ភ្នំពេញៈ ក្រុមការងារចល័តចម្រុះសម្រាប់ឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានឃាត់ និងពិន័យរថយន្តដឹកលើសទម្ងន់ចំនួន ១៤ គ្រឿង ដែលប្រព្រឹត្តល្មើសលើផ្លូវជាតិលេខ ១ លេខ ៤៤ និងលេខ ៧០B បន្ទាប់ពីចុះប្រតិបត្តិការរយៈពេល ៣ ថ្ងៃក្នុងនោះមាន ៨ គ្រឿង ត្រូវបានរក្សាទុកក្នុងរយៈពេល ១ ឆ្នាំ។
តាមទំព័រហ្វេសប៊ុករបស់ក្រសួងសាធារណការ និងដឹកជញ្ចូនបានឱ្យដឹងនៅថ្ងៃទី ២០ សីហាថា ក្នុងប្រតិបត្តិការចល័ត រយៈពេល ៣ ថ្ងៃ គឺនៅថ្ងៃទី ១៦ ថ្ងៃទី ១៧ និងថ្ងៃ ២០ ខែសីហា ក្រុមការងារចល័តចម្រុះសម្រាប់ឆ្មក់ត្រួតពិនិត្យយានយន្តដឹកជញ្ជូនលើសទម្ងន់នៃគណៈកម្មាធិការសម្របសម្រួលអចិន្រៃ្តយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានឃាត់ និងពិន័យយានយន្តដឹកលើសទម្ងន់កម្រិតកំណត់ចំនួន ១៤ គ្រឿង។
ក្រសួងបានបញ្ជាក់ថា៖ «ក្នុងនោះ រថយន្តចំនួន ៦ គ្រឿង ត្រូវបានពិន័យ និងរើទំនិញចេញ ចំណែកឯ ៨ គ្រឿងទៀតត្រូវបានឃាត់ទុករយៈពេល ១ ឆ្នាំដោយលើសទម្ងន់កម្រិតកំណត់ ២០ ភាគរយនៃទម្ងន់អនុញ្ញាត»។
លោក តាំង ពៅ ប្រធានលេខាធិការដ្ឋាននៃក្រសួងសាធារណការ និងដឹកជញ្ជូនបានឱ្យដឹងថា នៅថ្ងៃទី ១៦ និង ១៧ ខែសីហា លើផ្លូវជាតិលេខ ៤៤ ស្រុកសំរោងទង ខេត្តកំពង់ស្ពឺ និងផ្លូវលេខ ៧០B ស្រុកខ្សាច់កណ្តាល ខេត្តកណ្តាល ក្រុមការងារបានពិន័យយានយន្ដដឹកជញ្ជូន ៩ គ្រឿង ក្នុងនោះ ៥ គ្រឿង ត្រូវឃាត់ទុករយៈពេល ១ ឆ្នាំ ដោយសារលើសកម្រិតកំណត់ ២០ ភាគរយនៃទម្ងន់អនុញ្ញាត។
លោកបានបន្តថា ដោយឡែកនៅថ្ងៃទី ២០ ខែសីហា នៅលើផ្លូវជាតិលេខ ១ ក្នុងស្រុកស្វាយជ្រំ ខេត្តស្វាយរៀង និងស្រុកព្រះស្តេចខេត្តព្រៃវែង ក្រុមការងារបានពិន័យយានយន្ដដឹកជញ្ជូន ៥ គ្រឿងក្នុងនោះ ៣ គ្រឿង ត្រូវឃាត់ទុក ១ ឆ្នាំ ដោយសារលើសទម្ងន់កម្រិតកំណត់ ២០ ភាគរយនៃទម្ងន់អនុញ្ញាត។
លោកបានបញ្ជាក់ថា៖ «យោងតាមទិន្នន័យខាងលើយានយន្តចំនួន ៨ គ្រឿងត្រូវឃាត់ទុកចំនួន ១ ឆ្នាំ ដោយអនុលោមតាមច្បាប់ស្តីពីផ្លូវថ្នល់មាត្រា ៦០ និងសេចក្ដីជូនដំណឹងលេខ ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់»។
ជាមួយគ្នានោះលោកក៏បានក្រើនរំឭកជូនដល់ម្ចាស់ក្រុមហ៊ុនដឹកជញ្ជូនម្ចាស់រថយន្តធុនធ្ងន់ និងអ្នកបើកបរជាថ្មីម្តងទៀតថា ក្រសួងនឹងបន្តអនុវត្តតាមច្បាប់ និងសេចក្ដីជូនដំណឹងយ៉ាងតឹងបំផុតដោយគ្មានការលើកលែងឡើយ។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានប្រាប់ ភ្នំពេញ-ប៉ុស្តិ៍ថា ដើម្បីទប់ស្កាត់បទល្មើសលើដងផ្លូវ និងជាពិសេសការដឹកលើសទម្ងន់កម្រិត គឺសមត្ថកិច្ច ត្រូវតែធានាដល់ការអនុវត្តច្បាប់ឱ្យបានជាប្រចាំ និងមិនត្រូវលើកលែងនោះទេ។
លោកបានបន្តថា ការដឹកលើសទម្ងន់កម្រិតនៅលើដងផ្លូវគឺបានបង្កគ្រោះថ្នាក់ និងធ្វើឱ្យប៉ះពាល់ និងផលប្រយោជន៍ពលរដ្ឋជារួម ខណៈផលប្រយោជន៍មានតែក្រុមមួយក្តាប់តូចប៉ុណ្ណោះ ដែលទទួលបានលាភសក្ការៈ។ ការអនុវត្តច្បាប់របស់ក្រសួងក្នុងពេលនេះ គឺជាសារមួយទៅដល់គ្រប់សាជីវកម្មនៅគ្រប់គោលដៅទាំងអស់ដែលបានដឹកលើសទម្ងន់ និងមានចេតនារកចន្លោះ ដើម្បីឆ្លៀតដឹកលើសទម្ងន់ភ្ញាក់ខ្លួនចូលរួមអនុវត្ត ច្បាប់ទាំងអស់គ្នា។
លោកបានបញ្ជាក់ថា៖ «ការដឹកលើសទម្ងន់ គឺបងឱ្យខូចផ្លូវ ខាតបង់ថវិការដ្ឋ វាបង្កទៅជាគ្រោះថ្នាក់ចរាចរណ៍ ដែលធ្វើឱ្យមនុស្សស្លាប់ របួសធ្ងន់ធ្ងរ និងពិការដែលក្នុង ១ ឆ្នាំៗរបួសជិត ៥ ០០០ នាក់ ស្លាប់ជិត ២ ០០០ នាក់។ អ៊ីចឹងការដែលដឹកលើសទម្ងន់នេះធ្វើឱ្យផ្លូវនេះកើតជង្ហុក ធ្វើឱ្យអ្នកជិះគេចជង្ហុក បង្កគ្រោះថ្នាក់ដែលធ្វើឱ្យមនុស្សបែកបាក់ព្រាត់ប្រាសគ្នា និងបន្សល់ទុកមនុស្សពិការ»៕
វីដេអូ៖