ភ្នំពេញៈ តំណាងអង្គការសុខភាពពិភពលោក (WHO) ប្រចាំកម្ពុជា លោកស្រី លី អៃឡែន បានបង្ហាញពីការបារម្ភចំពោះការឆ្លងរាតត្បាតនៃមេរោគកូវីដបំប្លែងថ្មីប្រភេទដែលតា (Delta) ដែលវាមានកម្រិតឆ្លងខ្លាំង និងលឿន ដែលមេរោគនេះបាននិងកំពុងតែកើតមាននៅក្នុងប្រទេសកម្ពុជាក្នុងសហគមន៍ ដោយឆ្លងចូលតាមរយៈពលករ។
លោកស្រីបានលើកឡើងដូចនេះ ក្នុងពេលចុះយកថវិកា និងអំណោយគ្រឿងឧបភោគបរិភោគរបស់លោក នាយករដ្ឋមន្ត្រី ហ៊ុន សែន ជូនលោកយាយអាយុ ១០៨ ឆ្នាំនៅខេត្តរតនគិរី នាថ្ងៃទី ២០ ខែសីហានេះ ជាមួយនឹងលោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស។
លោកស្រីមានប្រសាសន៍ថា៖ «វាជាដំណឹងដែលអាក្រក់ ឬដំណឹងមិនល្អដែលថាមេរោគកូវីដ ១៩ កំពុងនៅជាមួយយើង ពិសេសមេរោគប្រភេទដែលតានៅពេលនេះ។ ចំណុចពីរដែលមានតួនាទីសំខាន់ក្នុងការបញ្ឈប់ការរាតត្បាតនូវជំងឺកូវីដ ១៩ នេះគឺការចាក់វ៉ាក់សាំងកូវីដ ១៩ និងការអនុវត្តនូវវិធានការ អន្តរាគមន៍ដែលមិនមែនជាឱសថដែលយើងត្រូវតែធ្វើឱ្យមានប្រសិទ្ធភាព»។
លោកស្រី លី អៃឡែន បានបន្តថា ជាការពិតណាស់ប្រសិទ្ធភាពសម្រាប់ដំណើរការចាក់វ៉ាក់សាំងកូវីដ ១៩ នៅក្នុងប្រទេសកម្ពុជា គឺរាជរដ្ឋាភិបាលកម្ពុជាបានធ្វើបានយ៉ាងល្អ លឿន និងមានប្រសិទ្ធភាព។
លោកស្រីបានបញ្ជាក់ទៀតថា រាជរដ្ឋាភិបាលកម្ពុជាបានផ្តោតទៅលើក្រុមប្រជាជន ដែលងាយរងគ្រោះ និងក្រុមដែលប្រឈមខ្ពស់ ដូចជាបុគ្គលិកសុខាភិបាល មនុស្សវ័យចាស់ និងអ្នកដែលមានជំងឺប្រចាំកាយផ្សេងៗជាដើម។
លោកស្រី លី អៃឡែន បានបន្តថា៖ «ដូចនេះ ការធ្វើបែបនេះទៅដល់ក្រុមដែលងាយរងគ្រោះ ទោះបីជាមានការរាតត្បាតជំងឺកូវីដ ១៩ នៅក្នុងសហគមន៍នោះក៏ដោយ ហើយនៅតែមានអ្នកឆ្លងក៏ដោយ តែយើងនឹងឃើញ ពីការកាត់បន្ថយនូវការឈឺធ្ងន់ធ្ងរ ការសម្រាកពេទ្យ និងកាត់បន្ថយការស្លាប់ផងដែរ»។
តំណាងអង្គការសុខភាពពិភពលោកប្រចាំកម្ពុជារូបនេះបានបន្ថែមថា លោកស្រីមានភាពជឿជាក់ខ្លាំងលើដំណើរការយុទ្ធនាការចាក់វ៉ាក់សាំងក្នុងប្រទេសកម្ពុជានាពេលបច្ចុប្បន្ន ប៉ុន្តែលោកស្រីនៅតែមានការបារម្ភទៅនឹងការអនុវត្តវិធានការអន្តរាគមន៍ដែលមិនមែនជាឱសថ។
លោកស្រីបានធ្វើការពន្យល់ថា៖ «ប្រសិនបើយើងមានការបន្ធូរបន្ថយ ឬមិនចូលរួមក្នុងការអនុវត្តវិធានការ អន្តរាគមន៍ដែលមិនមែនជាឱសថនេះ ឬមានការបន្ធូរបន្ថយលឿនពេក ឆាប់ពេក ពេលនោះយើងនឹងអាចមើលឃើញពីការផ្ទុះឡើងវិញនៃការរាតត្បាតជំងឺកូវីដ ១៩ ម្តងទៀត»។
លោកស្រី លី អៃឡែន បានធ្វើការអំពាវនាវទៅដល់ប្រជាពលរដ្ឋទាំងអស់ មិនត្រូវមានការបន្ធូរបន្ថយនូវការអនុវត្តវិធានការការពារសុខភាពដែលដាក់ចេញដោយក្រសួងសុខាភិបាល និងរាជរដ្ឋាភិបាលកម្ពុជាឡើយ។
ពេលនេះមិនមែនជាពេលដែលត្រូវបន្ធូរបន្ថយនោះទេ តែជាការចូលរួមអនុវត្តរួមគ្នាឱ្យមានប្រសិទ្ធភាពដូចជា ៣ការពារ និង៣កុំជាដើម។
បើតាមការឱ្យដឹងរបស់លោកស្រី ឱ វណ្ណឌីន មនុស្សដែលមានវ័យពី ១០០ ឆ្នាំឡើង ចំនួនជិត ១០០ នាក់ហើយ ដែលបានទទួលការចាក់វ៉ាក់សាំងកូវីដ ១៩ ដោយក្នុងនោះលោកស្រីបានជួបផ្ទាល់ជាមួយនឹងពួកគាត់បានចំនួន ៦១ នាក់ហើយ និងមានគម្រោងជួបជាមួយនឹងមនុស្សវ័យចាស់នេះចំនួន ១៩ នាក់បន្ថែមទៀត៕