើកយុទ្ធនាការនោះថា៖ «ការអប់រំផ្សព្វផ្សាយ និងបណ្តុះបណ្តាលឱ្យប្រជាពលរដ្ឋមានការយល់ដឹងពីគ្រោះថ្នាក់នៃជំងឺកូវីដ និងចេះទទួលខុសត្រូវក្នុងការការពារខ្លួនឯង គ្រួសារ និងសហគមន៍ ពិតជាមានសារៈសំខាន់ណាស់ ហើយយើងបានធ្វើការងារនេះកន្លងមកហើយ ដែលធ្វើឱ្យយើងអាចទប់ស្កាត់បាននូវការចម្លងចូលក្នុងសហគមន៍នាពេលកន្លងមក»៕
