ភ្នំពេញៈ លោក ហេង សំរិន ប្រធានរដ្ឋសភានៃព្រះរាជាណាចក្រកម្ពុជាបានថ្លែងទៅកាន់សន្និបាតប្រចាំឆ្នាំនៃអន្តរសភា-អាស៊ាន (AIPA) ដោយ បានជំរុញឱ្យអង្គការនីតិប្បញ្ញត្តិក្នុងតំបន់មួយនេះ កសាងសមត្ថភាព ឌីជីថល និងការលើកកម្ពស់នៃការយល់ដឹងអំពីសន្តិសុខតាមប្រព័ន្ធអ៊ីនធឺណិតក្នុងការពង្រឹង ការគ្រប់គ្រងសន្តិសុខក្នុងតំបន់។
នៅក្នុងមហាសន្និបាតប្រចាំឆ្នាំលើកទី៤២ អន្តរសភា-អាស៊ាន តាមប្រព័ន្ធវីដេអូនៅថ្ងៃទី ២៣ ខែសីហា ដែលសភាប្រទេសប្រ៊ុយណេដារូស្សាឡឹមធ្វើជាម្ចាស់ផ្ទះនោះ លោក ហេង សំរិន ថ្លែងថា នៅក្នុងកាលៈទេសៈបច្ចុប្បន្ននេះ បច្ចេកវិទ្យាឌីជីថលត្រូវបានគេមើលឃើញថា កំពុងដើរតួនាទីយ៉ាងសំខាន់ក្នុងការជំរុញសម្ទុះនៃកំណើនសេដ្ឋកិច្ចឡើងវិញនៅក្រោយវិបត្តិនៃជំងឺកូវីដ ១៩ ក៏ដូចជាជំរុញកំណើនសេដ្ឋកិច្ចថ្មី ប្រកបដោយចីរភាព និងភាពធន់ជាងមុនទៅនឹងវិបត្តិផ្សេងៗ។
លោក ហេង សំរិន ថ្លែងទៀតថា ក្នុងការឈានឆ្ពោះទៅរកឌីជីថលតូបនីយកម្ម រមែងត្រូវប្រឈមទៅនឹងបច្ច័យអវិជ្ជមានមួយចំនួនដូចជា គម្លាតនៃការអភិវឌ្ឍឌីជីថល អក្ខរកម្មឌីជីថល និងសន្តិសុខតាមប្រព័ន្ធអ៊ីនធឺណិត ដែលជាបញ្ហាប្រឈមដ៏ធំមួយរបស់សកលលោកទាំងមូល ជាពិសេសប្រទេសកំពុងអភិវឌ្ឍន៍ ដែលមានធនធាន និងសមត្ថភាពនៅមានកម្រិត។
លោក ហេង សំរិន ថ្លែងថា៖ «យើងត្រូវមានកាតព្វកិច្ចក្នុងការវិនិយោគ និងបែកចែកធនធាន ដើម្បីលើកកម្ពស់អក្ខរកម្មឌីជីថលរបស់ប្រជាជនយើង។ ក្នុងន័យនេះ ខ្ញុំសូមជំរុញធ្វើកិច្ចសហប្រតិបត្តិការ សភាអាស៊ាន ដើម្បីកសាងហេដ្ឋារចនាសម្ព័ន្ធ ឌីជីថល ប្រកបដោយបរិយាប័ន្ន និងសុវត្ថិភាពខ្ពស់តាមរយៈ ប្រតិបត្តិការចែករំលែកព័ត៌មាន អំពីសន្តិសុខអ៊ីនធឺណិត និងកសាងច្បាប់ ជំរុញកិច្ចសហប្រតិបត្តិការរវាងវិស័យឯកជន និងសាធារណៈ»។
