.jpg)
កញ្ចប់មីដែលមានដាក់រូបប្រាសាទអង្គរវត្ត។ រូបថត ហ្វេសប៊ុក
ភ្នំពេញៈ ក្រសួងវប្បធម៌ និងវិចិត្រសិល្បៈបានបញ្ជូនផលិតផលមី Nam Vang Noodle ដែលក្លែងយកឈ្មោះទីក្រុងភ្នំពេញ និងដាក់រូបសញ្ញា ប្រាសាទអង្គរវត្ត ដាក់លើផលិតផលរបស់ខ្លួនដោយគ្មានការអនុញ្ញាតទៅក្រសួងពាណិជ្ជកម្មធ្វើការស្រាវជ្រាវ និងមានវិធានការតាមផ្លូវច្បាប់។
លោក ឡុង ប៉ុណ្ណាសេរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ ប្រាប់ភ្នំពេញប៉ុស្តិ៍នៅថ្ងៃទី ២២ សីហា ថាពាក់ព័ន្ធនឹងផលិតផលមី Nam Vang Noodle មានឈ្មោះទីក្រុងភ្នំពេញ និងរូបប្រាសាទអង្គរវត្តនៅលើសម្បកកញ្ចប់នេះ ត្រូវបានអាជ្ញាធរជាតិអប្សរា និងអ្នកពាក់ព័ន្ធធ្វើការសិក្សា រកឃើញថា មិនធ្លាប់មានពីមុនទេ។
ក្រសួងបានបញ្ជូនរបាយការណ៍នេះទៅក្រសួងពាណិជ្ជកម្មរួចហើយ។ ក្រសួងពាណិជ្ជកម្មក៏កំពុងធ្វើកិច្ចការស្រាវជ្រាវលើករណីនេះដែរ។ ផលិតផលនេះ ត្រូវបានដាក់តាំងលក់នៅក្នុងសហរដ្ឋអាមេរិក។
បើតាមលោក ប៉ុណ្ណាសេរីវត្ថ ប្រសិនបើក្រសួងពាណិជ្ជកម្មស្រាវជ្រាវរកឃើញច្បាស់ថា មានការក្លែងបន្លំពិតប្រាកដមែន ក្រសួងនឹងដាក់លិខិតប្តឹងទៅស្ថាប័នអន្តរជាតិពាក់ព័ន្ធនឹងការធ្វើពាណិជ្ជកម្ម និងការក្លែងផលិតផល និងអត្តសញ្ញាណប្រទេសមួយយកទៅដាក់លើស្លាកសញ្ញាផលិតផលរបស់ខ្លួនឯង ដែលត្រូវហាមឃាត់តាមអនុសញ្ញាទីក្រុងប៉ារីសស្តីពីការប្រកួតប្រជែងពាណិជ្ជកម្ម មិនស្មោះត្រង់។
លោក ប៉ុណ្ណាសេរីវត្ថ ថ្លែងថា៖ «ខ្ញុំបានបញ្ជូនឯកសារនេះទៅក្រសួងពាណិជ្ជកម្មហើយ រង់ចាំមើល ១ ថ្ងៃ ២ ថ្ងៃទៀត ដឹងហើយ»។
ពាក់ព័ន្ធនឹងករណីនេះ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម ថ្លែងថា លោកមិនទាន់ទទួលបានព័ត៌មាននៅឡើយទេ ព្រោះកាលពីម្សិលមិញជាថ្ងៃសម្រាក (ថ្ងៃអាទិត្យ)។ ដូច្នេះក្រសួងក៏មិនទាន់ដឹងថាមានវិធានការយ៉ាងណាដែរ។
ទោះជាយ៉ាងណាលោកថា បើសិនជាមានករណីក្លែងបន្លំយករូបអត្តសញ្ញាណជាតិរបស់ប្រទេសកម្ពុជាទៅប្រើប្រាស់ដោយមិនមានការអនុញ្ញាតពិតប្រាកដមែន ក្រសួងពាណិជ្ជកម្មនឹងចាត់វិធានការតាមផ្លូវច្បាប់។
លោកបញ្ជាក់ថា៖ «ប្រសិនបើមានការរំលោភបំពានម៉ាកដែលបានចុះបញ្ជីរួចហើយ ឬការរំលោភបំពានទៅលើនិមិត្តសញ្ញា ដែលមានលក្ខណៈជាតិយើងត្រូវតែមានវិធានការហើយ ប៉ុន្តែករណីនេះយើងមិនទាន់មានព័ត៌មានទេ ហើយមិនដឹងថា អ្នកណាគេបានប្រើប្រាស់។ ចាំថ្ងៃចន្ទបើមានព័ត៌មានលម្អិត ចាំខ្ញុំប្រាប់វិញ»។
បើតាមលោក ប៉ែន សុវិជាតិ កន្លងមក ក្រសួងពាណិជ្ជកម្មក៏ធ្លាប់បានចាត់វិធានការទៅតាមផ្លូវច្បាប់ទៅលើទំនិញមួយចំនួនដែលដាក់លក់នៅលើទីផ្សារបរទេស ដែលពាក់ព័ន្ធនឹងរូបសញ្ញាប្រាសាទអង្គរវត្តផងដែរ៕
