មណ្ឌលគិរីៈ ក្រុមមន្ត្រីឧទ្យានុរក្ស ដែនជម្រកសត្វព្រៃភ្នំព្រេច បានជួយរំដោះសត្វអន្សងកន្ទុយវែងមួយក្បាល ដែលក្រុមព្រានបានទម្លាក់ ចោលនៅក្នុងព្រៃនៃភូមិសាស្ត្រឃុំពូជ្រៃ ស្រុកពេជ្រាដា ខេត្តមណ្ឌលគិរី ជាមួយសម្ភារចាប់សត្វព្រៃមួយចំនួនទៀត ហើយរត់គេចខ្លួន ក្រោយពីប្រទះឃើញមន្ត្រីឧទ្យានុរក្ស ដែលបានចុះល្បាត នៅក្នុងតំបន់នោះ។
លោក ព្រំ វិបុលរតនៈ នាយកដែនជម្រកសត្វព្រៃភ្នំព្រេច បានប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា កាលពីរសៀលថ្ងៃសៅរិ៍ ក្រុមមន្ត្រីឧទ្យានុរក្ស បានចុះល្បាតព្រៃស្រាវជ្រាវនិងបង្ក្រាបបទល្មើសធនធានធម្មជាតិ ហើយបានប្រទះឃើញក្រុមជន សង្ស័យ ៤ នាក់ មានស្ពាយសាក់កាដូជាប់ខ្លួនកំពុងបណ្ដើរឆ្កែ តាមប្រដេញចាប់សត្វព្រៃនៅក្នុងតំបន់ស្នូលនៃដែនជម្រកសត្វព្រៃភ្នំព្រេច ហើយនៅពេលនោះ ក្រុមជនសង្ស័យ ក៏បានប្រទះឃើញក្រុមមន្ត្រីឧទ្យានុរក្ស។
លោកបញ្ជាក់ថា៖ «ពួកគេបាននាំគ្នាទំលាក់សាក់កាដូរចោល ហើយនាំគ្នា រត់គេចខ្លួនចូលទៅក្នុងព្រៃបាត់ទៅ។ បន្ទាប់មកក្រុមមន្ត្រីល្បាតរបស់យើងក៏បានទៅឆែកឆេរសាក់កាដូររបស់ពួកគេ ឃើញមានសត្វអន្សងកន្ទុយវែងមួយក្បាល មងប្រើសម្រាប់ទាក់ចាប់សត្វព្រៃមួយដៃប្រវែង ៦០ ម៉ែត្រ និងអន្ទាក់ចាប់សត្វព្រៃចំនួន ៥០ អន្ទាក់ រួមទាំងម៉ូតូកែច្នៃគ្មានស្លាកលេខចំនួន ២ គ្រឿង»។
បើតាមលោក រតនៈ ក្រុមមន្ត្រីឧទ្យានុរក្ស បានដោះលែងសត្វអន្សងកន្ទុយវែងនោះចូលទៅក្នុងព្រៃវិញ ក្រោយពិនិត្យឃើញ នៅមានជីវិត និង មិនមានស្នាមរបួសអ្វីនោះ។ ចំណែកវត្ថុតាង ម៉ូតូកែច្នៃ មង និងអន្ទាក់ចាប់សត្វព្រៃទាំងនោះ ត្រូវបាននាំយកទៅរក្សាទុកជាបណ្ដោះអាសន្ន នៅស្នាក់ការបរិស្ថាន DA អូរច្បារ ដើម្បីស្រាវជ្រាវរកម្ចាស់និងកសាងសំណុំរឿងបញ្ជូនទៅតុលាការ។
បើតាម លោក រតនៈ បច្ចុប្បន្ន នៅក្នុងតំបន់ដែនជម្រកសត្វព្រៃភ្នំព្រេច មិនមានករណីបទល្មើសកាប់បំផ្លាញព្រៃឈើកើតឡើងទៀតទេ ប៉ុន្តែបទល្មើសបរបាញ់ និង ដាក់អន្ទាក់ចាប់សត្វព្រៃនៅតែបន្តកើតមានគួរឲ្យបារម្ភ ។
លោកនិយាយថា៖«រៀងរាល់ ៤ ទៅ ៥ ថ្ងៃម្ដង មន្ត្រីឧទ្យានុរក្សយើងបានរុករកឃើញនិងដោះបានមិនតិចជាង៥០អន្ទាក់ឡើយ។ អន្ទាក់ភាគច្រើន ត្រូវបានរកឃើញនៅតាមដងអូរ និង ថ្លុក ត្រពាំង ដែលសំបូរដោយព្រៃរបោះ»៕