លោក ហេង សំរិន បានឱ្យដឹងទៀតថា ការជំរុញការកសាងសមត្ថភាព ឌីជីថល និងការលើកកម្ពស់នៃការយល់ដឹងអំពីសន្តិសុខតាមប្រព័ន្ធអ៊ីនធឺណិត ព្រមទាំងការពង្រឹងការគ្រប់គ្រងសន្តិសុខ តាមប្រព័ន្ធអ៊ីនធឺណិតជាដើម នេះដើម្បីទប់ទល់ទៅនឹងពិភពលោកកំពុងប្រឈមអស្ថិរភាព ខណៈដែលការគំរាមកំហែងដល់សន្តិភាពកំពុងកើតមានឡើងក្នុងទម្រង់ជាច្រើនក្នុងរយៈពេលជាច្រើនទសវត្សរ៍កន្លងមកនេះ។
លោកថ្លែងថា៖ «ពិភពលោកក៏ដូចជានៅក្នុងតំបន់ត្រូវការសន្តិភាព ដែលជាមូលដ្ឋានគ្រឹះដ៏សំខាន់ឈានទៅរកការអភិវឌ្ឍជឿនលឿន។ ជាមួយគ្នានេះ សន្តិភាព និងការអភិវឌ្ឍត្រូវតែដើរទន្ទឹមគ្នា ដែលចាំបាច់ត្រូវតែថែរក្សា សន្តិភាព និងត្រូវខិតខំប្រឹងប្រែងលើកកម្ពស់ ការអភិវឌ្ឍ ឱ្យមានការវិវឌ្ឍជឿនលឿន ជាលំដាប់ដើម្បីឱ្យប្រជាជនរស់ក្នុងវិបុលភាព និងវឌ្ឍនភាព។ យោងតាមសេចក្តីប្រកាសព័ត៌មានរបស់រដ្ឋសភាកម្ពុជាកាលពីថ្ងៃទី ២៣ ខែសីហានេះបញ្ជាក់ថា មហាសន្និបាតអន្តរសភាអាស៊ានឆ្នាំនេះ ប្រារព្ធធ្វើឡើងក្រោមមូលបទ «ជំរុញកិច្ចសហប្រតិបត្តិការ សភាលើបរិយាប័ន្នឌីជីថលឆ្ពោះទៅសហគមន៍អាស៊ានឆ្នាំ ២០២៥»។
អន្តរសភាអាស៊ានជាអង្គការអន្តរសភា តំណាងស្ថាប័ននីតិប្បញ្ញត្តិនៃបណ្តាប្រទេសជាសមាជិក សមាគមប្រជាជាតិអាស៊ីអាគ្នេយ៍ (ASEAN) ដែលមាន ប្រទេសប្រ៊ុយណេដារូស្សាឡឹម កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ជាសមាជិក។
សេចក្តីប្រកាសព័ត៌មានដដែលនេះបានឱ្យដឹងថា អង្គការសភាមួយនេះ ជាការប្រមូលផ្ដុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូរបស់អាស៊ាន ក្នុងការជំរុញឱ្យសម្រេចបាននូវគោលដៅសហគមន៍អាស៊ានតែមួយ។
មហាសន្និបាតអន្តរសភា-អាស៊ានលើកទី ៤២ ដែលប្រទេសប្រ៊ុយណេដារូស្សាឡឹម ធ្វើជាម្ចាស់ផ្ទះពេលនេះប្រារព្ធធ្វើចាប់ពីថ្ងៃទី ២៣ ដល់ថ្ងៃទី ២៥ ខែសីហានេះ។
មហាសន្និបាតអន្តរសភា-អាស៊ាន បានប្រារព្ធធ្វើជារៀងរាល់ឆ្នាំ ដោយមានប្រទេសជាសមាជិកតាមវេននៃលំដាប់អក្ខរក្រមនៃឈ្មោះប្រទេសតាមអក្សរឡាតាំង។ សភាកម្ពុជានឹងក្លាយជាប្រធាន AIPA នេះលើកទី ៤៣ នៅឆ្នាំ ២០២២ ខាងមុខនេះ៕