ភ្នំពេញៈ រដ្ឋាភិបាលចិន និងសមាគមជាតិកាកបាទក្រហមចិនបានផ្ដល់ជំនួយវ៉ាក់សាំងបង្ការជំងឺកូវីដ ១៩ ប្រភេទស៊ីណូហ្វាមសរុប ៦០ ម៉ឺនដូស ដល់ប្រទេសកម្ពុជា ដែលតាមគម្រោងនឹងដឹកតាមជើងយន្តហោះមកដល់រាជធានីភ្នំពេញ នៅថ្ងៃទី ២៣ ខែសីហានេះ។
សមាគមជាតិកាកបាទក្រហមចិន បានផ្តល់ជាជំនួយនូវវ៉ាក់សាំងកូវីដ ១៩ ប្រភេទស៊ីណូហ្វាមចំនួន ១០ ម៉ឺនដូសមកដល់កាកបាទក្រហមកម្ពុជា ទន្ទឹមគ្នានោះដែរ រដ្ឋាភិបាលនិងប្រជាជនចិនក៏បានផ្តល់នូវវ៉ាក់សាំងប្រភេទដូចគ្នានេះចំនួន ៥ ០ម៉ឺនដូស មកដល់រាជរដ្ឋាភិបាលកម្ពុជាតាមរយៈក្រសួងការពារជាតិ។
យោងតាមទូរទស្សន៍ជាតិកម្ពុជា ផ្សាយនៅថ្ងៃទី ២២ ខែសីហា បានឱ្យដឹងថា វ៉ាក់សាំងកូវីដ ១៩ ស៊ីណូហ្វាមចំនួន ១០ ម៉ឺនដូស នឹងដឹកមកដល់កម្ពុជានៅរសៀលថ្ងៃចន្ទ ដែលពិធីប្រគល់និងទទួលអំណោយវ៉ាក់សាំងនេះនឹងប្រព្រឹត្តទៅ ក្រោមអធិបតីភាពលោកស្រី ប៊ុន រ៉ានី ហ៊ុនសែន និងលោក វ៉ាង វិនធាន ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំកម្ពុជា នៅអាកាសយានដ្ឋានអន្ដរជាតិភ្នំពេញ។
ទន្ទឹមនឹងនេះដែរ នៅព្រឹកថ្ងៃទី ២៣ ខែសីហានេះ រដ្ឋមន្រ្តីក្រសួងការពារជាតិ លោក ទៀ បាញ់ និងឯកអគ្គរដ្ឋទូតចិនប្រចាំកម្ពុជា លោក វ៉ាង វិនធាន ក៏នឹងទៅទទួលវ៉ាក់សាំងកូវីដ ១៩ ស៊ីណូហ្វាម ចំនួន ៥០ ម៉ឺនដូសផងដែរ ដែលរដ្ឋាភិបាលនិងប្រជាជននៃសាធារណរដ្ឋប្រជាមានិតចិនបានផ្តល់មកកម្ពុជា។
យោងតាមលិខិតរបស់លោក ប៉ាង ធារ៉ូ អនុប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ នៃកងយោធពលខេមរភូមិន្ទ នៅថ្ងៃទី ២០ ខែសីហានេះ បានឱ្យដឹងថា វ៉ាក់សាំងកូវីដ ១៩ ប្រភេទស៊ីណូហ្វាម (Sinopharm) ចំនួន ៥០ ម៉ឺន នឹងដឹកមកដល់ប្រទេសកម្ពុជា នៅថ្ងៃចន្ទនេះ។
លោកបានបញ្ជាក់ថា ក្នុងពិធីប្រគល់ទទួលវ៉ាក់សាំងនេះ តម្រូវឱ្យអ្នកចូលរួមទាំងអស់ធ្វើតេស្តរហ័ស (Rapid Test) ដើម្បីរកមេរោគកូវីដ ១៩ ផងដែរ។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខណ្ឌទូទាំងប្រទេសលោកស្រី ឱ វណ្ណឌីន បានថ្លែងនាព្រឹកថ្ងៃទី ២០ ខែសីហា ក្នុងពេលចុះយកថវិកា និងសម្ភារៈមួយចំនួនជូនលោកយាយអាយុ ១០៨ ឆ្នាំ ក្នុងខេត្តរតនគិរីដែលបានចាក់វ៉ាក់សាំងកូវីដ ១៩ ថា ប្រទេសកម្ពុជា បានទទួលវ៉ាក់សាំងកូវីដ ១៩ ពីប្រទេសចំនួន ៥ ដែលមានប្រភេទវ៉ាក់សាំងចំនួន ៦។
លោកស្រីបានបញ្ជាក់ពីវ៉ាក់សាំងទាំងនោះថា វ៉ាក់សាំងស៊ីណូហ្វាមដែលរាជរដ្ឋាភិបាលកម្ពុជាបានបញ្ជាទិញបានចំនួនប្រមាណជាង ៧ លានដូស វ៉ាក់សាំងស៊ីណូវ៉ាក់ចំនួនជាង ១៤ លានដូស វ៉ាក់សាំងកូវីសែលចំនួន ៣២ ៤០០០ ដូស វ៉ាក់សាំង AstraZeneca ចំនួន ១,៧ លានដូសពីប្រទេសជប៉ុន វ៉ាក់សាំង AstraZeneca ចំនួន ៤២៥ ០០០ ដូសពីចក្រភពអង់គ្លេស និងវ៉ាក់សាំងចនស៊ុនចនស៊ុនចំនួនជាង ១ លានដូសពីសហរដ្ឋអាមេរិក។
រាជរដ្ឋាភិបាលម្ពុជា មានគោលដៅចាក់វ៉ាក់សាំងកូវីដ ១៩ ទៅដល់ប្រជាជនដែលមានអាយុចាប់ពី ១៨ ឆ្នាំឡើងទៅឱ្យបាន ១០ លាននាក់ នៅក្នុងខែតុលា ឬដើមខែវិច្ឆិកាខាងមុខនេះ ដែលគិតត្រឹមយប់ថ្ងៃទី ២១ ខែសីហា ប្រជាពលរដ្ឋជាង៨,៦លាននាក់ឬជាង ៨០% បើធៀបនឹងចំនួនប្រជាជនគោលដៅ ១០ លាននាក់បានចាក់វ៉ាក់សំាងកូវីដ ១៩។
ជាមួយគ្នានេះដែរ រាជរដ្ឋាភិបាលក៏បានសម្រេចចាក់ដូសទី៣ ឬដូសជំរុញបានជិត ៤៨ ម៉ឺននាក់ផងដែរ ខណៈដែលយុទ្ធនាការចាក់ជូនក្រុមមនុស្សដែលមានអាយុចាប់ពីអាយុ ១២ ឆ្នាំ ដល់អាយុ ក្រោម ១៨ ឆ្នាំ បានចំនួនជាង ៩២ ម៉ឺននាក់ផងដែរ៕