ត្បូងឃ្មុំៈ មន្ត្រីនគរបាល ២ នាក់ ត្រូវបានផ្ទេរការងារពីអធិការដ្ឋានស្រុកអូររាំងឪ កាលពីថ្ងៃទី ២១ ខែសីហា ក្រោយពីមានវិវាទសូកប៉ាន់លុយកាក់ជាថ្នូរ ជាមួយការមិនបំពេញកាតព្វកិច្ចត្រឹមត្រូវតាមពេលវេលានៃម៉ោងការងាររបស់កងកម្លាំងនគរបាលជាតិ។
លោក ម៉ុន មាគ៌ា ស្នងការនគរបាលខេត្តត្បូងឃ្មុំ បានប្រាប់ ភ្នំពេញ ប៉ុស្តិ៍ថា៖ «ក្រោយពីមានផ្ទុះបាតុភាពនោះកើតឡើង យើងបានសម្រេចផ្ទេរភារកិច្ចមន្ត្រី និងថ្នាក់ដឹកនាំមន្ត្រីអង្គភាពអធិការស្រុកអូររាំងឪនោះមកបម្រើការងារជាបណ្ដោះអាសន្ននៅស្នងការដ្ឋាននគរបាលខេត្តត្បូងឃ្មុំជាបណ្ដោះអាសន្ន ដើម្បីធ្វើការពិចារណាលើកំហុសរបស់ខ្លួន។ ករណីនេះយើងបានដោះស្រាយហើយដោយផ្ទេរភារកិច្ចមន្ត្រីទាំង ២ មកបម្រើការងារជាបណ្ដោះអាសន្ននៅស្នងការដ្ឋាន ដើម្បីរង់ចាំការស្រាវជ្រាវបន្ថែម»។
លោក រ៉ុង ម៉ារឌី មន្ត្រីផ្នែកសេនាធិការនៃអធិការដ្ឋាននគរបាលស្រុកអូររាំងឪ បានថ្លែងឱ្យដឹងថា ជាថ្នូរជាមួយការមិនទៅបំពេញការងារពេញម៉ោង លោកត្រូវចំណាយថវិកា ៧០ ម៉ឺនរៀលក្នុង ១ ខែ បង់ទៅឱ្យថ្នាក់ដឹកនាំនៃអធិការដ្ឋាន ស្រុកអូររាំងឪ។
លោក ម៉ារឌី បានបញ្ជាក់ថា៖ «ជាថ្នូរក្នុងការទទួលបានការអនុញ្ញាតតាមការស្នើរបស់ខ្ញុំ ថ្នាក់ដឹកនាំអង្គភាពបានតម្រូវឱ្យខ្ញុំបង់លុយចូលជួយអង្គភាពក្នុង ១ ខែ ៧០ ម៉ឺនរៀលជាថ្នូរជាមួយពេលវេលាពាក់កណ្ដាលថ្ងៃដើម្បីរត់តាក់ស៊ីដើម្បីដោះបំណុល»។
លោកបានឱ្យដឹងទៀតថា៖ «នៅពេលខ្ញុំរកលុយបង់ចូលជួយអង្គភាពមិនគ្រប់តាមចំនួន ៧០ ម៉ឺនរៀល ស្រាប់តែថ្នាក់ដឹកនាំអង្គភាព គឺលោក លឿង រដ្ឋា អធិការនគរបាលស្រុកអូររាំងឪធ្វើរបាយការណ៍ទៅស្នងការចោទខ្ញុំថាលួចម៉ោងការងារទៅរត់តាក់ស៊ី ល្មើសបទបញ្ជារបស់កងកម្លាំងនគរបាលជាតិ»។
លោក លឿង រដ្ឋា អធិការនគរបាលស្រុកអូររាំងឪបានប្រាប់ភ្នំពេញប៉ុស្តិ៍ថា មន្ត្រីនគរបាលឈ្មោះ រ៉ុង ម៉ារឌី គឺជាមន្ត្រីអសកម្មការងារ និងបានលួចម៉ោងការងាររដ្ឋបាលរបស់អង្គភាពទៅរត់តាក់ស៊ី ល្មើសនឹងបទបញ្ជាផ្ទៃក្នុងរបស់កងកម្លាំងនគរបាលជាតិពិតមែន។
លោកបានបញ្ជាក់ថា៖ «ខ្ញុំមិនដឹងថា គាត់មានកិច្ចព្រមព្រៀង ឬការយោគយល់ពីថ្នាក់ដឹកនាំអង្គភាព កាលពីពេលណានោះទេ ប៉ុន្តែនៅពេលដែលខ្ញុំមកគ្រប់គ្រង នៅទីនេះប្រមាណជា ៥ ខែមកនេះ ខ្ញុំឃើញគាត់មិនមកធ្វើការងារនៅពេលព្រឹកនោះទេ។ ខ្ញុំបានណែនាំគាត់ជាច្រើនលើកមកហើយ មុនពេលខ្ញុំសម្រេចចិត្ត ធ្វើរបាយការណ៍អំពីករណីរបស់គាត់ទៅស្នងការ ដើម្បីមានចំណាត់ការដាក់ពិន័យតាមច្បាប់រដ្ឋបាល»។
លោកថា៖ «ខ្ញុំមិនដែលទទួលលុយពីគាត់ ឬពីមន្ត្រីណាផ្សេងទៀត សូម្បីតែ ១០០ រៀលនោះទេ។ ប៉ុន្តែគាត់ប្រគល់លុយនោះឱ្យមន្ត្រីណាយកមកដោះស្រាយភាពខ្វះខាតនៅក្នុងអង្គភាពនោះ គឺខ្ញុំមិនដឹងទេ»៕
វីដេអូ៖