ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង ផ្ដល់អនុសាសន៍ឱ្យមន្ត្រីបន្តការងារអប់រំផ្សព្វផ្សាយអំពីការអនុវត្តវិធានការ៣កុំ ៣ការពារ ពង្រឹងការអនុវត្តច្បាប់ និងត្រូវជំរុញការចាក់វ៉ាក់សាំងឱ្យបានតាមគោលការណ៍ ខណៈថ្នាក់ដឹកនាំ និងមន្ត្រីចំណុះក្រសួងមហាផ្ទៃ ២ ១៩៨ នាក់ បានឆ្លងជំងឺកូវីដ។
លោក ស ខេង ផ្ដល់អនុសាសន៍បែបនេះក្នុងពេលលោកដឹកនាំកិច្ចប្រជុំតាមដានវឌ្ឍនភាពនៃការប្រយុទ្ធប្រឆាំងជំងឺកូវីដ ១៩ របស់ក្រសួងមហាផ្ទៃ នៅថ្ងៃទី ២១ សីហា តាមប្រព័ន្ធវីដេអូ Zoom។
លោកថ្លែងថា៖ «ត្រូវបន្តការងារអប់រំផ្សព្វផ្សាយអំពីការអនុវត្តវិធានការ ៣កុំ ៣ការពារ ពង្រឹងការអនុវត្តច្បាប់ និងវិធានការ និងជំរុញការចាក់វ៉ាក់សាំងឱ្យបានតាមគោលការណ៍ក្រសួងសុខាភិបាល»។
លោកក៏បានណែនាំឱ្យមានការផ្ដល់ព័ត៌មានអំពីសំណើ និងសំណូមពរនានាដើម្បីរៀបចំការសម្របសម្រួល ពិសេសជាមួយក្រសួងសុខាភិបាល ហើយគ្រប់អង្គភាពត្រូវធ្វើរបាយការណ៍ឱ្យទៀងទាត់។ លោក ស ខេង ក៏បានកោតសរសើរ និងវាយតម្លៃខ្ពស់ចំពោះរដ្ឋលេខាធិការទទួលបន្ទុក និងអគ្គនាយកពន្ធនាគារក្នុងការងារប្រយុទ្ធប្រឆាំងជំងឺកូវីដ ១៩ ក្នុងពន្ធនាគារ ពិសេសការរៀបចំចាក់វ៉ាក់សាំងជូនអ្នកជាប់ឃុំ។
តាមរបាយការណ៍របស់លោក សេង យូអ៊ាន់ អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុនៃក្រសួងមហាផ្ទៃឱ្យដឹងថា ពាក់ព័ន្ធនឹងការឆ្លងជំងឺកូវីដ ១៩ គិតត្រឹមថ្ងៃទី ២១ សីហា មានថ្នាក់ដឹកនាំ និងមន្ត្រីក្រសួងមហាផ្ទៃ ២ ១៩៨ នាក់បានឆ្លងជំងឺនេះ និងជាសះស្បើយចំនួន ១ ៤៤១ នាក់ កំពុងព្យាបាល ៧៣៦ នាក់ និងស្លាប់ ២១ នាក់។
លោកបន្តថា គិតត្រឹមថ្ងៃទី ១៩ ខែ សីហា ឆ្នាំ ២០២១ ក្រសួងមហាផ្ទៃបានទទួលវ៉ាក់សាំងពីក្រសួងសុខាភិបាល ចំនួន ២០ លើក ស្មើនឹង ១០៧ ៣២១ ដូស និងទទួលបានសម្ភារបរិក្ខារមួយចំនួនទៀត។
លោកឱ្យដឹងថា ក្រសួងមហាផ្ទៃក៏បានទទួលជំនួយបង្ការទប់ស្កាត់ជំងឺកូវីដ ១៩ ផ្ដល់ដោយថ្នាក់ដឹកនាំក្រសួង អគ្គស្នងការដ្ឋាននគរបាលជាតិ អគ្គនាយកដ្ឋានភ័ស្តុភារ និងហិរញ្ញវត្ថុ អគ្គនាយកដ្ឋាន និងអង្គភាពចំណុះនានាមួយចំនួនទៀតមានទាំងជំនួយថវិកា និងសម្ភារបរិក្ខារ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានរំឭកដល់ប្រជាពលរដ្ឋទាំងអស់កុំរំពឹងថាវីរុសកូវីដ ១៩ នឹងរលាយសាបសូន្យឱ្យសោះ ព្រោះមេរោគនេះបានធ្វើសកម្មភាពបំប្លែងខ្លួនថ្មីជាបន្តបន្ទាប់។ ដូច្នេះត្រូវរៀនរស់នៅជាមួយមេរោគនេះ និងត្រូវចូលរួមទាំងអស់គ្នាក្នុងការអនុវត្ដវិធានការរបស់រាជរដ្ឋាភិបាលក៏ដូចជាក្រសួងសុខាភិបាល។
លោកស្រីថ្លែងបែបនេះ ពេលលោកស្រីនាំយកអំណោយថវិកា និងសម្ភារ ជូនលោកតា លោកយាយ វ័យ ១០០ ឆ្នាំឡើងដែលស្ម័គ្រចិត្តចាក់វ៉ាក់សាំងបង្ការជំងឺកូវីដ ១៩ នៅស្រុករមាសហែក ខេត្ដស្វាយរៀង កាលពីម្សិលមិញ។
លោកស្រីថ្លែងថា៖ «ដែលខ្ញុំហ៊ាននិយាយដូច្នេះព្រោះថា វីរុសកូវីដ ១៩ នេះ បានបំប្លែងថ្មីទៀតហើយ។ យើងក៏មិនដឹងថាទៅថ្ងៃខាងមុខទៀត វានឹងបំប្លែងខ្លួនទៅជាអ្វីទៀតទេ។ នេះបង្ហាញឱ្យឃើញថា វីរុសកូវីដ ១៩ នឹងនៅជាមួយយើង ហើយវាក៏នៅតែចិញ្ចឹមចិត្តនៅក្នុងការបង្កបង្កើត និងវិវឌ្ឍខ្លួនប្រាណរបស់វា ដើម្បីវាយលុកមកលើសរីរាង្គរបស់បុគ្គលទាំងអស់»។
លោកស្រីបញ្ជាក់ថា បើទោះជាវីរុសបំប្លែងថ្មីមានលទ្ធភាពឆ្លងកាត់ប្រព័ន្ធភាពស៊ាំរបស់មនុស្សក៏ពិតមែន ប៉ុន្ដែវ៉ាក់សាំងនៅតែជាឧបករណ៍ដ៏មានប្រសិទ្ធភាពបំផុត ដែលអាចកាត់បន្ថយជាអតិបរមានូវភាពធ្ងន់ធ្ងរនៃសុខភាព កាត់បន្ថយបានជាអតិបរមានូវអត្រាមរណភាព និងអត្រាសម្រាកពេទ្យ៕