សមត្ថកិច្ចនគរបាលប្រឆាំងគ្រឿងញៀន នៃអគ្គស្នងការនគរបាលជាតិកំពុងសួរចម្លើយជនសង្ស័យ ២ នាក់ ដែលបានបាញ់តដៃជាមួយសមត្ថកិច្ច ខណៈពេលបង្ក្រាបករណីបទល្មើសគ្រឿងញៀនបានជាង ២៨ គីឡូក្រាម កាលពីថ្ងៃទី១៨ ខែសីហា នៅខណ្ឌជ្រោយចង្វារ និងខណ្ឌដង្កោ រាជធានីភ្នំពេញ។
លោក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន ថ្លែងនៅព្រឹកនេះថា កម្លាំងនគរបាលគ្រឿងញៀនបង្ក្រាបបានជនសង្ស័យ ២នាក់ ពាក់ព័ន្ធបទល្មើសគ្រឿងញៀន កាលពីថ្ងៃទី១៨ ខែសីហា ឆ្នាំ ២០២១ វេលាម៉ោង ១ និង ៥០ នាទីរសៀល។
លោកថា រហូតមកដល់ព្រឹកថ្ងៃទី២១ ខែសីហានេះ សមត្ថកិច្ចកំពុងបន្តនីតិវិធី មិនទាន់បានបញ្ជូនជនសង្ស័យទៅតុលាការនៅឡើយ។
លោកបញ្ជាក់ថា កម្លាំងសមត្ថកិច្ចបានធ្វើការស៊ើបអង្កេត និងស្រាវជ្រាវបង្រ្កាប លើ ២ គោលដៅផ្សេងគ្នាជាបន្តបន្ទាប់ ដោយគោលដៅទី១ នៅបណ្តោយផ្លូវជាតិលេខ ៦A សង្កាត់ព្រែកលាភ ខណ្ឌជ្រោយចង្វារ រាជធានីភ្នំពេញ និងគោលដៅទី២ នៅផ្ទះលេខ ៣២ ផ្លូវ C ស្ថិតក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ»។
លោកថ្លែងថា៖ «ក្នុងអំឡុងពេលកិច្ចប្រតិបត្តិការបង្រ្កាប ជនល្មើសបានធ្វើការតដៃ ដោយបាញ់មកលើកម្លាំងសមត្ថកិច្ច ដែលធ្វើឱ្យសមត្ថកិច្ចត្រូវបាញ់តបត ដើម្បីការពារខ្លួនវិញ និងបានធ្វើឱ្យជនល្មើសទម្លាក់អាវុធប្រគល់ខ្លួនឱ្យសមត្ថកិច្ច»។
បើតាមលោក ឡឹក វណ្ណៈ ក្នុងប្រតិបត្តិការបង្រ្កាបនេះ កម្លាំងសមត្ថកិច្ចបានឃាត់ខ្លួនជនសង្ស័យ ២ នាក់ មាន ឈ្មោះ គីម តាត់ ភេទប្រុស អាយុ ៣៨ឆ្នាំ ជនជាតិ ខ្មែរ និង ឈ្មោះ ប្រាក់ សឺត ភេទប្រុស អាយុ ៥៤ឆ្នាំ ជនជាតិ ថៃ។
សមត្ថកិច្ចបានដកហូត វត្ថុតាងសារធាតុញៀនប្រភេទម៉េតំហ្វេតាមីន (ICE) ចំនួន ២៤ កញ្ចប់ធំ ទម្ងន់ប្រមាណជាង ២៤ គីឡូក្រាម ប្រភេទអ៊ិចស្តាស៊ី (MDMA) ១៤កញ្ចប់ ទម្ងន់ប្រមាណ ៤គីឡូក្រាម ព្រមទាំងសម្ភារចាប់យកមាន រថយន្ត ៤គ្រឿង ទូរស័ព្ទ ៦គ្រឿង អាវុធខ្លី ម៉ាករ៉ូឡូ ១ដើម សម្បកគ្រាប់ ៣គ្រាប់ និងគ្រាប់មិនទាន់បាញ់ ៣គ្រាប់៕