ភ្នំពេញៈ នាយកដ្ឋានព័ត៌មានវិទ្យានៃក្រសួងមហាផ្ទៃប្រកាសឱ្យពលរដ្ឋរាយការណ៍ឱ្យបានរហ័ស បើដឹងពីជនខិលខូចមួយចំនួនប្រើបច្ចេកវិទ្យា DeepFake ក្នុងការប្រព្រឹត្តអំពើអសីលធម៌ ឬអំពើល្មើសផ្សេងៗ។
នាយកដ្ឋានព័ត៌មានវិទ្យានៅរសៀលថ្ងៃទី ២១ ខែសីហានេះ តាមរយៈហ្វេសប៊ុកបានប្រកាសជាថ្មីឱ្យពលរដ្ឋចូលរួមរាយការណ៍ឱ្យបានរហ័សដល់អាជ្ញាធរ បើសិនបានដឹងពីជនខិលខូចមួយចំនួនប្រើបច្ចេកវិទ្យា DeepFake ក្នុងការប្រព្រឹត្តអំពើអសីលធម៌ ឬអំពើល្មើសផ្សេងៗ មានដូចជាការបង្កើតរូបភាព ឬវីដេអូអាសអាភាសដោយបន្លំបញ្ចូលរូបមុខជនរងគ្រោះ ធ្វើការបរិហារកេរ្តិ៍ជាសាធារណៈ ឬគំរាមជនរងគ្រោះឱ្យធ្វើអ្វីមួយតាមការចង់បាន។ បង្កើតរូបភាព ឬវីដេអូ ដែលមានសកម្មភាពអសីលធម៌ ដើម្បីបង្ខូចកិត្តិយសជនរងគ្រោះ និងប្រើប្រាស់រូបភាព វីដេអូ ឬសំឡេង ជនរងគ្រោះ ដើម្បីឆបោកបន្លំផ្ទេរប្រាក់ ឬលួចព័ត៌មានផ្សេងៗ។
លើហ្វេសប៊ុកនាយកដ្ឋានព័ត៌មានវិទ្យាសរសេរថា «សូមប្រើប្រាស់បច្ចេកវិទ្យាតួយ៉ាងកម្មវិធីនៃបច្ចេកវិទ្យា DeepFake ប្រកបដោយសីលធម៌ និងស្របតាមក្រិតក្រមច្បាប់នៃព្រះរាជាណាចក្រកម្ពុជា។ សូមធ្វើការរាយការណ៍ដល់ជនរងគ្រោះ នៅពេលដែលអ្នកបានទទួល ឬឃើញនូវរូបភាព ឬវីដេអូរបស់ជនរងគ្រោះ ឬធ្វើសេចក្តីរាយការណ៍ដល់អាជ្ញាធរមានសមត្ថកិច្ចដែលនៅជិតលោកអ្នក»។
បើតាមនាយកដ្ឋានព័ត៌មានវិទ្យា បច្ចេកវិទ្យា DeepFake បានផ្តល់ទាំងគុណសម្បត្តិ និងគុណវិបត្តិ សម្រាប់អ្នកប្រើប្រាស់ក្នុងនោះ ចំពោះគុណសម្បត្តិ ត្រូវបានប្រើប្រាស់ដោយក្រុមហ៊ុនផលិតភាពយន្តក្នុងការកែតម្រូវសកម្មភាព ឬសំឡេងរបស់តួសម្តែង ដោយពុំចាំបាច់ថតឡើងវិញ។ ប្រើប្រាស់ក្នុងវិស័យសុខាភិបាល ដើម្បីបញ្ចូលរូបភាពអ្នកជំងឺក្នុងសកម្មភាពវីដេអូវះកាត់ជាដើម។
នាយកដ្ឋានព័ត៌មានវិទ្យាសរសេរលើហ្វេសប៊ុកថា «កម្មវិធីនេះក៏ត្រូវប្រើប្រាស់ក្នុងការបង្កើតវីដេអូសិប្បនិម្មិតរបស់គ្រូឧទ្ទេស ក្នុងកម្មវិធីបណ្តុះបណ្តាល (Video Training) ប្រើប្រាស់ក្នុងកម្មវិធីលក់ទំនិញអនឡាញ ដើម្បីអនុញ្ញាតឱ្យអតិថិជនធ្វើការសាកល្បងទំនិញ តួយ៉ាងសម្លៀកបំពាក់ ប្រើប្រាស់ក្នុងគោលបំណងផ្តល់ការកម្សាន្តសប្បាយផ្សេងៗ»។
ចំណែកគុណវិបត្តិវិញត្រូវបានប្រើប្រាស់ដោយជនខិលខូចក្នុងការបន្លំរូបភាព ឬវីដេអូ មួលបង្ខូចកិត្តិយសជនរងគ្រោះ។ ប្រើប្រាស់ក្នុងការបន្លំរូបភាព វីដេអូ និងសំឡេង យកជាមធ្យោបាយឆបោកប្រាក់ បន្លំផ្ទេរប្រាក់ ឬលួចព័ត៌មានផ្សេងៗ និងប្រើប្រាស់ជាមធ្យោបាយក្នុងសកម្មភាពប្រព្រឹត្តបទល្មើសផ្សេងៗផងដែរ។
នាយកដ្ឋានព័ត៌មានវិទ្យារំឭកថា បច្ចេកទេស DeepFake ត្រូវបានស្រាវជ្រាវចាប់តាំងពីអំឡុងឆ្នាំ ១៩៩៧ ដែលដំបូងមានឈ្មោះថា "Video Rewrite Program" រហូតដល់អំឡុងឆ្នាំ ២០១៧ បច្ចេកវិទ្យា DeepFake បានល្បីពេញពិភពលោក និងត្រូវបានបង្កើតជាកម្មវិធីផ្សេងៗ ដោយក្រុមហ៊ុនផលិតកម្មវិធីកុំព្យូទ័រ និងទូរស័ព្ទដៃ (ឧទាហរណ៍៖ កម្មវិធី FakeApp FaceApp FaceSwap DeepFaceLab DeepNude។ល)។
លើសពីនេះនៅឆ្នាំ ២០១៨ អ្នកស្រាវជ្រាវមួយរូបនៅសាកលវិទ្យាល័យកាលីហ្វ័រនីញ៉ាបានចុះផ្សាយលទ្ធផលស្រាវជ្រាវរបស់ខ្លួន ស្តីពីការពង្រីកសមត្ថភាពរបស់បច្ចេកវិទ្យា DeepFake ដែលអាចធ្វើការបន្លំមុខក្នុងសកម្មភាពវីដេអូ និងបញ្ជាលើដងខ្លួនមនុស្សទាំងមូលតែម្តង៕
វីដេអូ៖