បន្ទាយមានជ័យៈ តុលាការខេត្តបន្ទាយមានជ័យបង្គាប់ឱ្យសមត្ថកិច្ចឃុំខ្លួនបុរសម្នាក់ក្នុងពន្ធនាគារនាថ្ងៃទី ២២ សីហា ពាក់ព័ន្ធនឹងការរំលោភសេពសន្ថវៈកូនស្រីបង្កើត ដែលប្រព្រឹត្តនៅនឹងផ្ទះរបស់ខ្លួនស្ថិតនៅសង្កាត់-ក្រុងប៉ោយប៉ែត ខេត្តបន្ទាយមានជ័យ កាលពីខែកក្កដា ឆ្នាំ ២០២១។
លោកស្រី ឌី សុជាតិ ស្នងការរងទទួលផែននគរបាលប្រឆាំងការជួញដូរមនុស្ស និងការពារអនីតិជនខេត្តបន្ទាយមានជ័យឱ្យដឹង នៅថ្ងៃទី ២៣ សីហា ថា បុរសឈ្មោះ ឈុន រី អាយុ ៣៨ ឆ្នាំត្រូវបានចៅក្រមស៊ើបសួរចេញដីកាបង្គាប់ឱ្យកម្លាំងសមត្ថកិច្ចលោកស្រីនាំទៅឃុំក្នុងពន្ធនាគារខេត្តហើយនៅថ្ងៃទី ២២ សីហា។
លោកស្រីថ្លែងថា៖ «លោកចៅក្រមស៊ើបសួរ ស៊ឺម ពិចិត្រ គឺលោកជាអ្នកសម្រេចចេញដីកាឃុំ។ ជនម្នាក់នេះត្រូវចោទបទរំលោភសេពសន្ថវៈតាមមាត្រា ២៣៩ នៃក្រមព្រហ្មទណ្ឌ»។
បើតាមមាត្រា ២៣៩ នៃក្រមព្រហ្មទណ្ឌនេះ ជនត្រូវចោទត្រូវប្រឈមនឹងការផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។ លោក ព្រំ វិចិត្រ អធិការរងទទួលផែននគរបាលព្រហ្មទណ្ឌក្រុងប៉ោយប៉ែតប្រាប់នៅថ្ងៃទី ២៣ សីហា ថា ក្មេងស្រីរងគ្រោះជាកូនបង្កើត ឈ្មោះ រ.ថ. អាយុ ១៤ ឆ្នាំរស់នៅសង្កាត់-ក្រុងប៉ោយប៉ែត ខេត្តបន្ទាយមានជ័យ។
លោកអធិការរងប្រាប់តាមសម្តីក្មេងស្រីរងគ្រោះថា ឪពុករបស់នាងបានប្រព្រឹត្តលើរូបកាយនាងតាំងពីយប់ថ្ងៃទី ២៣ កក្កដាឆ្នាំ ២០២១ មកម្ល៉េះ។ នៅព្រឹកថ្ងៃទី ២៣ កក្កដា ម្តាយ និងយាយរបស់នាងបានទៅលេងផ្ទះសាច់ញាតិនៅភូមិផ្សេង ហើយពួកគាត់បានសម្រាកនៅផ្ទះសាច់ញាតិនោះ ១ យប់។ លុះនៅយប់ថ្ងៃដដែលក្មេងស្រីរងគ្រោះ និងឪពុករបស់នាងនៅផ្ទះតែ ២ នាក់ទេ ហើយនៅវេលាម៉ោងជាង ៩ យប់ស្រាប់តែជនល្មើសជាឪពុកបង្កើតចាប់នាងរំលោភបានសម្រេច ខណៈនាងកំពុងតែដេកនៅលើគ្រែខាងមុខផ្ទះតែម្នាក់ឯង។
បើតាមលោកអធិការរង មុននឹងជនសង្ស័យចាប់ក្មេងស្រីរងគ្រោះរំលោភ គឺជនសង្ស័យបានយកដៃខ្ទប់មាត់ក្មេងស្រី ហើយប្រាប់មិនឱ្យស្រែក បើហ៊ានតែស្រែកឮដល់អ្នកជិតខាង គឺជនសង្ស័យសម្លាប់ចោល។ លោកបន្តថា ជនសង្ស័យតែងតែធ្វើសកម្មភាពចាប់ក្មេងរងគ្រោះរំលោភជាហូរហែបន្តបន្ទាប់ តាំងពីខែកក្កដា ឆ្នាំ ២០២១ រហូតមកដល់ដើមខែសីហា ឆ្នាំ ២០២១។ ចំពោះសកម្មភាពរំលោភម្តងៗគឺជនសង្ស័យតែងធ្វើនៅពេលយប់ស្ងាត់ ឬនៅពេលថ្ងៃគ្មាននរណានៅផ្ទះ។
លោក វិចិត្រ បញ្ជាក់ថា៖ «ក្មេងរងគ្រោះប្រាប់ខ្ញុំថា នាងត្រូវបានឪពុកចាប់រំលោភបានចំនួន ៧ ដង។ យើងដឹង និងចាប់ជនសង្ស័យ គឺតាមអ្វីដែលក្មេងបំភ្លឺប្រាប់»។
លោកឱ្យដឹងតាមសម្តីម្តាយក្មេងស្រីបន្តថា នៅថ្ងៃទី ២០ សីហា ស្ត្រីជាម្តាយបានសង្កេតឃើញកូនស្រីខ្លួនមានអាកប្បកិរិយាខុសប្រក្រតី ក៏ហៅកូនសួរ ហើយក្មេងរងគ្រោះបានប្រាប់ថា ឪពុកបានចាប់នាងរំលោភ។ បន្ទាប់ពីឮកូនស្ត្រីនិយាយរៀបរាប់ប្រាប់ពីដំណើររឿងអស់ហើយទើបស្ត្រីជាម្តាយបានទៅប្តឹងនៅប៉ុស្តិ៍នគរបាលប៉ោយប៉ែតនៅថ្ងៃទី ២០ សីហា ហើយសមត្ថកិច្ចបានចុះឃាត់ខ្លួនជនសង្ស័យតែម្តង។
លោកអធិការរងបន្តថា ជនសង្ស័យធ្លាប់ជាប់ពន្ធនាគាររយៈពេល ១៥ ឆ្នាំម្តងមកហើយ ពីបទរំលោភលើក្មេងស្រីជាអនីតិជនក្រោមអាយុ ១៥ ឆ្នាំជាកូនអ្នកភូមិ និងទើបចេញពីពន្ធនាគារបានប្រហែល ១ ឆ្នាំប៉ុណ្ណោះ៕