.jpg)
រថយន្តដឹកឈើ ដែលសមត្ថកិច្ចចាប់ឃាត់នៅក្នុងខេត្តកំពង់ឆ្នាំង។ រូបថត កងរាជអាវុធហត្ថ
កំពង់ឆ្នាំងៈ កម្លាំងកងរាជអាវុធហត្ថខេត្តកំពង់ឆ្នាំង បានបញ្ជូនជនសង្ស័យ ២ នាក់ ទៅតុលាការពាក់ព័ន្ធករណីដឹកជញ្ជូនឈើប្រណិតប្រភេទធ្នង់ និងសុក្រម ដោយគ្មានលិខិតអនុញ្ញាត។
លោក ឌិន សំបុន មេបញ្ជាការកងរាជអាវុធហត្ថមូលដ្ឋាន ស្រុកទឹកផុស បានប្រាប់ ភ្នំពេញ ប៉ុស្តិ៍ នៅថ្ងៃអាទិត្យ ទី ២២ សីហាថា កាលពីព្រឹកថ្ងៃទី ២១ សីហា កម្លាំងរបស់លោក បានធ្វើការបង្ក្រាបចាប់រថយន្តដឹកឈើប្រណិតមួយគ្រឿង និងមនុស្ស ២ នាក់ បន្ទាប់ពីពួកគេបានព្យាយាមបើករត់គេចពីចំណុចត្រួតពិនិត្យ របស់សមត្ថកិច្ច ឃុំជៀប ស្រុកទឹកផុស។
លោកបញ្ជាក់ថា៖ «នៅក្នុងប្រតិបត្តិការបង្ក្រាបនោះ កម្លាំងរបស់លោក បានបើករថយន្ត ២ គ្រឿង តាមប្រដេញស្ទាក់ចាប់ រថយន្តរបស់ជនសង្ស័យ ហើយត្រូវក្រុមជនសង្ស័យ បើកបំបុក និងកៀររថយន្តរបស់កងកម្លាំងយើង បណ្ដាលឲ្យខូចខាតទាំង ២គ្រឿងយ៉ាងដំណំ។ បន្ទាប់មករថយន្តរបស់ជនសង្ស័យ បានជាប់ផុងទៅមុខលែងរួច ទើបកម្លាំងយើងចាប់បាន ទាំងមនុស្សនិងវត្ថុតាង»។
លោក សំបុន បានឲ្យដឹងផងដែរថា ក្រោយពីបង្ក្រាបចាប់ជនសង្ស័យទាំង ២ និងវត្ថុតាង រថយន្តម៉ាធន់ដ្រាមួយគ្រឿង ដែលផ្ទុកពេញដោយឈើប្រណិត ប្រភេទសុក្រម និងធ្នង់ រួចកម្លាំងរបស់លោក ក៏បានកសាងសំណុំរឿងបញ្ជូនជនសង្ស័យ និងវត្ថុតាង ទៅកាន់មន្ទីរយុត្តិធម៌កងរាជអាវុធហត្ថខេត្តកំពង់ឆ្នាំង ដើម្បីចំណាត់ការបន្តទៅតាមនីតិវិធីច្បាប់ ។
ជុំវិញករណីនេះ លោក ហង្ស សុជាតិ ប្រធានមន្ទីរយុត្តីធម៌កងរាជអាវុធហត្ថខេត្ត កំពង់ឆ្នាំង បានប្រាប់ ភ្នំពេញ ប៉ុស្តិ៍ថា ជនសង្ស័យក្នុងសំណុំរឿងបទល្មើស ដឹកជញ្ជូនអនុផលព្រៃឈើ ខុសច្បាប់ ទាំង ២ នាក់នោះ ត្រូវបានបញ្ជូនទៅតុលាការខេត្តកំពង់ឆ្នាំង កាលពីវេលាម៉ោង ១១ ព្រឹក ថ្ងៃទី ២២ ខែ សីហា ឆ្នាំ ២០២១ ដើម្បីចំណាត់ការបន្តតាមនីតិវិធីច្បាប់។
លោកបានថ្លែងថា៖ «នៅពេលនេះ ជនសង្ស័យទាំង ២ ត្រូវបានតុលាការ បង្គាប់ឲ្យនាំត្រឡប់ មកកាន់មន្ទីរយុត្តិធម៌កងរាជអាវុធហត្ថយើងសិន ដើម្បីរង់ចាំការសួរចម្លើយនៅព្រឹកថ្ងៃចន្ទទៀត»។
បើតាមលោក សុជាតិ ឈើដែលជនសង្ស័យបានបង្កប់នៅក្នុងរថយន្តស៊េរីទំនើបនោះ មានទម្ងន់ជាង១២០០គីឡូក្រាម ។ លោកបន្តថា សកម្មភាពរបស់ក្រុមជនសង្ស័យទាំង២ ត្រូវបានអ្នកភូមិរាយការណ៍ថា បានចូលមកប្រមូលឈើពីក្នុងព្រៃនៃតំបន់ឃុំជៀប ជាច្រើនលើកមកហើយ៕
