.jpg)
វ៉ាក់សាំងស៊ីណូហ្វាម មកដល់ព្រលានយន្តហោះអន្តរជាតិភ្នំពេញ កាលពីថ្ងៃទី ១២ មិថុនា។ ហេង ជីវ័ន
ភ្នំពេញៈ វ៉ាក់សាំងកូវីដ ១៩ ប្រភេទស៊ីណូហ្វាមសរុបចំនួន ៦០ ម៉ឺនដូស នឹងដឹកមកដល់កម្ពុជា ២ ជើងផ្សេងទៀត នៅថ្ងៃទី ២៣ ខែសីហាស្អែកនេះ ក្នុងនោះចំនួន ៥០ ម៉ឺនដូស ត្រូវបានរដ្ឋាភិបាល និងប្រជាជនចិនផ្តល់ជូនក្រសួងការពារជាតិ និងវ៉ាក់សាំំងចំនួន ១០ ម៉ឺនដូសទៀតត្រូវបានសមាគមជាតិកាកបាទក្រហមចិន ជូនដល់កាកបាទក្រហមកម្ពុជា។
យោងតាមក្រសួងការពារជាតិបានឱ្យដឹងថា វ៉ាក់សាំងស៊ីណូហ្វាមចំនួន ៥០ ម៉ឺនដូស នឹងមកដល់អាកាសយានដ្ឋានអន្តរជាតិភ្នំពេញនៅព្រឹកថ្ងៃទី ២៣ ខែសីហា។ សម្រាប់ក្រសួងការពារមានលោក ទៀ បាញ់ រដ្ឋមន្ត្រីក្រសួងការពារជាតិ និងលោក វ៉ាង វិនធាង ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិន ប្រចាំកម្ពុជា នឹងចុះទៅទទួលផ្ទាល់ ហើយវ៉ាក់សាំងចំនួន ១០ ម៉ឺនដូសផ្សេងទៀតនឹងមកដល់នៅរសៀលក្នុងថ្ងៃដដែលផងដែរ។
ចំពោះវ៉ាក់សាំង ១០ ម៉ឺនដូសនេះ គឺជាជំនួយរបស់សមាគមជាតិកាកបាទក្រហមចិន ដែលផ្តល់ជូនកាកបាទក្រហមកម្ពុជា ហើយលោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោក វ៉ាង វិនធាង នឹងចុះទៅធ្វើពិធីប្រគល់ទទួលផងដែរ នៅអាកាសយានដ្ឋានអន្តរជាតិភ្នំពេញ៕
