បន្ទាយមានជ័យ/សៀមរាប៖ រដ្ឋបាលខេត្តបន្ទាយមានជ័យប្រកាសរកឃើញអ្នកមានវិជ្ជមានជំងឺកូវីដ ១៩ ចំនួន ២១០ នាក់ និងមានករណីជាសះស្បើយ ២៣៤ នាក់ ខណៈខេត្តសៀមរាបមានអ្នកវិជ្ជមានជំងឺកូវីដ ១៩ ចំនួន ៩២ នាក់ និងជាសះស្បើយមាន ១៦៦ នាក់ នៅថ្ងៃទី ២០ ខែសីហា។
យោងតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យនៅថ្ងៃទី ២០ ខែសីហា បង្ហាញថាបានរកឃើញវិជ្ជមានកូវីដ ១៩ ដែលជាករណីឆ្លងនៅក្នុងព្រឹត្តិការណ៍សហគមន៍ ២០ កុម្ភៈ និងពលករវិលត្រឡប់ពីប្រទេសថៃដែលស្ថិតក្នុងការគ្រប់គ្រងរបស់ខេត្តលើបុរស ស្ត្រីជនជាតិខ្មែរចំនួន ២១០ នាក់នៅថ្ងៃទី ២០ ខែសីហា។
ជាមួយគ្នានោះ រដ្ឋបាលខេត្តនេះបានបង្ហាញពីចំនួនអ្នកជាសះស្បើយពីជំងឺកូវីដ ១៩ ចំនួន ២៣៤ នាក់ ដោយយោងតាមលទ្ធផលតេស្តរហ័ស និងមន្ទីរពិសោធន៍ជាតិភ្នំពេញ នៅថ្ងៃទី ១៩ ខែសីហាផងដែរ។
ក្នុងសេចក្តីជូនដំណឹងសរសេរថា «រដ្ឋបាលខេត្តសូមជម្រាបជូនបងប្អូនប្រជាពលរដ្ឋ និងសាធារណជន ដែលបានប៉ះពាល់ដោយផ្ទាល់ សូមរួសរាន់មកជួបក្រុមគ្រូពេទ្យ និងធ្វើចត្តាឡីស័ក ដើម្បីយកសំណាកទៅពិនិត្យ និងអ្នកប៉ះពាល់ដោយប្រយោលជាមួយអ្នកជំងឺទាំង ២១០ នាក់ សូមរួសរាន់ធ្វើចត្តាឡីស័កតាមផ្ទះ ក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត»។
ដោយឡែករដ្ឋបាលខេត្តសៀមរាបបានប្រកាសរកឃើញអ្នកវិជ្ជមានជំងឺកូវីដ ១៩ ចំនួន ៩២ នាក់ ខណៈអ្នកជាសះស្បើយមាន ១៦៦ នាក់។ ក្នុងសេចក្តីជូនដំណឹងនៅថ្ងៃទី ២០ ខែសីហា រដ្ឋបាលខេត្តសៀមរាបបញ្ជាក់ថា អ្នកជាសះស្បើយទាំង ១៦៦ នាក់ ក្រុមគ្រូពេទ្យបានអនុញ្ញាតឱ្យចេញទៅផ្ទះ ដោយត្រូវបន្តធ្វើចត្តាឡីស័ករយៈពេល ១៤ ថ្ងៃទៀត។
គិតត្រឹមថ្ងៃទី ២០ ខែសីហានេះ ខេត្តសៀមរាបមានអ្នកវិជ្ជមានជំងឺកូវីដ ១៩ ចំនួន ៦ ៩២១ នាក់ បានព្យាបាលជាសះស្បើយចំនួន ៥ ២០៧ នាក់ ស្លាប់ ៧៥ នាក់ និង ១ ៦៣៩ នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រិតការខេត្ត វិទ្យាល័យអង្គរ វិទ្យាល័យ ហ៊ុន សែនវត្តស្វាយ វិទ្យាល័យក្រឡាញ់ វិទ្យាល័យចំណេះទូទៅ និងបច្ចេកទេសពួក និងវិទ្យាល័យដំដែក៕