ភ្នំពេញៈ ស្ថានទូតអូស្ត្រាលី និងក្រសួងអប់រំ យុវជន និងកីឡា រួមគ្នាបរិច្ចាគសៀវភៅជាង ១ ០០០ ក្បាល ដល់សាលារៀនមួយចំនួនក្នុងប្រទេសកម្ពុជា ដើម្បីបន្តលើកកម្ពស់សារៈសំខាន់នៃការអាន និងការអប់រំ ខណៈដែលសាលារៀនត្រូវបានបិទ ឬប្តូរមករៀនបង្រៀនតាមអ៊ីនធឺណិត ដោយសារតែជំងឺកូវីដ ១៩។
ពិធីប្រគល់សៀវភៅនេះបានធ្វើឡើងនៅថ្ងៃទី ២៤ សីហា ដោយមានការចូលរួមពីលោក ហង់ជួន ណារ៉ុន រដ្ឋមន្ត្រីក្រសួងអប់រំ និងលោក Pablo Kang ឯកអគ្គរាជទូតអូស្ត្រាលីប្រចាំនៅកម្ពុជា ព្រមទាំងមន្ត្រីពាក់ព័ន្ធតាមប្រព័ន្ធអនឡាញដោយក្នុងនោះក៏មានសិស្សសាលាបឋមសិក្សា ២ នាក់បានបំពេញការងារយ៉ាងអស្ចារ្យក្នុងការអានរឿងនិទានដែលពួកគេចូលចិត្តផងដែរ។
លោក Pablo Kang បានលើកឡើងក្នុងសេចក្តីប្រកាសព័ត៌មានចុះថ្ងៃទី ២៤ សីហា ថា កម្មវិធីបរិច្ចាគសៀវភៅដល់សាលាបឋមសិក្សាព្រះនរោត្តម និងសាលារៀននានាក្នុងប្រទេស គឺដើម្បីអបអរសប្តាហ៍ សៀវភៅរបស់អូស្ត្រាលី ដែលប្រព្រឹត្តទៅនៅថ្ងៃទី ២១ ដល់ ២៧ សីហាផងដែរ។
លោកបញ្ជាក់ថា៖ «អូស្ត្រាលីជាអ្នកគាំទ្រប្រកបដោយមោទនភាពទៅលើសិទ្ធិទទួលបានការអប់រំសម្រាប់កុមារកម្ពុជាទាំងអស់ និងបានប្រគល់សៀវភៅចំនួន ១ ៣០៨ ក្បាល ដល់សាលាបឋមសិក្សាព្រះនរោត្តម និងសាលារៀននានាក្នុងប្រទេស ដែលជាអំណោយរបស់បុគ្គលិកស្ថានទូតអូស្ត្រាលី និងក្រុមគ្រួសារ សមាជិកសហគមន៍ និងលោក ម៉េង ហៀង អគ្គនាយកក្រុមហ៊ុន ម៉ូនូមែនប៊ុក»។
លោកឯកអគ្គរាជទូត Kang បានថ្លែងបន្ថែមថា ការផ្តោតលើអក្ខរកម្ម និងភាពរីករាយនៃការអានជាការសំខាន់ជាងពេលណាៗទាំងអស់ ខណៈពេលដែលសាលារៀនត្រូវបានបិទ ឬប្ដូរមកបង្រៀនតាមអ៊ីនធឺណិតដោយសារតែជំងឺកូវីដ ១៩។ លោកសង្ឃឹមថា សាលានឹងអាចបើកដំណើរការឡើងវិញ ក្នុងពេលឆាប់ៗនេះក្នុងបរិបទដែលមានសុវត្ថិភាពពីជំងឺកូវីដ។
លោកបានរៀបរាប់ទៀតថា៖ «ខណៈពេលដែលវាមានការពិបាកក្នុងការស្វែងរកវិធីបង្រៀនកុមារនៅតាមផ្ទះក្នុងអំឡុងពេលមានជំងឺរាតត្បាតនេះ សប្ដាហ៍សៀវភៅរំឭកយើងថា ការអានអាចជំរុញបំផុសគំនិតយើង ហើយយើងទាំងអស់គ្នាអាចចំណាយពេលដ៏រីករាយ អានសៀវភៅល្អៗជាមួយកូនៗរបស់យើង»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានលើកឡើងថា នៅថ្ងៃ ២៤ សីហា ក្រសួងអប់រំ និងស្ថានទូតអូស្ត្រាលីបានរៀបចំកម្មវិធីប្រគល់សៀវភៅអានចំនួន ១ ០០០ ក្បាលជូនដល់សាលាបឋមសិក្សាមួយចំនួន រួមទាំងសាលាបឋមសិក្សាព្រះនរោត្តម។
លោកបានបន្តថា តំណាងឱ្យក្រសួងអប់រំលោកសូមថ្លែងអំណរគុណដល់ស្ថានទូតអូស្ត្រាលី សមាជិកសហគមន៍សភាពាណិជ្ជកម្មអូស្ត្រាលី និង សាលាអូស្ត្រាលីអន្តរជាតិភ្នំពេញ និងក្រុមហ៊ុនម៉ូនូមែនប៊ុកដែលបានផ្តល់សៀវភៅទាំងនេះដល់កុមារកម្ពុជា។
លោកបានបញ្ជាក់ថា៖ «ដៃគូអភិវឌ្ឍន៍ រួមមានស្ថានទូតអូស្ត្រាលី បាននិងកំពុងដើរតួនាទីសំខាន់មួយក្នុងការចូលរួមលើកកម្ពស់គុណភាពមូលធនមនុស្សកម្ពុជា តាមរយ:គ្រប់រូបភាពដូចជាការផ្តល់សៀវភៅអានដែលជាមូលដ្ឋានគ្រឹះមួយក្នុងការលើកកម្ពស់គុណភាពអប់រំ»។
លោកបានបញ្ជាក់ថា ក្រសួងអប់រំ ស្វាគមន៍ជានិច្ច ចំពោះកិច្ចសហការវិជ្ជមានពីគ្រប់ភាគីពាក់ព័ន្ធក្នុងការលើកកម្ពស់អំណាន ដើម្បីចូលរួមចំណែកការងារកំណែទម្រង់អប់រំ យុវជន និងកីឡា៕