បាត់ដំបងៈ ក្រុមការងារ លោកនាយករដ្ឋមន្ត្រី ហ៊ុន សែន និងអាជ្ញាធរខេត្តបាត់ដំបងកំពុងបន្តចុះពិនិត្យទីតាំងចំការមៀនប៉ៃលិន (ផ្លែតាង៉ែន) ផ្ទាល់ ដើម្បីប្រមូលទិញនូវមៀនប៉ៃលិន ដែលកសិកររងផលប៉ះពាល់ ដោយសាររាំងស្ទះក្នុងការនាំចេញនៅទីតាំងចំការក្នុងស្រុករតនមណ្ឌល ខេត្តបាត់ដំបង។
ក្រុមការងាររបស់លោកនាយករដ្ឋមន្ត្រី ដឹកនាំដោយលោក ហ៊ីង ប៊ុនហៀង មេបញ្ជាការនៃបញ្ជាការដ្ឋានអង្គរក្ស និងជានាយករងខុទ្ទកាល័យលោក ហ៊ុន សែន សហការជាមួយរដ្ឋបាលខេត្តបាត់ដំបង ដែលដឹកនាំដោយ លោក ងួន រតនៈ អភិបាលនៃគណៈអភិបាលខេត្តបាត់ដំបងកាលពីថ្ងៃទី ១៩ ខែសីហា បានអញ្ជើញចុះពិនិត្យទីតាំងចំការមៀនប៉ៃលិនផ្ទាល់ នៅឃុំរស្មីសង្ហា ស្រុករតនៈមណ្ឌល ដើម្បីប្រមូលទិញមៀនប៉ៃលិន ដែលកសិកររងផលប៉ះពាល់ដោយសារតែរាំងស្ទះក្នុងការនាំចេញ។ នេះបើតាមរដ្ឋបាលខេត្តបាត់ដំបង។
ការប្រមូលទិញមៀនរបស់កសិករនេះ ធ្វើឡើងតាមអនុសាសន៍របស់លោកនាយករដ្ឋមន្ដ្រីដោយឱ្យក្រុមការងាររបស់លោកសហការជាមួយអាជ្ញាធរខេត្ត ប្រមូលទិញ មៀនប៉ៃលិនរបស់កសិករ នៅតាមបណ្ដាខេត្តជាប់ព្រំដែន កម្ពុជា-ថៃ ដែលកំពុងមានការរាំងស្ទះក្នុងការនាំចេញទៅក្រៅប្រទេស ដែលបណ្ដាលមកពីការឆ្លងរីករាលដាលនៃជំងឺកូវីដ ១៩ នៅតាមព្រំដែនប្រទេសជិតខាង។
លោក ងួន រតនៈ អភិបាលនៃគណៈអភិបាលខេត្តបាត់ដំបងបានមានប្រសាសន៍ថា ដើម្បីឱ្យសម្រេចបានជោគជ័យក្នុងការប្រមូលទិញផ្លែតាង៉ែន តាមការណែនាំពីលោកនាយករដ្ឋមន្ត្រី រដ្ឋបាលខេត្តបាត់ដំបង បានចូលរួមសហការជាមួយក្រុមការងារលោកនាយករដ្ឋមន្ត្រី ហ៊ុន សែន ដោយបានណែនាំដល់រដ្ឋបាលស្រុកទាំង ៦ របស់ខេត្តបាត់ដំបង ដែលមានដាំដំណាំផ្លែមៀនប៉ៃលិន ឬផ្លែតាង៉ែន គឺស្រុកសំពៅលូន ភ្នំព្រឹក កំរៀង សំឡូត រតនៈមណ្ឌល និងស្រុកបាណន់ ព្រមទាំងស្រុកមួយចំនួនទៀត ក្នុងការជូនដំណឹងដល់កសិករក្នុងមូលដ្ឋានរបស់ខ្លួនឱ្យបានដឹង។
លោក ហ៊ីង ប៊ុនហៀង បានមានប្រសាសន៍ក្នុងពេលចុះទៅប្រមូលទិញផ្លែមៀននេះថា សម្រាប់មៀនប៉ៃលិន (ផ្លែតាង៉ែន) នេះ គឺនឹងយកទៅចែកជូនដល់កងទ័ព នគរបាល កងរាជអាវុធហត្ថ គ្រូពេទ្យ អ្នកជំងឺ និងពលរដ្ឋដែលកំពុងធ្វើចត្តាឡីស័ក និងដើម្បីជួយរំលែកការលំបាករបស់ប្រជាកសិករកុំឱ្យខាតបង់ច្រើនពេក ហើយការចុះប្រមូលទិញនេះមិនទាន់កំណត់ពេលវេលាថា នឹងត្រូវបញ្ចប់នៅពេលណានោះទេ ពោលគឺនៅតែបន្តប្រមូលទិញជាបន្តបន្ទាប់ទៀត ។
សូមបញ្ជាក់ថា តាមរយៈនៃការចុះទិញផ្លែតាង៉ែនរបស់ក្រុមការងារ គឺបានកំណត់យកតម្លៃព្រមព្រៀងគ្នានៅនឹងចម្ការផ្ទាល់ គឺ ១ ៨០០ រៀល ក្នុង ១ គីឡូក្រាម។
ប៉ុន្តែបើដឹកទៅដល់ទីតាំងនៅទីលានបាល់ទាត់វាលបែកចាន ក្រុងបាត់ដំបង មានតម្លៃ ២ ៥០០ រៀល ក្នុង ១ គីឡូក្រាម តែក្នុងនោះផ្លែតាង៉ែនទាំងអស់ត្រូវបានកាត់ឱ្យបានស្អាតត្រឹមត្រូវដូចការវេចខ្ចប់សម្រាប់យកទៅលក់លើទីផ្សារ និងការនាំចេញផងដែរ៕