.jpg)
ការអនុវត្តបម្រមគោចរនាពេលកន្លងមក។ រូបថត ភ្នំពេញប៉ុស្តិ៍
ភ្នំពេញៈ សមត្ថកិច្ចបានឃាត់មនុស្សធ្វើការអប់រំនិងពិន័យចំនួន ១ ៨១៥នាក់ និងឃាត់យានយន្ត ៨៨១គ្រឿង ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលកាលពីម្សិលមិញ។ នេះបើតាមការប្រកាសរបស់ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ (គ.អ.ក) នៅថ្ងៃនេះ។
តាមសេចក្តីជូនដំណឹង (គ.អ.ក) នៅព្រឹកថ្ងៃទី ២១ខែសីហានេះបានឱ្យដឹងថា សមត្ថកិច្ចបានឃាត់រថយន្ត ២៥៧ គ្រឿង ម៉ូតូ ៦២៤គ្រឿង និងឃាត់ខ្លួនមនុស្សធ្វើការអប់រំនិងពិន័យចំនួន ១ ៨១៥នាក់ នៅថ្ងៃទី២០ ខែសីហា ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ៨៣៩ករណី ទៅលើទីតាំងសរុបចំនួន ១ ៤៣៩ និងពិន័យជាប្រាក់បានចំនួន ១២ ០០០ ០០០ រៀល៕
