កណ្តាលៈ តុលាការខេត្តកណ្តាល បានសម្រេចធ្វើការចោទប្រកាន់ និងឃុំខ្លួនបុរសម្នាក់ក្នុងពន្ធនាគារខេត្តពីថ្ងៃទី ២២ សីហា ករណីញៀនថ្នាំហើយដុតផ្ទះឪពុកម្តាយបង្កើត ប្រព្រឹត្តនៅភូមិដោលទី១ ឃុំអំពៅព្រៃ ស្រុកកណ្តាលស្ទឹងខេត្ត។
លោក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាលប្រាប់នៅរសៀលថ្ងៃទី ២៣ សីហាថា បុរសឈ្មោះ សេន ម៉ៅ អាយុ ៣២ ឆ្នាំ ត្រូវបានចៅក្រមស៊ើបសួរ សម្រេចចេញដីកាឃុំខ្លួនក្នុងពន្ធនាគារខេត្តកណ្តាលពីថ្ងៃទី ២២ សីហា។
លោកថ្លែងថា៖ «លោកចៅក្រមអឿន វណ្ណា ចេញដីការឃុំ បន្ទាប់ពីខាងអយ្យការចោទពីបទធ្វើឱ្យខូចខាតដោយចេតនាមានស្ថានទន្ងន់ទោស និងប្រើប្រាស់គ្រឿងញៀនខុសច្បាប់»។
លោក ឡេង សុខរុន អធិការនគរបាលស្រុកកណ្តាលស្ទឹង ឱ្យដឹងនៅរសៀលថ្ងៃទី ២៣ សីហាថា មុនមានការដុតផ្ទះឪពុកម្តាយនេះ គឺដោយសារជនត្រូវចោទ ជំពាក់លុយគេ ហើយទាលុយម្តាយយកទៅសងគេ តែលោកមិនដឹងចំនួនប៉ុន្មានទេ។
លោកថា៖ «ជនត្រូវចោទ គាត់មិនត្រឹមតែដុតបំផ្លាញផ្ទះទេ តែគាត់ជាប់បទល្មើសប្រើប្រាស់គ្រឿងញៀនទៀត»។
លោក សុខរុន ឱ្យដឹងតាមសម្តីសាច់ញាតិជនសង្ស័យថា នៅមុនពេលកើតហេតុ ជនសង្ស័យបានឈ្លោះគ្នាជាមួយស្ត្រីជាម្តាយឈ្មោះយុន ផាត ភេទ ស្រី អាយុ ៦៨ ឆ្នាំ មាន ទីលំនៅ ភូមិ តា ដោល ទី១ ឃុំ អំពៅព្រៃ ស្រុក កណ្តាលស្ទឹង ខេត្តកណ្ដាល។
ពេលបង្កជម្លោះនោះ ជនសង្ស័យបានគំរាមស្ត្រីជាម្តាយថា គេនឹងដុតផ្ទះចោល បើមិនព្រមឱ្យលុយយកទៅសងបំណុលគេ។
លោកបន្តថា ដោយសារតែស្ត្រីជាម្តាយមិនព្រមឱ្យលុយ ទើបជនសង្ស័យដុតផ្ទះចោលនៅវេលាប្រហែលម៉ោង ១២ ថ្ងៃត្រង់ ថ្ងៃទី ២១ សីហា ខណៈស្ត្រីជាម្តាយមិននៅផ្ទះ។
ក្រោយបង្កហេតុ គឺជនសង្ស័យមិនបានរត់គេចខ្លួនទេ ហើយប្រជាពលរដ្ឋបានរាយការណ៍ទៅនគរបាលប៉ុស្តិ៍ឃុំអំពៅព្រៃ ក្នុងស្រុកកណ្តាលស្ទឹង ហើយកម្លាំងនគរបាល ក៏ឃាត់ខ្លួនជនសង្ស័យតែម្តង៕