.jpg)
គ្រូពេទ្យកំពុងចាក់វ៉ាក់សាំងបង្ការជំងឺកូវីដ ១៩ ជូនពលរដ្ឋក្នុងខណ្ឌទួលគោកពីថ្ងៃទី ១២ សីហា។ ហុង មិនា
ភ្នំពេញៈ លោកស្រី លី អៃឡែន តំណាងអង្គការសុខភាពពិភពលោក (WHO) ប្រចាំកម្ពុជាបានលើកឡើងថា ការសម្រេចចិត្តរបស់កម្ពុជាក្នុងការចាក់វ៉ាក់សាំងបង្ការជំងឺកូវីដ ១៩ ដូសទី ៣ នៅពេលនេះគឺជាការបោះជំហានទៅមុខ ១ ជំហានទៀត ក្នុងការការពារមុនពេលអ្វីៗកើតឡើង ខណៈដែលប្រទេសនេះបានបង្កើតនូវយុទ្ធសាស្ត្រ និងគោលនយោបាយក្នុងការឆ្លើយតបបានយ៉ាងល្អក្នុងការប្រយុទ្ធប្រឆាំងនឹងជំងឺឆ្លង។
នៅក្នុងដំណើរចុះបេសកកម្មផ្តល់ថវិកា និងសម្ភារមួយចំនួនទៅដល់មនុស្សវ័យ ១០០ ឆ្នាំឡើង ដែលបានចាក់វ៉ាក់សាំងកូវីដ ១៩ ជាមួយនឹងមន្ត្រីនៃក្រសួងសុខាភិបាលកាលពីថ្ងៃទី ២២ សីហា ក្នុងខេត្តព្រៃវែង លោកស្រី លី អៃឡែន បានថ្លែងថា កម្ពុជាបានបង្កើតនូវយុទ្ធសាស្ត្រ និងគោលនយោបាយ ក្នុងការឆ្លើយតបបានយ៉ាងល្អ ដែលក្នុងនោះបានផ្តោតលើគោលនយោបាយសំខាន់ៗ ដូចជាការដាក់ចេញនូវការអនុវត្តវិធានការអន្តរាគមន៍ដ៏មានប្រសិទ្ធភាពក្នុងការប្រយុទ្ធនឹងជំងឺកូវីដ ១៩។
លោកស្រីមានប្រសាសន៍ថា៖ «យុទ្ធនាការចាក់វ៉ាក់សាំងកូវីដ ១៩ ក្នុងប្រទេសកម្ពុជា មានដំណើរការយ៉ាងល្អ និងមានល្បឿនលឿន ហើយចំណុចមួយទៀត គឺការថែទាំ និងព្យាបាលអ្នកជំងឺកូវីដ ១៩ ជាពិសេសគឺការជួយសង្គ្រោះជីវិតអ្នកជំងឺដែលមានកម្រិតធ្ងន់ធ្ងរ គឺធ្វើឡើងទាន់ពេល។ ទាំងនេះគឺជាគោលនយោបាយមួយដែលល្អ»។
លោកស្រី លី អៃឡែន បន្តថា រាល់ជោគជ័យនៃយុទ្ធនាការ ឬយុទ្ធសាស្ត្រដែលដាក់ចេញ អ្វីដែលសំខាន់ជាងគេគឺការអនុវត្តក្នុងមូលដ្ឋានតែម្តង ដែលហៅថា ជាគន្លឹះនៃការឈានទៅរកភាពជោគជ័យនៃយុទ្ធសាស្ត្រដែលបានដាក់ចេញ។
លោកស្រីបានប្រាប់ថា៖ «តាមរយៈបេសកកម្មរបស់ខ្ញុំ ខ្ញុំបានឃើញដោយផ្ទាល់នូវការអនុវត្តបានយ៉ាងល្អនូវយុទ្ធនាការ ដែលបានដាក់ចេញ ហើយការសម្រេចចិត្តរបស់ប្រទេសកម្ពុជានៅពេលនេះ គឺជាការដើរទៅមុន ១ ជំហាននៃការការពារមុនពេលអ្វីៗដែលកើតឡើង»។
តំណាងអង្គការសុខភាពពិភពលោកប្រចាំកម្ពុជារូបនេះបានបន្ថែមថា ជាការពិតណាស់អ្វីៗដែលដំណើរការទាំងឡាយ គឺកើតឡើងចេញពីការរៀនសូត្រ ចេញពីបទពិសោធជាក់ស្តែង។ ដូចនេះហើយសម្រាប់នៅទូទាំងពិភពលោក ក្រុមការងារនៅតែប្រមូលនូវភ័ស្តុតាងជាក់ស្តែងថាតើនៅពេលណាដែលត្រូវធ្វើ និងត្រូវធ្វើដោយរបៀបម៉េចនូវការចាក់វ៉ាក់សាំងបន្ថែមទៀតនេះ។
