.jpg)
ប្រជាពលរដ្ឋរស់នៅខេត្តសៀមរាបទទួលបានការចាក់វ៉ាក់សាំងការពារជំងឺកូវីដ កាលពីខែកក្កដា។ រូបថត រដ្ឋបាលខេត្ត
សៀមរាបៈ អាជ្ញាធរខេត្តសៀមរាបនឹងបន្តចាក់វ៉ាក់សាំងដូសទី ១ ជូនប្រជាពលរដ្ឋ ដែលរស់នៅក្នុងក្រុងសៀមរាបចាប់ពីថ្ងៃទី ២១ ខែសីហា តទៅ សម្រាប់ប្រជាពលរដ្ឋដែលពុំទាន់បានមកចាក់ទាន់ពេលកំណត់ដោយមូលហេតុមួយចំនួន ដូចជាធ្វើដំណើរទៅក្រៅខេត្ត ឬ កំពុងធ្វើចត្តាឡីស័ក ឬមានបញ្ហាសុខភាពមួយរយៈពេលខ្លី អំឡុងពេលយុទ្ធនាការចាក់វ៉ាក់សាំង។
រដ្ឋបាលខេត្តសៀមរាបបានចេញសេចក្តីជូនដំណឹងនៅថ្ងៃទី ២០ ខែសីហា នេះថា អនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ខេត្តសៀមរាបនឹងរៀបចំផែនការចាក់វ៉ាក់សាំងកូវីដ ១៩ ដូសទី ១ ដល់ប្រជាពលរដ្ឋនៅក្នុងក្រុងសៀមរាបចាប់ពីថ្ងៃទី ២១ ខែសីហា តទៅ។
សេចក្តីជូនដំណឹងបានលើកឡើងថា៖ «ប្រជាពលរដ្ឋទាំងអស់ដែលពុំទាន់បានចាក់វ៉ាក់សាំងកូវីដ ១៩ ដូសទី១ សូមរួសរាន់ទៅចាក់វ៉ាក់សាំងនៅយោធភូមិភាគទី៤ មណ្ឌលសុខភាពគោកចក និងមណ្ឌលសុខភាពជ្រាវ ចាប់ពីថ្ងៃទី ២១ ខែសីហា ពេលព្រឹកចាប់ពី ម៉ោង ០៧:៣០ ដល់ម៉ោង ១១:៣០ នាទី និងពេលរសៀលចាប់ពីម៉ោង ១៣:០០ ដល់ម៉ោង ១៦:០០ នាទី និងត្រូវទំនាក់ទំនងយកបណ្ណចាក់វ៉ាក់សាំងនៅមណ្ឌលចាក់វ៉ាក់សាំងផ្ទាល់»។
ប្រភពដដែលបានបន្តថា អ្នកដែលមកចាក់វ៉ាក់សាំងជំងឺកូវីដ ១៩ ត្រូវមានអត្តសញ្ញាណប័ណ្ណ ឬលិខិតឆ្លងដែន ឬសំបុត្រកំណើត ឬលិខិតបញ្ជាក់ពីអាជ្ញាធរ ហើយត្រូវអនុវត្តឱ្យបានត្រឹមត្រូវ និង ម៉ឺងម៉ាត់បំផុតនូវគោលការណ៍ណែនាំ និងវិធានការនានារបស់រាជរដ្ឋាភិបាល និងក្រសួងសុខាភិបាល និងរក្សាសណ្តាប់ធ្នាប់ របៀបរៀបរយឱ្យបានល្អប្រសើរ៕
