ភ្នំពេញៈ វ៉ាក់សាំងបង្ការជំងឺកូវីដ ១៩ ស៊ីណូហ្វាមសរុបចំនួន ៦០ ម៉ឺនដូស ត្រូវបានប្រគល់ជូនកាកបាទក្រហមកម្ពុជា និងក្រសួងការពារជាតិនៅថ្ងៃទី ២៣ សីហា ដែលវ៉ាក់សាំងទាំងនេះជាជំនួយ ២ ផ្សេងគ្នា ក្នុងនោះវ៉ាក់សាំង ១០ ម៉ឺនដូសរបស់សមាគមជាតិកាកបាទក្រហមចិន និងវ៉ាក់សាំង ៥០ ម៉ឺនដូសរបស់រដ្ឋាភិបាល និងប្រជាជនចិនតាមរយៈកងទ័ពរំដោះប្រជាជនចិន។
នៅក្នុងពិធីប្រគល់ទទួលវ៉ាក់សាំងនាអាកាសយានដ្ឋានអន្តរជាតិភ្នំពេញ លោកស្រី ប៊ុន រ៉ានី ហ៊ុន សែន ដែលបានចុះទៅទទួលដោយផ្ទាល់បានថ្លែងថា ក្នុងបរិការណ៍បច្ចុប្បន្នជំនួយមនុស្សធម៌នេះ គឺជាទង្វើដ៏ថ្លៃថ្លាដែលមិនអាចកាត់ថ្លៃបាន និងបង្ហាញអំពីទឹកចិត្តឈឺឆ្អាល ប្រកបដោយមនសិការក្នុងការជួយគ្នាក្នុងគ្រាលំបាកនេះ ខណៈដែលវ៉ាក់សាំងបានក្លាយជាទំនិញយុទ្ធសាស្ត្រសំខាន់ក្នុងការប្រយុទ្ធប្រឆាំងនឹងជំងឺកូវីដ ១៩ នៅទូទាំងពិភពលោក។
លោកស្រីបានមានប្រសាសន៍ថា៖ «កាយវិការនេះបានឆ្លុះបញ្ចាំងពីចំណងមិត្តភាពកាន់តែស្អិតល្មួត និងឥតប្រួលប្រែជាយូរអង្វែងរវាងប្រទេសទាំង ២ ជាពិសេសកិច្ចសហប្រតិបត្តិការរវាងកាកបាទក្រហមកម្ពុជា និងសមាគមជាតិ កាកបាទក្រហមចិន»។
លោកស្រី ប៊ុន រ៉ានី បន្តថា ក្នុងស្ថានភាពបច្ចុប្បន្ន ការប្រយុទ្ធប្រឆាំងនឹងជំងឺកូវីដ ១៩ ទាមទារឱ្យមានការចូលរួម និងសហការយ៉ាងស្អិតល្មួតពីភាគីពាក់ព័ន្ធទាំងអស់។ លោកស្រីសង្កត់ធ្ងន់ថា៖ «ក្នុងន័យនេះ កាកបាទក្រហមកម្ពុជាប្តេជ្ញាបន្តខិតខំចូលរួម និងសហការជាមួយនឹងរាជរដ្ឋាភិបាលឱ្យកាន់តែខ្លាំងក្លាមួយកម្រិតទៀតក្នុងការប្រយុទ្ធប្រឆាំងនឹងជំងឺកូវីដ ១៩ តាមរយៈការចូលរួមចំណែកអប់រំផ្សព្វផ្សាយដល់ពលរដ្ឋតាមសហគមន៍ឱ្យអនុវត្តវិធានការសុខាភិបាល និងវិធានការរដ្ឋបាល ដើម្បីសុខភាពល្អរបស់គ្រួសារមួយ សហគមន៍មួយ និងសង្គមជាតិទាំងមូល»។
ជាមួយគ្នានេះដែរ វ៉ាក់សាំងកូវីដ ១៩ ស៊ីណូហ្វាមចំនួន ៥០ ម៉ឺនដូស ដែលជាជំនួយរបស់កងទ័ពរំដោះប្រជាជនចិនជំហានទី៣ ជូនដល់កងទ័ពកម្ពុជា ដែលត្រូវបានឯកអគ្គរដ្ឋទូតចិនប្រចាំកម្ពុជាលោក វ៉ាង វិនធាន ផ្តល់ជូនលោក ទៀ បាញ់ រដ្ឋមន្ត្រីក្រសួងការពារជាតិ។
លោក វ៉ាង វិនធាន បានមានប្រសាសន៍ថា៖ «ដរាបណាជំងឺកូវីដ ១៩ នៅកម្ពុជា មិនទាន់បានបញ្ចប់ នោះការផ្តល់ជំនួយរបស់ចិនមកដល់ប្រទេសកម្ពុជា ក៏មិនអាចទាន់បញ្ឈប់បានដែរ។ ដើម្បីឆ្លើយតបនឹងតម្រូវការរបស់រាជរដ្ឋាភិបាលកម្ពុជា រដ្ឋាភិបាល និងកងទ័ពចិនក៏បានបង្កើននូវកិច្ចខិតខំប្រឹងប្រែង ដើម្បីផ្តល់ជំនួយជាវ៉ាក់សាំង និងសម្ភារទប់ស្កាត់ជំងឺកូវីដ ១៩ ដើម្បីជួយសម្រួលដល់កម្ពុជាក្នុងការប្រយុទ្ធជាមួយនឹងជំងឺនេះឱ្យអស់ពីលទ្ធភាព»។
គិតមកដល់ពេលនេះសាធារណរដ្ឋប្រជាមានិតចិនបានផ្តល់វ៉ាក់សាំងកូវីដ ១៩ បានចំនួន ២២,២ លានដូសដល់កម្ពុជា ក្នុងនោះវ៉ាក់សាំងជាជំនួយមានចំនួន ៣,៧ លានដូស ហើយក្រៅពីនេះគឺរាជរដ្ឋាភិបាលកម្ពុជាបានបញ្ជាទិញ។
នាឱកាសនោះដែរ លោក ទៀ បាញ់ រដ្ឋមន្ត្រីក្រសួងការពារជាតិបានថ្លែងថា បច្ចុប្បន្ននេះ កម្ពុជាក៏ដូចជាបណ្តាប្រទេសជាច្រើនបាននិងកំពុងផ្តោតការយកចិត្តទុកដាក់ជាសំខាន់លើយុទ្ធនាការចាក់វ៉ាក់សាំង ដែលជាដំណោះស្រាយដ៏សមស្របបំផុតក្នុងការប្រយុទ្ធ និងការគ្រប់គ្រងការឆ្លងរាលដាលនៃជំងឺកូវីដ ១៩ រួមទាំងមេរោគបំប្លែងថ្មីប្រភេទដែលតា (Delta)។
លោកថា៖ «ជាការពិតការទទួលវ៉ាក់សាំងដំណាក់កាលទី ៣ ចំនួន ៥០ ម៉ឺនដូសដែលជាអំណោយរបស់រដ្ឋាភិបាលចិន តាមរយៈក្រសួងការពារប្រទេសចិន ផ្តល់ជូនក្រសួងការពារជាតិនាថ្ងៃនេះ ពិតជារួមចំណែកប្រកបដោយប្រសិទ្ធភាពក្នុងការទប់ស្កាត់ និងកាត់ផ្តាច់ការឆ្លងជំងឺកូវីដ ១៩ ប្រភេទថ្មី ដែលតា នៅក្នុងសហគមន៍នៅកម្ពុជាយ៉ាងស័ក្តិសិទិ្ធ»៕