ភ្នំពេញ៖ លោកនាយករដ្ឋមន្រ្តី ហ៊ុន សែន បានលើកឡើងថា នៅក្នុងឆ្នាំ ២០២១ នេះ វិបត្តិកូវីដ១៩ នៅតែបន្តមានការឆ្លងរាតត្បាត ចំណែកការជួញដូរមនុស្សនិងឧក្រិដ្ឋកម្មឆ្លងដែននានា ក៏កំពុងត្រូវបានជនឆ្លៀតឱកាសប្រើគ្រប់មធ្យោបាយដើម្បីទាញយកផលចំណេញពីស្ថានភាពដ៏លំបាកនេះ។
លោក ហ៊ុន សែន បានថ្លែងដូចនេះក្នុងកម្មវិធីអន្តរសាសនាប្រឆាំងការជួញដូរមនុស្សក្រោមប្រធានបទ «សូមពិភពលោករួចផុតពីគ្រោះជំងឺរាតត្បាតកូវីដ១៩ និងអំពើជួញដូរមនុស្ស» នាល្ងាចថ្ងៃទី២០ ខែសីហានេះ ដោយលោកបានបន្ថែមថា វេទិកាអន្តរសាសនាត្រូវតែរៀបចំតាមគន្លងថ្មីដើម្បីក្រើនរំឭកផ្នែកស្មារតីដល់ប្រជាជនគ្រប់ជាតិសាសន៍ និងជំនឿសាសនាក្នុងព្រះរាជាណាចក្រកម្ពុជា ក៏ដូចជាប្រជាជននៅលើពិភពលោក។
លោកបានមានប្រសាសន៍ថា៖ «ត្រូវប្រកាន់ខ្ជាប់នូវស្មារតីមនុស្សធម៌ សន្ដោសប្រណី យកចិត្តទុកដាក់ដល់អាយុជីវិតនិងសេចក្តីថ្លៃថ្នូរនៃមនុស្សជាតិគ្រប់ជាតិសាសន៍ និងជំនឿសាសនា។ ខ្ញុំមានមោទនភាពចំពោះការរក្សាបាននូវភាពសុខដុមរមនានៃគ្រប់ជំនឿសាសនានៅក្នុងប្រទេសកម្ពុជាតាមគ្រប់រយៈកិច្ចសហការយ៉ាងសកម្ម ពិសេសវប្បធម៌ចែករំលែកក្នុងការទទួលខុសត្រូវខ្ពស់ក្នុងគ្រាដ៏លំបាកនេះ»។
លោកនាយករដ្ឋមន្រ្តីបានបន្តថា រាជរដ្ឋាភិបាល បាននិងកំពុងអនុវត្តយ៉ាងសកម្ម តាមរយៈដៃម្ខាងរក្សាការពារសន្តិសុខសណ្ដាប់ធ្នាប់ និងស្ថិរភាពសង្គម ដើម្បីទ្រទ្រង់ជីវភាពប្រជាជន និងរក្សាស្ថិរភាពម៉ាក្រូសេដ្ឋកិច្ច និងដៃម្ខាងទៀត ប្រយុទ្ធប្រឆាំងជំងឺរាតត្បាតសកលកូវីដ១៩ តាមគ្រប់រូបភាព ទាំងការបង្ការទប់ស្កាត់ ការព្យាបាល និងការស្តារនីតិសម្បទាជនរងគ្រោះ និងសហគមន៍ដែលទទួលរងនូវផលប៉ះពាល់។
លោក ហ៊ុន សែន បានបួងសួងផងដែរថា៖ «សូមព្រះបារមីដ៏ស័ក្តិសិទ្ធិនៃព្រះសម្មាសម្ពុទ្ធ ព្រះអាឡោះ ព្រះយេស៊ូគ្រីស្ត និងព្រះគ្រប់សាសនា ព្រមទាំងបារមីវត្ថុស័ក្តិសិទ្ធិលើលោក ប្រទានពរសូមឱ្យពិភពលោករួចផុតពីគ្រោះនៃជំងឺរាតត្បាតកូវីដ១៩ និងអំពើជួញដូរមនុស្ស និងគ្រោះមហន្តរាយទាំងឡាយ ដែលបម្រុងកើតមាន សូមឱ្យធូរស្រាល និងសាបសូន្យបន្តិចម្តងៗចាប់ពីពេលនេះតទៅ»។
គួរបញ្ជាក់ផងដែរថា ជារៀងរាល់ឆ្នាំ ចាប់ពីឆ្នាំ ២០១៧ មក គណៈកម្មាធិការជាតិប្រយុទ្ធប្រឆាំងការជួញដូរមនុស្ស (គ.ជ.ប.ជ.) តែងបានសហការជាមួយក្រសួងធម្មការ និងសាសនា មេដឹកនាំសាសនាធំៗ ក្នុងប្រទេសកម្ពុជា រៀបចំកម្មវិធីអន្តរសាសនាប្រឆាំងការជួញដូរមនុស្ស ក្នុងគោលបំណងបួងសួងឱ្យប្រជាជនកម្ពុជា ក៏ដូចជាប្រជាជនលើពិភពលោក ទទួលបានសេចក្តីសុខ ចៀសផុតពីការរំលោភបំពាន និងអំពើជួញដូរមនុស្ស៕