ពោធិ៍សាត់ៈ កម្លាំងចម្រុះនៃគណៈបញ្ជាការឯកភាពខេត្តពោធិ៍សាត់កំពុងបើកប្រតិបត្តិការចុះបង្ក្រាប និងដកហូតឧបករណ៍នេសាទល្មើសច្បាប់នៅក្នុងស្រុកក្រគរ ស្រុកកណ្តៀង និងស្រុកបាកាន ដើម្បីថែរក្សាត្រីពូជឱ្យបង្កបង្កើតកូនត្រីបានគ្រប់គ្រាន់សម្រាប់ពេលបើករដូវនេសាទវិញ។
លោក ខូយ រីដា អភិបាលរង និងជាអនុប្រធានគណៈបញ្ជាការឯកភាពខេត្តពោធិ៍សាត់ថ្លែងនៅថ្ងៃទី ២៤ ខែសីហាថា លោកកំពុងមានវិធានការក្នុងការចុះបង្ក្រាប និងដកហូតឧបករណ៍នេសាទល្មើសច្បាប់តាមបណ្តាស្រុកជាប់ផ្ទៃទឹកបឹងទន្លេសាប នៅគោលដៅទាំង ៣ ស្រុក ដែលមានស្រុកក្រគរ ស្រុកកណ្តៀង និងស្រុកបាកាន ដើម្បីរក្សាការពារកុំឱ្យបាត់បង់ពូជត្រីនៅក្នុងអំឡុងពេលរដូវបិទនេសាទ។
លោក ខូយ រីដា ប្រាប់ថានៅថ្ងៃទី ២៣ ខែសីហា លោកបានដឹកនាំកម្លាំងជំនាញពាក់ព័ន្ធចុះទៅដោយផ្ទាល់ ដើម្បីពិនិត្យ និងដកហូតឧបករណ៍ល្មើស ដែលមានមងក្រឡាញឹក និងលូស្បៃមុងបានចំនួន ១៣ ០០០ ម៉ែត្រ ក្នុងឃុំកំពង់លួង និងឃុំកំពង់ប្រាក់ ស្រុកក្រគរ ខេត្តពោធិ៍សាត់។
លោកថ្លែងថា៖ «ឧបករណ៍ដែលយើងបង្ក្រាបបាននេះ គឺជារបាំងមិនឱ្យត្រីចេញរួច មិនថាត្រីប៉ុនណាទេកាលណាប៉ះជាមួយឧបករណ៍ហ្នឹងហើយគឺទៅណាអត់រួចទេ ហើយយើងពិនិត្យជារួមទៅក្នុងកាលៈទេសៈនេះ ប្រសិនបើយើងបណ្តោយគឺអត់បានទេ ថ្ងៃមុខយើងនឹងបាត់មច្ឆាជាតិទាំងអស់»។
លោក រីដា បញ្ជាក់ថា ឧបករណ៍នេសាទល្មើសដែលបង្ក្រាបនឹងដកហូតបាន មិនធ្វើការដុតបំផ្លាញចោលឡើយ។ គឺទុកដើម្បីឱ្យខាងមន្ត្រីកសិកម្មយកទៅឱ្យសហគមន៍ ឬប្រជាពលរដ្ឋដែលចិញ្ចឹមសត្វ ឬដាំបន្លែផ្សេងៗយកប្រើការបានជាប្រយោជន៍។
លោកថ្លែងថា៖ «ខ្ញុំបើដុត ខ្ញុំដុតតែខ្មោចមងដែលប្រើលែងកើតនៅកប់នឹងបាតទន្លេ។ អ៊ីចឹងខែប្រាំងឡើងខ្ញុំឱ្យមន្ត្រីបើកកាណូតដើរប្រមូលមងចាស់ៗអត់ឱ្យកប់ក្នុងផុកក្នុងអីទេវានាំឱ្យរាក់ទន្លេ។ សំរាមក៏យើងប្រមូលដែរ ហើយយើងដុតម្តង ២ ទៅ ៣ តោនអ៊ីចឹងទៅ» ។
បើតាមលោក រីដា ប្រតិបត្តិការចុះបង្ក្រាបនេះធ្វើឡើង ដើម្បីឱ្យកូនត្រីដែលធ្លាក់មកពីទន្លេមេគង្គដែលហូរចូលមកទន្លេសាបបានចូលទៅតំបន់ព្រៃលិចទឹកដែលទីនោះសម្បូរចំណីធ្វើឱ្យត្រីឆាប់ធំធាត់។ ហេតុនេះពេលបើករដូវនេសាទគឺ ពលរដ្ឋអាចត្រងយកបានត្រីបានច្រើន ដែលមានទាំងត្រីរៀល និងត្រីប្រភេទផ្សេងទៀត។
លោកថ្លែងថា៖ «ផែនការខ្ញុំខ្ញុំវាយបញ្ចប់ក្នុងអាទិត្យហ្នឹង [ចាប់ពីថ្ងៃទី ២៣ ខែសីហា] ហើយយើងនៅតែធ្វើបន្តបន្ទាប់ទៀតឱ្យដូចភ្លៀងរលឹម។ បើយើងអត់ធ្វើបន្តបន្ទាប់ទៀតទេ ពួកគាត់មកដាក់ដដែលៗហ្នឹង ព្រោះពួកគាត់ធ្វើលឿនណាស់ យើងបង្ក្រាបបានតែ ១ អាទិត្យអីហ្នឹងគាត់ដាក់ថែមបានអស់ទៀតបាត់»។
លោក សំ ចាន់គា អ្នកសម្របសម្រួលសមាគមអាដហុកប្រចាំខេត្តពោធិ៍សាត់ ថ្លែងនៅថ្ងៃទី ២៤ ខែមេសាថា អាជ្ញាធរគួរតែស្រាវជ្រាវដើម្បីដាក់ទណ្ឌកម្មដល់អ្នកដែលបានប្រព្រឹត្តបទល្មើសនេសាទ ព្រោះកន្លងមកបានធ្វើការអប់រំណែនាំច្រើនដង ដូច្នេះសមត្ថកិច្ចគួរតែពិនិត្យរកមើលអ្នកនៅពីក្រោយខ្នង ដែលគាំទ្រឱ្យពលរដ្ឋប្រព្រឹត្តល្មើស នៅក្នុងរដូវបិទនេសាទ។
លោកថា៖ «យើងក៏បានទទួលព័ត៌មានខ្លះដែរថា មានអ្នកផ្តល់មធ្យោបាយដល់ប្រជានេសាទហ្នឹងដើម្បីឱ្យប្រព្រឹត្តបទល្មើសហើយខ្លួនចាំទិញផលនេសាទ។ យើងគួរតែហៅអ្នកហ្នឹងទៅធ្វើការណែនាំ ឬមានវិធានណាមួយផង ព្រោះនៅតែបណ្តោយទៀតធនធានមច្ឆជាតិនឹងបាត់បង់អស់»៕