.jpg)
គ្រូពេទ្យខេត្តបន្ទាយមានជ័យ កំពុងយកសំណាកពីពលករដែលទើបវិលត្រឡប់មកពីថៃ។ រូបថត សហការី
ភ្នំពេញៈ ក្រសួងសុខាភិបាល និងតំណាងអង្គការសុខភាពពិភពលោក (WHO) ប្រចាំកម្ពុជាមានការបារម្ភជាខ្លាំងពីការឆ្លងរាតត្បាតនៃជំងឺកូវីដ ១៩ បំប្លែងថ្មីប្រភេទដែលតា (Delta) ដែលចំនួននៃការឆ្លងអាចច្រើនជាងការរកឃើញរបស់ក្រសួង ខណៈមកដល់ពេលនេះចំនួនអ្នកឆ្លងនៃមេរោគនេះបានកើនឡើងជិត ១ ០០០ ករណីហើយ។
មន្ត្រីនៃក្រសួងសុខាភិបាលថា ការព្យាបាលអ្នកជំងឺឆ្លងមេរោគបំប្លែងថ្មីនេះ មិនអនុញ្ញាតឱ្យសេវាសុខាភិបាលឯកជនព្យាបាលឡើយ។
ក្នុងពេលចុះផ្តល់ថវិកា និងសម្ភារមួយចំនួនទៅដល់មនុស្សវ័យចំណាស់អាយុពី ១០០ ឆ្នាំឡើងក្នុងស្រុកពាមជរ ខេត្តព្រៃវែង កាលពីថ្ងៃទី ២២ សីហា លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានឱ្យដឹងថា ការឆ្លងរាលដាលនៃជំងឺកូវីដ ១៩ បំប្លែងថ្មីប្រភេទដែលតាបានកើតមាននៅគ្រប់រាជធានី-ខេត្តហើយ លើកលែងតែខេត្តកែប និងក្រចេះតែប៉ុណ្ណោះដែលមិនទាន់មានការរាយការណ៍ពីវីរុសបំប្លែងថ្មីនេះ។
លោកស្រីមានប្រសាសន៍ថា៖ «មកដល់ពេលនេះ យើងរកឃើញមាន ៩៩៩ នាក់ហើយ ដែលបានឆ្លងវីរុសបំប្លែងថ្មីប្រភេទដែលតានេះ។ ចុះសួរថាតើនៅពីក្រោយតួលេខ ដែលយើងរកឃើញនេះ តើមានការចម្លងប៉ុន្មានទៀត? ដូចនេះហើយដែលយើងត្រូវរួមគ្នាក្នុងការទប់ស្កាត់ការចម្លងនេះ»។
លោកស្រី ឱ វណ្ណឌីន បន្ថែមថា៖ «តួលេខវាជារឿងមួយ សម្រាប់បង្ហាញពីការរកឃើញបញ្ជាក់ឱ្យបានច្បាស់ថា តើស្ថានភាពនៃការចម្លងនៃវីរុសកូវីដ ១៩ វាយ៉ាងណា។ ប៉ុន្តែអ្វីដែលយើងត្រូវគិតគឺយើងត្រូវដឹងថា អ្វីដែលយើងរកឃើញនេះ គឺយើងធ្វើទៅតាមនីតិវិធីបច្ចេកទេសក្នុងការសម្រង់យកវត្ថុសំណាករបស់អ្នកជំងឺដើម្បីយកមកមើល ប៉ុន្តែយើងមិនត្រូវភ្លេចថា ការចម្លងនៃវីរុសប្រភេទថ្មីនេះអាចមានច្រើនជាងនេះទៀតដែលនេះហើយ ជាការព្រួយបារម្ភរបស់យើង»។
លោកស្រីបញ្ជាក់ថា វីរុសកូវីដ-១៩ មិនទាន់ទៅណាឆ្ងាយទេ ហើយសុំកុំរំពឹងថា វីរុសនេះនឹងរលាយពីទឹកដីកម្ពុជានោះ ដោយសារវីរុសនេះបានបំប្លែងខ្លួនថ្មីជាច្រើន ហើយទៅថ្ងៃខាងមុខ ក៏មិនដឹង ថាតើវីរុសនេះនឹងបំប្លែងទៅជាយ៉ាងណាទៀតដែរ។
បើតាមលោកស្រី ឱ វណ្ណឌីន គិតត្រឹមថ្ងៃទី ១៧ ខែសីហា សម្រាប់វីរុសកូវីដ ១៩ ប្រភេទអាល់ហ្វា (Alpha) បានរាលដាលដល់ ១៩០ ប្រទេស, វីរុសប្រភេទបែតតា (Beta) បានឆ្លងដល់ ១៣៨ ប្រទេស វីរុសប្រភេទហ្គាមម៉ា (Gamma) រាលដាលដល់ ៨២ ប្រទេស និងវីរុសប្រភេទដែលតា (Delta) បានឆ្លងដល់ ១៤៨ ប្រទេស។
តំណាងអង្គការសុខភាពពិភពលោកប្រចាំកម្ពុជា លោកស្រី លី អៃឡែន ក៏បានបង្ហាញពីការបារម្ភពីការឆ្លងរាតត្បាតនៃមេរោគបំប្លែងថ្មីប្រភេទដែលតា (Delta) ដែលវាមានកម្រិតឆ្លងខ្លាំង និងលឿនដែលមេរោគនេះបានកំពុងតែកើតមាននៅក្នុងប្រទេសកម្ពុជាក្នុងសហគមន៍ ដែលឆ្លងចូលតាមរយៈពលករ។
