.jpg)
ការប្រគល់ និងទទួលសម្ភារវេជ្ជសាស្ត្រពីថ្ងៃ ២៤ សីហា។ រូប ក្រសួងសុខាភិបាល
ភ្នំពេញៈ អង្គការសុខភាពពិភពលោក (WHO) ប្រចាំកម្ពុជាបានប្រគល់នូវជំនួយជាសម្ភារបរិក្ខារវេជ្ជសាស្ត្រដល់រាជរដ្ឋាភិបាលកម្ពុជាតាមរយៈក្រសួងសុខាភិបាល ដើម្បីប្រើប្រាស់ក្នុងការឆ្លើយតបការរាតត្បាតជំងឺកូវីដ ១៩ ដែលគិតជាទឹកប្រាក់ជាង ៣២ ម៉ឺនដុល្លារអាមេរិក។
ការប្រគល់ និងទទួលនូវសម្ភារបរិក្ខារវេជ្ជសាស្ត្រទាំងនេះត្រូវបានធ្វើឡើងនាព្រឹកថ្ងៃទី ២៤ ខែសីហា នៅឃ្លាំងឱសថកណ្តាលនៃក្រសួងសុខាភិបាល ក្រោមអធិបតីរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាល លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជា និងមន្ត្រីជាន់ខ្ពស់ជាច្រើនរូបទៀត។
នាឱកាសនោះលោកស្រី លី អៃឡែន តំណាងអង្គការសុខភាពពិភពលោកបានកោតសរសើររាជរដ្ឋាភិបាលកម្ពុជា និងក្រសួងសុខាភិបាល ស្ថាប័នពាក់ពាក់ព័ន្ធ និងប្រជាជនកម្ពុជាដែលបានចូលរួមទប់ស្កាត់ការរីករាលដាលនៃវីរុសកូវីដ ១៩ ដែលមកទល់ពេលនេះការរាលដាលអាចគ្រប់គ្រងបាន។
លោកស្រីបានថ្លែងថា៖ «អង្គការសុខភាពពិភពលោកនឹងនៅតែបន្តកិច្ចសហការ និងគាំទ្រវិស័យសុខាភិបាលកម្ពុជា មិនត្រឹមតែការប្រយុទ្ធនឹងជំងឺកូវីដ ១៩ នេះប៉ុណ្ណោះទេ»។
ជាមួយគ្នានោះដែរ លោក ម៉ម ប៊ុនហេង ក៏បានថ្លែងអំណរគុណចំពោះអង្គការសុខភាពពិភពលោក ទាំងការិយាល័យនៅកម្ពុជា និងការិយាល័យប្រចាំតំបន់ប៉ាស៊ីហ្វិកខាងលិច ដែលតែងជួយឧបត្ថម្ភគាំទ្រទាំងថវិកា និងបច្ចេកទេស ដល់វិស័យសុខាភិបាលកម្ពុជា។
លោកមានប្រសាសន៍ថា៖ «ការជួយឧបត្ថម្ភគាំទ្រនេះ សរបញ្ជាក់ពីការយកចិត្តទុកដាក់ខ្ពស់របស់អង្គការសុខភាពពិភពលោកចំពោះរាជរដ្ឋាភិបាល និងប្រជាជនកម្ពុជា ជាពិសេសក្នុងកាលៈទេសៈបច្ចុប្បន្ន ដែលយើងបាននិងកំពុងខិតខំប្រឹងប្រែងរួមគ្នា ដើម្បីជំរុញវិធានការការពារ ទប់ស្កាត់ និងឆ្លើយតបការរាតត្បាតនៃកូវីដ ១៩ ឱ្យបានកាន់តែឆាប់រហ័ស»។
ជំនួយជាឧបករណ៍សម្ភារបរិក្ខារវេជ្ជសាស្ត្រដែលអង្គការសុខភាពពិភពលោកប្រចាំកម្ពុជាផ្តល់ជូនរាជរដ្ឋាភិបាលកម្ពុជាមានដូចជា សម្ភារ ប្រព័ន្ធត្រជាក់ រួមមាន៖ រថយន្តបំពាក់ប្រព័ន្ធត្រជាក់ធុនធ្ងន់ សម្រាប់ដឹកវ៉ាក់សាំងចំនួន ៣ គ្រឿង និងបរិក្ខារបន្ទាប់បន្សំ,សម្ភារបរិក្ខារវេជ្ជសាស្ត្រ រួមមាន៖ ម៉ាស់ចំនួន ១៦ ម៉ឺនម៉ាស់ ស្រោមដៃចំនួន ១៦ ម៉ឺន និងជែលលាងដៃចំនួន ៨ ៧៥០ ដប និងសម្ភារអប់រំសុខភាពចំនួន ៣០ ម៉ឺនប្រដាប់ផងដែរ។ សម្ភារទាំងនេះបើគិតសរុបជាទឹកប្រាក់មានចំនួនជាង ៣២ ម៉ឺនដុល្លារអាមេរិក។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានលើកឡើងកាលពីសប្តាហ៍មុនថា តំណាងអង្គការសុខភាពពិភពលោកប្រចាំកម្ពុជា លោកស្រី លី អៃឡែន តែងតែចូលរួមដោយខិតខំប្រឹងប្រែងយ៉ាងខ្លាំងក្លា និងគាំទ្រនូវគំនិតផ្តួចផ្តើមរបស់ក្រសួងសុខាភិបាល និងជួយជំរុញកៀរគរនូវធនធានមួយចំនួនផងដែរ ថ្វីដ្បិតមិនបានច្រើនដល់ទូទាំងប្រទេសនៅឡើយក៏ដោយ។
លោកបានបញ្ជាក់ថា៖ «ការគាំទ្របង្ហាញយ៉ាងច្បាស់ថា កិច្ចសហការ និងសហប្រតិបត្តិការដ៏ជិតស្និទ្ធរវាងអង្គការសុខភាពពិភពលោកជាមួយនឹងក្រសួងសុខាភិបាលគឺតែងតែជំរុញឱ្យមានការអនុវត្ត ក៏ដូចជាសមិទ្ធផលនានាពាក់ព័ន្ធនឹងការទប់ស្កាត់ការចម្លងជំងឺកូវីដ ១៩»៕
