.jpg)
ទីស្ដីការក្រសួងសាធារណការ។ រូបថត ក្រសួងសាធារណការ
ក្រសួងសាធារណការ និងដឹកជញ្ជូនបានរៀបចំនូវមណ្ឌលចត្តាឡីស័ក ដែលស្ថិតនៅក្នុងបរិវេណទីស្ដីការក្រសួងតែម្តង ក្នុងគោលបំណងជួយសម្រួលបន្ទុកជូនបុគ្គលិកមន្ត្រីរាជការ និងបុគ្គលិកជាប់កិច្ចសន្យាក្រោមឱវាទក្រសួងទាំងអស់ ដែលមានការជាប់ពាក់ព័ន្ធជាមួយអ្នកវិជ្ជមានកូវីដ ១៩ ជាយថាហេតុណាមួយ ហើយពុំមានលទ្ធភាពគ្រប់គ្រាន់ និងទីកន្លែងសមរម្យសម្រាប់ការធ្វើចត្តាឡីស័ក នៅតាមគេហដ្ឋានដែលខ្លួនកំពុងរស់នៅ។
យោងតាមសេចក្តីជូនដំណឹងរបស់ក្រសួងនៅថ្ងៃទី ១៩ ខែសីហា បានឱ្យដឹងថា ក្រសួងបានរៀបចំនូវមណ្ឌលចត្តាឡីស័កនេះ យ៉ាងត្រឹមត្រូវតាមគោលការណ៍ណែនាំរបស់ក្រសួងសុខាភិបាល ដែលមានបំពាក់គ្រែស្នាក់នៅចំនួន ៥០ គ្រែ មានបណ្ដាញទឹកស្អាត អគ្គិសនី បន្ទប់អនាម័យសមរម្យ និងការផ្ដល់ជូនអាហារ ០៣ ពេលផងដែរ។
ក្រសួងបានបញ្ជាក់ថា៖ «ក្រសួងផ្តល់កន្លែងធ្វើចត្តាឡីស័ក និងរួមមានផ្តល់អាហារ ព្រឹក ថ្ងៃ និងល្ងាចផងដែរ ព្រមទាំងផ្ដល់ជូនការធ្វើតេស្តរហ័ស (Rapid Test) ដល់អ្នកធ្វើចត្តាឡីស័កតាមពេលវេលាដែលកំណត់ទៀងទាត់ទៀតផង»។
សេចក្តីជូនដំណឹងបានបន្ថែមថា ក្នុងករណី បុគ្គលិក មន្ត្រីរាជការ និងបុគ្គលិកជាប់កិច្ចសន្យាក្រោមឱវាទក្រសួង មានការសង្ស័យថាខ្លួនមានការជាប់ពាក់ព័ន្ធដោយផ្ទាល់ ឬដោយប្រយោលជាមួយនឹងអ្នកវិជ្ជមានកូវីដ ១៩ ហើយមានតម្រូវការប្រើប្រាស់មណ្ឌលចត្តាឡីស័កក្រសួង អ្នកទាំងនោះអាចទាក់ទងមន្ត្រីទទួលបន្ទុកការងារនេះបាន៕