លោកស្រីមានប្រសាសន៍ថា៖ «វាជាដំណឹងដែលអាក្រក់ ឬដំណឹងមិនល្អដែលថាមេរោគកូវីដ ១៩ កំពុងនៅជាមួយយើង ពិសេសមេរោគប្រភេទដែលតានៅពេលនេះ។ ចំណុច ២ ដែលមានតួនាទីសំខាន់ក្នុងការបញ្ឈប់ការរាតត្បាតនូវជំងឺកូវីដ ១៩ នេះ គឺការចាក់វ៉ាក់សាំងកូវីដ ១៩ និងការអនុវត្តវិធានការអន្តរាគមន៍ដែលមិនមែនជាឱសថ ដែលយើងត្រូវតែធ្វើឱ្យមានប្រសិទ្ធភាព»។
ទោះយ៉ាងណាលោកស្រី លី អៃឡែន មានភាពជឿជាក់ខ្លាំងលើដំណើរការយុទ្ធនាការចាក់វ៉ាក់សាំងក្នុងប្រទេសកម្ពុជានាពេលបច្ចុប្បន្ន ប៉ុន្តែលោកស្រីនៅមានការបារម្ភចំពោះការអនុវត្តវិធានការអន្តរាគមន៍ដែលមិនមែនជាឱសថ។
លោកស្រីពន្យល់ថា៖ «ប្រសិនបើយើងមានការបន្ធូរបន្ថយ ឬមិនចូលរួមក្នុងការអនុវត្តវិធានការអន្តរាគមន៍ដែលមិនមែនជាឱសថនេះ ឬមានការបន្ធូរបន្ថយលឿនពេក ឆាប់ពេក ពេលនោះយើងនឹងអាចមើលឃើញពីការផ្ទុះឡើងវិញនៃការរាតត្បាតជំងឺកូវីដ ១៩ ម្តងទៀត»។
លោកស្រី លី អៃឡែន បានធ្វើការអំពាវនាវទៅដល់ប្រជាពលរដ្ឋទាំងអស់មិនត្រូវមានការបន្ធូរបន្ថយការអនុវត្តវិធានការការពារសុខភាព ដែលដាក់ចេញដោយក្រសួងសុខាភិបាល និងរាជរដ្ឋាភិបាលកម្ពុជាឡើយ។ ពេលនេះមិនមែនជាពេលដែលត្រូវបន្ធូរបន្ថយនោះទេ តែជាការចូលរួមអនុវត្តរួមគ្នាឱ្យមានប្រសិទ្ធភាពដូចជា ៣ការពារ និង៣កុំជាដើម។
ទន្ទឹមនឹងនេះដែរ រដ្ឋលេខាធិកាក្រសួងសុខាភិបាល លោក ង៉ូវ កាង បាននិយាយកាលពីថ្ងៃទី ២១ ខែសីហាថា ក្រសួងមិនទាន់អនុញ្ញាតឱ្យសេវាឯកជនណាមួយទទួលការព្យាបាលអ្នកជំងឺកូវីដ ១៩ បំប្លែងថ្មីប្រភេទដែលតានោះទេ។
លោកមានប្រសាសន៍ថា៖ «នៅពេលដែលធ្វើតេស្តរកឃើញមានមេរោគបំប្លែងថ្មីនេះ អ្នកជំងឺនោះនឹងត្រូវបញ្ជូនមកព្យាបាលនៅមន្ទីរពេទ្យរដ្ឋដែលត្រូវបានរៀបចំដាច់ដោយឡែកពីអ្នកជំងឺផ្សេងទៀត ដែលយើងយល់ថា មានការគ្រប់គ្រងយ៉ាងហ្មត់ចត់ និងកាត់បន្ថយការឆ្លងទៅក្នុងសហគមន៍»។
សម្រាប់ភូមិសាស្ត្ររាជធានីភ្នំពេញមានទីតាំងចំនួន ៤ សម្រាប់ព្យាបាលអ្នកជំងឺកូវីដ ១៩ បំប្លែងថ្មី ដែលតា ក្នុងនោះមានវិទ្យាល័យជាស៊ីមសាមគ្គី មជ្ឈមណ្ឌលមង្គលឧត្តម ពិភពថ្មីសែនសុខ និងមណ្ឌលសុខភាពចាក់អង្រែ។
ក្រសួងថា ចាប់ពីចុងខែមីនា ដល់ថ្ងៃទី ២១ ខែសីហា កម្ពុជាបានរកឃើញអ្នកវិជ្ជមានវីរុសកូវីដ ១៩ បំប្លែងថ្មីប្រភេទ B.1.61-7-2 (Delta) ចំនួន ៩៩៩ នាក់។ អ្នកវិជ្ជមានទាំងនោះរួមមានទាំងលើអ្នកដំណើរតាមជើងហោះហើរ ពលករមកពីប្រទេសថៃ ពីប្រទេសវៀតណាម ប្រជាជននៅក្នុងសហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជនអ្នកបកប្រែភាសា ជនជាតិបរទេស បុគ្គលិកនៅតាមរោងចក្រកាត់ដេរ បុគ្គលិកធនាគារ ដូនជីនៅវត្ត និងសិស្ស៕
វីដេអូ៖
