ភ្នំពេញៈ វ៉ាក់សាំងប្រភេទស៊ីណូហ្វាមចំនួន ១០០ ០០០ ដូស ដែលជាជំនួយរបស់សមាគមជាតិកាកបាទក្រហមចិន ផ្តល់ជូនកាកបាទក្រហមកម្ពុជា នឹងដឹកមកដល់អាកាសយានដ្ឋានអន្តរជាតិភ្នំពេញ នៅវេលាម៉ោង ៥ រសៀល ថ្ងៃទី ២៣ ខែសីហា នេះ។
យោងតាមសេចក្តីប្រកាសព័ត៌មាន ស្តីពីការទទួលវ៉ាក់សាំងស៊ីណូហ្វាម ពីសមាគមជាតិកាកបាទក្រហមចិន ជូនកាកបាទក្រហមកម្ពុជា នឹងប្រព្រឹត្តទៅក្រោមអធិបតីភាពលោកស្រី ប៊ុន រ៉ានី ហ៊ុន សែន ប្រធានកាក បាទ ក្រហម កម្ពុជា និងលោក វ៉ាង វិនធាន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំកម្ពុជា នៅអាកាសយានដ្ឋានអន្តរជាតិភ្នំពេញ។
កាកបាទក្រហមកម្ពុជាបានបញ្ជាក់ថា ៖ «វ៉ាក់សាំងកូវីដ ១៩ ដែលជាជំនួយរបស់កាកបាទក្រហមចិន នឹងចូលរួមជាមួយរាជរដ្ឋាភិបាលកម្ពុជា នូវមធ្យោបាយដ៏មានអានុភាពបន្ថែមទៀត ក្នុងការបន្តកិច្ចខិតខំប្រឹងប្រែងប្រយុទ្ធប្រឆាំងនឹងជំងឺកូវីដ ១៩»។
ប្រភពដដែលបានបន្តថា ទោះជាយ៉ាងនេះក្តី វ៉ាក់សាំងតែមួយមុខនឹងមិនអាចបញ្ចប់ការឆ្លងរាតត្បាតជាសកលនៃជំងឺកូវីដ ១៩ នេះបានឡើយ។
ការបន្តអនុវត្តវិធានការសុខភាពសាធារណៈ ដើម្បីទប់ស្កាត់ការចម្លងជំងឺនេះ នៅតែជាការចាំបាច់ ដូចជាការធ្វើតេស្ត ការគោរពវិធានការចត្តាឡីស័ក ព្រមទាំងការបន្តអនុវត្ត ៣ការពារ និង៣កុំ។
កាកបាទក្រហមកម្ពុជាបានឱ្យដឹងថា៖ «ក្នុងស្ថានភាពបច្ចុប្បន្ន ការប្រយុទ្ធប្រឆាំងនឹងជំងឺកូវីដ ១៩ ទាមទារឱ្យមានការចូលរួម និងសហការយ៉ាងស្អិតរមួត ពីភាគីពាក់ព័ន្ធទាំងអស់។ ក្នុងន័យនេះ កាកបាទក្រហមកម្ពុជា ប្តេជ្ញាបន្តខិតខំចូលរួម និងសហការជាមួយនឹងរាជរដ្ឋាភិបាល ឱ្យកាន់តែខ្លាំងក្លាមួយកម្រិតទៀត ក្នុងការប្រយុទ្ធប្រឆាំងនឹងជំងឺកូវីដ ១៩ តាមរយៈ ការចូលរួមចំណែកអប់រំផ្សព្វផ្សាយ ដល់ប្រជាពលរដ្ឋតាមសហគមន៍ឱ្យអនុវត្តវិធានការសុខាភិបាល និងវិធានការរដ្ឋបាល ដើម្បីសុខភាពល្អរបស់គ្រួសារមួយ សហគមន៍មួយ និងសង្គមជាតិទាំងមូល»។
ជាមួយគ្នានេះដែរ នៅថ្ងៃត្រង់ថ្ងៃទី ២៣ សីហានេះដែរ រដ្ឋមន្ត្រីក្រសួងការពារជាតិ លោក ទៀ បាញ់ នឹងទទួលវ៉ាក់សាំងស៊ីណូហ្វាម ដែលជាជំនួយរបស់រដ្ឋាភិបាល និងប្រជាជនចិន ចំនួន ៥០ ម៉ឺនដូសផងដែរ៕