.jpg)
អាជ្ញាធរបាញ់ថ្នាំសម្លាប់មេរោគ ក្រោយរកឃើញវិជ្ជមានជំងឺកូវីដ ១៩ លើប្រជាពលរដ្ឋរស់នៅភូមិចំការឪឡឹក សង្កាត់កាកាប កាលពីថ្ងៃទី ១៦ កក្កដា។ ហេង ជីវ័ន
ភ្នំពេញៈ ដោយគិតទាំងអ្នកទើបរកឃើញឆ្លងថ្មីចំនួន ៤៦៦ នាក់ផង បានធ្វើឱ្យចំនួនអ្នកឆ្លងវីរុសកូវីដ ១៩ នៅកម្ពុជា កើនឡើងដល់ជាង ៩ ម៉ឺននាក់ហើយ ខណៈអ្នកស្លាប់ក៏បានកើនឡើងដល់ជិត ២ ពាន់នាក់ផងដែរ។ នេះបើតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ២៤ ខែសីហានេះ។
ក្រសួងបានប្រកាសថាអ្នកស្លាប់ដោយសារជំងឺកូវីដ ១៩ បន្ថែមទៀត មានចំនួន ១៣ នាក់ និងអ្នកដែលទើបរកឃើញឆ្លងថ្មីមានចំនួន ៤៦៦ នាក់ទៀត ខណៈអ្នកជាសះស្បើយថ្មីមានចំនួន ៥១២ នាក់។ ការរកឃើញឆ្លងថ្មីនេះ មានករណីឆ្លងក្នុងសហគមន៍ចំនួន ៣៧២ នាក់ និងអ្នកដំណើរពីបរទេសចំនួន ៩៤ នាក់។
គិតត្រឹមព្រឹក ថ្ងៃទី ២៤ ខែ សីហា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ៩០ ១០៧ នាក់ អ្នកជាសះស្បើយចំនួន ៨៦ ១៣០ នាក់ និងអ្នកស្លាប់បានកើនឡើងសរុបចំនួន ១៨២១ នាក់ផងដែរ៕
