ភ្នំពេញៈ ក្រសួងប្រៃសណីយ៍ និងទូរគមនាគមន៍ ប្រកាសបើកទូលាយចែកចាយឧបករណ៍តេស្តរហ័ស (Rapid Test) កូវីដ ១៩ ចំនួន ២ ប្រភេទដល់ក្រសួង ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថាន ឱសថស្ថានរង ភ្នាក់ងារចែកចាយ និងសាធារណជន ដែលឧបករណ៍នេះនាំចូលពីប្រទេសកូរ៉េ និងប្រទេសចិន ក្នុងតម្លៃដើម។
សេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍កាលពីថ្ងៃទី ២៣ សីហា ស្តីពីការចែកចាយឧបករណ៍តេស្តរហ័សកូវីដ ១៩ បញ្ជាក់ថា ដើម្បីបន្តចូលរួមទប់ស្កាត់ការឆ្លងរាលដាលនៃជំងឺកូវីដ ១៩ បានទាន់ពេលវេលា ក្រសួងបើកទូលាយចែកចាយឧបករណ៍តេស្តរហ័សជូនក្រសួង ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថាន ឱសថស្ថានរង ភ្នាក់ងារចែកចាយ និងសាធារណជននូវឧបករណ៍តេស្តរហ័ស ២ ប្រភេទ។
ឧបករណ៍តេស្តរហ័សទាំង ២ ប្រភេទ រួមមាន ១ ឧបករណ៍តេស្តរហ័សអង់ទីហ្ស៊ែនកូវីដ ១៩ SD Biosensor (Standard Q) ផលិតនៅប្រទេសកូរ៉េ ១ ប្រអប់មាន ២៥ ឧបករណ៍តេស្ត ហើយ ១ ឧបករណ៍តេស្តតម្លៃ ៣,៧ ដុល្លារអាមេរិក (ត្បារយកសំណាកពីក្នុងរន្ធច្រមុះ)។ ២ ឧបករណ៍តេស្តរហ័សអង់ទីហ្ស៊ែនកូវីដ ១៩ Healgen Antigen Rapid Test ផលិតនៅប្រទេសចិន ១ ប្រអប់ មាន ២០ ឧបករណ៍តេស្ត ហើយ ១ ឧបករណ៍តេស្តតម្លៃ ២ ដុល្លារអាមេរិក (ត្បារយកសំណាកពីក្នុងរន្ធច្រមុះ)។
លោក សូ វិសុទ្ធី រដ្ឋលេខាធិការ និងជាអ្នកនាំពាក្យក្រសួងប្រៃសណីយ៍ និងទូរគមនាគមន៍ថ្លែងថា ក្នុងរយៈពេល ២ ខែខាងមុខទៀតនេះ ក្រសួងប្រៃសណីយ៍ត្រៀមនាំចូលឧបករណ៍តេស្តរហ័សក្នុងបរិមាណគ្រប់គ្រាន់តាមតម្រូវការរបស់ក្រសួង ស្ថាប័ន រោងចក្រ ក្រុមហ៊ុន សហគ្រាស គ្លីនិក និងឱសថស្ថាន។
លោកថ្លែងថា៖ «ក្រសួងប្រៃសណីយ៍បានទិញឧបករណ៍តេស្តរហ័សពីរោងចក្រ ប្រទេស ចំនួន ២ គឺ រោងចក្រនៅប្រទេសកូរ៉េខាងត្បូង និងប្រទេសចិន។ បច្ចុប្បន្នក្រសួងនៅបន្តផ្គត់ផ្គង់ឧបករណ៍តេស្តនេះជាធម្មតា ហើយបើកលក់ជូនសម្រាប់សាធារណជនគ្រប់គ្នា»។
បើតាមលោក វិសុទ្ធី ដោយសារមានសំណូមពរពីប្រជាពលរដ្ឋជាច្រើន ដូច្នេះក្រសួងបានបើកលក់កាន់តែទូលំទូលាយទាំងឧបករណ៍តេស្ដមកពីប្រទេសកូរ៉េ និងចិន សម្រាប់ការប្រើប្រាស់តាមក្រសួង ស្ថាប័ន រោងចក្រ ក្រុមហ៊ុន សហគ្រាស គ្លីនិក ឱសថស្ថាន និងសម្រាប់ការប្រើប្រាស់តាមគ្រួសារដោយមិនមានកំណត់លក្ខខណ្ឌទេ។ ប៉ុន្តែសម្រាប់ការប្រើប្រាស់តាមគេហដ្ឋានសូមអនុវត្តតាមការណែនាំរបស់ក្រសួងសុខាភិបាល ដូចមានក្នុងតំណភ្ជាប់វីដេអូពីរបៀបប្រើប្រាស់ https://fb.watch/v/2Sc5HvMbT/។
សេចក្ដីជូនដំណឹងបានឱ្យដឹងថា ក្រសួង ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថានឱសថស្ថានរង ភ្នាក់ងារចែកចាយ និងសាធារណជនអាចបញ្ជាទិញឧបករណ៍តេស្តចាប់ពី ១ ប្រអប់ឡើងទៅដោយចូលទៅកាន់ប្រព័ន្ធស្វ័យប្រវត្តិកម្ម ដែលមានតំណភ្ជាប់ mptc.gov.kh/rt ឬអាចទៅទិញដោយផ្ទាល់នៅទីស្ដីការក្រសួងប្រៃសណីយ៍ និងទូរគមនាគមន៍ ដែលមានអាសយដ្ឋាន អគារលេខ ១៣ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ។
ចំពោះការទូទាត់អាចផ្ទេរមកគណនីធនាគារវឌ្ឍនៈអាស៊ីចំកាត់ (ABA Bank) របស់ក្រសួងដែលមានឈ្មោះគណនី MPTC និងលេខគណនី 567 789 123។ សម្រាប់ព័ត៌មានបន្ថែមសូមទាក់ទងទូរស័ព្ទលេខ ១២៣/ ០៦៧ ៨១៨ ៧៨២ / ០១៧ ៨៤៨ ១០៨ / ០៧៧ ៨៦៧ ៩៥៧ ជារៀងរាល់ថ្ងៃ៕
វីដេអូ៖