លោកស្រីបានលើកឡើងថា ៖ «ខ្ញុំក៏សូមលើកទឹកចិត្តជំរុញឱ្យរាជរដ្ឋាភិបាល ឬប្រទេសកម្ពុជាចូលរួមប្រមូលភ័ស្តុតាងទាំងឡាយ ដែលយើងកំពុងតែរៀនសូត្រមកដល់ពេលនេះ ដើម្បីឈានទៅដល់ជួយជំរុញឱ្យមានភ័ស្តុតាងលក្ខណៈវិទ្យាសាស្ត្របន្ថែមទៀត ដើម្បីចាក់ដូសទី៣ នៃវ៉ាក់សាំងនេះ»។ យោងតាមរបាយការណ៍របស់ក្រសួងសុខាភិបាលគិតត្រឹមយប់ថ្ងៃទី ២២ ខែសីហា អ្នកដែលបានចាក់វ៉ាក់សាំងដូសទី ៣ ឬដូសជំរុញមានចំនួនជាង ៤៨ ម៉ឺននាក់ហើយ។
ចំណែកអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន បានប្រាប់ទៅដល់អភិបាលរាជធានី-ខេត្តសូមឱ្យបង្កើតទីតាំងចាក់វ៉ាក់សាំងកូវីដ ១៩ ដូសទី ១ និងដូសទី ២ ជូនដល់ប្រជាពលរដ្ឋ និងពលករដែលនៅសេសសល់មិនទាន់បានចាក់វ៉ាក់សាំងនេះ។
លោកស្រីបានឱ្យដឹងនៅថ្ងៃទី ២៣ ខែសីហាថា រហូតមកដល់ពេលបច្ចុប្បន្ននេះ ចំនួនប្រជាពលរដ្ឋដែលមានអាយុចាប់ពី ១៨ ឆ្នាំឡើង ហើយបានទទួលការចាក់វ៉ាក់សាំងកូវីដ ១៩ មិនទាន់បានគ្រប់តាមផែនការដែលបានគ្រោងទុកចំនួន ១០ លាននាក់នៅឡើយ។
លោកស្រី ឱ វណ្ណឌីន បញ្ជាក់ថា៖ «មូលហេតុនេះតម្រូវឱ្យអាជ្ញាធរគ្រប់ថ្នាក់ត្រូវធ្វើការអំពាវនាវ និងកៀរគរប្រជាពលរដ្ឋដែលមិនទាន់បានចាក់វ៉ាក់សាំងកូវីដ ១៩ ដូសទី១ នៅតាមមូលដ្ឋានភូមិ ឃុំ-សង្កាត់របស់ខ្លួន ព្រមទាំងរៀបចំផែនការ និងចលនាលើកទឹកចិត្តពួកគាត់ឱ្យមកទទួលការចាក់វ៉ាក់សាំង ដោយស្ម័គ្រចិត្តឱ្យបានទាន់ពេលវេលានៅតាមទីតាំងដែលកំពុងដំណើរការចាក់វ៉ាក់សាំងក្នុងពេលបច្ចុប្បន្ននេះឱ្យបានគ្រប់ៗគ្នា»។
នៅមានប្រជាពលរដ្ឋមានអាយុចាប់ពី ១៨ ឆ្នាំឡើងមួយចំនួន មិនទាន់បានមកចាក់វ៉ាក់សាំងកូវីដ ១៩ ដោយសារមូលហេតុផ្សេងៗ ដូចជាពលករ ឬប្រជាពលរដ្ឋ ឬនិស្សិតដែលបានវិលត្រឡប់មកពីបរទេស ហើយទើបបានបញ្ចប់ការធ្វើចត្តាឡីស័ក ស្ត្រីទើបសម្រាលកូនរួច និងមូលហេតុផ្សេងៗទៀត។ នេះបើតាមលោកស្រី ឱ វណ្ណឌីន។
លោកស្រីលើកឡើងថា៖ «ដូចនេះសូមអភិបាលរាជធានី-ខេត្តចាត់ចែងរៀបចំជាប់ជាប្រចាំទីតាំងចាក់វ៉ាក់សាំងកូវីដ ១៩ នៅតាមមូលដ្ឋានសុខាភិបាលសាធារណៈដែលប្រជាពលរដ្ឋងាយស្រួលទៅទទួលយកសេវាចាក់វ៉ាក់សាំង ដូចជាមណ្ឌលសុខភាព មន្ទីរពេទ្យបង្អែកស្រុក មន្ទីរពេទ្យបង្អែករាជធានី-ខេត្ត ឬទីតាំងមួយចំនួនទៀតដែលអាចផ្តល់លទ្ធភាពឱ្យប្រជាពលរដ្ឋដែលនៅសេសសល់អាចមកទទួលការចាក់វ៉ាក់សាំងឱ្យបានគ្រប់ៗគ្នា»។
គិតត្រឹមយប់ថ្ងៃទី ២២ សីហា ប្រជាពលរដ្ឋដែលបានចាក់វ៉ាក់សាំងរួចមានជាង ៨,៧ លាននាក់ ឬស្មើ ៨៧,២៦% ធៀបជាមួយចំនួនប្រជាជនគោលដៅ ១០ លាននាក់ ហើយសម្រាប់ក្រុមអាយុពី ១២ ឆ្នាំ ទៅក្រោម ១៨ ឆ្នាំ ចាក់បានចំនួន ៥០,៣៩% ធៀបជាមួយនឹងប្រជាជនគោលដៅជិត ២ លាននាក់៕
វីដេអូ៖
