ភ្នំពេញៈ គិតត្រឹមល្ងាចថ្ងៃទី ២១ ខែសីហា ឆ្នាំ ២០២១ នេះ មានលោកតាលោកយាយវ័យចាប់ពី ១០០ ឆ្នាំដល់ ១១៣ ឆ្នាំ ចំនួន ៦៤ នាក់ក្នុងនោះមានលោកយាយចំនួន ៣៩ នាក់បានស្ម័គ្រចិត្តចាក់វ៉ាក់សាំងបង្ការជំងឺកូវីដ ១៩ នៅទូទាំងប្រទេសកម្ពុជា ខណៈត្រឹមថ្ងៃទី ២០ ខែសីហាពលរដ្ឋទូទាំងប្រទេសជាង ៩,៥ លាននាក់បានចាក់វ៉ាក់សាំង។
នេះបើតាមលោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) ថ្លែងឱ្យដឹងក្នុងពេលនាំយកអំណោយ និងថវិការបស់លោកនាយករដ្ឋមន្ដ្រី ហ៊ុន សែន ប្រគល់ជូនដល់លោកយាយវ័យ ១០០ ឆ្នាំ ដែលស្ម័គ្រចិត្ដចាក់វ៉ាក់សាំងបង្ការជំងឺកូវីដ ១៩ នៅស្រុករមាសហែក ខេត្តស្វាយរៀងនាល្ងាចនេះ។
លោកស្រីបានថ្លែងថា៖ «ខ្ញុំសូមគោរពអនុញ្ញាតជម្រាបជូនថា មកដល់ត្រឹមថ្ងៃនេះ (ថ្ងៃទី ២១ ខែសីហា ឆ្នាំ ២០២១) គឺយើងបានជួបលោកតា លោកយាយ ដែលមានវ័យចាប់ពី ១០០ រហូតដល់វ័យ ១១៣ ឆ្នាំគឺយើងបាន ៦៤ នាក់ ហើយក្នុងចំណោម ៦៤ នាក់នេះ គឺចំនួន ៣៩ នាក់ជាស្ដ្រី»។
លោកស្រីបញ្ជាក់ថា៖ «អ្វីដែលជាការកត់សម្គាល់ពួកគាត់ទាំងអស់ គឺស្ម័គ្រចិត្ដទៅចាក់វ៉ាក់សាំងដោយខ្លួនគាត់តែម្ដង ដោយមិនមានអ្នកណាទៅបង្ខិតបង្ខំពួកគាត់ទេ។ ជាក់ស្ដែងដូចលោកយាយនៅទីនេះស្រាប់ គាត់ទារកូនចៅគាត់ទៅចាក់វ៉ាក់សាំងតែម្ដង ដោយគាត់យល់ឃើញថា វ៉ាក់សាំងនេះនឹងជួយដល់សុខភាពរបស់គាត់ ក៏ដូចជាជួយការពារសរីរាង្គរបស់គាត់ឱ្យមានភាពមាំទាំល្អ»៕