.jpg)
មន្ត្រីមន្ទីរសង្គមកិច្ច ប្រគល់បណ្ណសមធម៌ដល់ពលរដ្ឋក្រីក្រសម្រាប់បើកប្រាក់ឧបត្ថម្ភ។ រូបថត ក្រសួងសង្គមកិច្ច
ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រកាសបន្តបើកសាច់ប្រាក់ឧបត្ថម្ភជាង ៣០ លានដុល្លារសហរដ្ឋអាមេរិក ដល់គ្រួសារក្រីក្រ និងងាយរងគ្រោះចំនួនជាង ២ លាន ៦ សែននាក់ ក្នុងអំឡុងពេលដែលរាជរដ្ឋាភិបាលកំពុងប្រយុទ្ធប្រឆាំងនឹងការឆ្លងរីករាលដាលជំងឺកូវីដ ១៩ ដែលការបើកសាច់ប្រាក់នេះចាប់ផ្ដើមពីថ្ងៃទី ២៥ ខែសីហា ដោយមានរយៈពេល ៣០ ថ្ងៃ។
យោងតាមសេចក្តីជូនដំណឹងរបស់ក្រសួងសង្គមកិច្ចស្តីពីការបើកសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងកូវីដ ១៩ សម្រាប់ជុំទី៦ លើកទី២ បានឱ្យដឹងថា៖ «កម្មវិធីផ្ដល់សាច់ប្រាក់ជុំនេះនឹងត្រូវអនុវត្តចាប់ពីថ្ងៃទី ២៥ ខែសីហា ដល់ថ្ងៃទី ២៤ ខែ កញ្ញា ឆ្នាំ ២០២១ មានរយៈពេល ៣០ ថ្ងៃ»។
លោក ឈួរ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ចថ្លែងឱ្យដឹង នៅថ្ងៃទី ២៤ ខែសីហានេះថា ការបើកផ្តល់សាច់ប្រាក់ ជុំទី៦ លើកទី២ នឹងគ្របដណ្តប់លើគ្រួសារក្រីក្រ ដែលមកទទួលផលសរុប ៦៧៨ ០១៩ គ្រួសារ ក្នុងនោះមានសមាជិកគ្រួសារចំនួន ២ ៦៦៨ ៩៤៨ នាក់ ដោយត្រូវចំណាយថវិកាសរុបជាង ១២០0 លានរៀល ស្មើនឹង ៣០,២៣ លានដុល្លារ។
លោកបានថ្លែងថា៖ «ការផ្ដល់សាច់ប្រាក់ដល់ប្រជាពលរដ្ឋក្រីក្រនាជុំទី៦ លើកទី១ គឺអនុវត្ដបានល្អប្រសើរជាងមុនដោយសារប្រជាពលរដ្ឋមានការយល់ដឹងច្រើន ហើយមន្ដ្រីអនុវត្ដកម្មវិធីផ្ដល់សាច់ប្រាក់បានយល់ដឹងច្បាស់លាស់លើការងាររបស់ខ្លួនជាងមុន»។
ទោះយ៉ាងណាក៏ដោយ លោក សុបញ្ញា បានអះអាងថា ការបន្តឧបត្ថម្ភជុំទី៦ លើកទី២ នេះ ក្រសួងនៅបន្តព្រួយបារម្ភចំពោះពលរដ្ឋចំណាកស្រុកដែលទើបត្រឡប់មកដល់ស្រុកកំណើតវិញ ដោយសារពួកគាត់មិនទាន់យល់ពីកម្មវិធីផ្ដល់សាច់ប្រាក់ ដែលអាចធ្វើឱ្យពួកគាត់មានការយល់ច្រឡំអំពីកម្មវិធីផ្ដល់សាច់ប្រាក់នេះ តាមការបំផុសបំផុលរបស់ជនអគតិមួយចំនួន។
ក្រសួងសង្គមកិច្ចបានឱ្យដឹងថា ការផ្ដល់សាច់ប្រាក់ជុំនេះនឹងត្រូវអនុវត្តតាមនីតិវិធីមួយចំនួនដូចជា ចំពោះគ្រួសារក្រីក្រ និងងាយរងគ្រោះ ដែលបានផ្ទៀងផ្ទាត់ទាំង ៥ ជុំរួចហើយ ត្រូវទៅបើកប្រាក់ឧបត្ថម្ភនៅតាមបញ្ជរវីងណាមួយដោយមិនតម្រូវឱ្យមកសាលាឃុំសង្កាត់សាជាថ្មីទៀតទេ។
-ចំពោះគ្រួសារក្រីក្រ និងងាយរងគ្រោះដែលមានបណ្ណសមធម៌ជុំទី១១ ទាំងអស់នឹងត្រូវផុតសុពលភាពនៃការប្រើប្រាស់បណ្ណចាស់ហើយដោយជំនួសមកវិញដោយបណ្ណជុំទី១៤ វិញ។
-ចំពោះគ្រួសារក្រីក្រ និងងាយរងគ្រោះដែលមានបណ្ណសមធម៌មានជុំទី១១ ដែលបានជាប់បន្តទៅជុំទី១៤ ត្រូវយកបណ្ណថ្មីដែលផ្តល់ដោយរដ្ឋបាលឃុំ-សង្កាត់ដើម្បីយកទៅបើកសាច់ប្រាក់ឧបត្ថម្ភនៅតាមបញ្ជរវីងដូចធម្មតាដោយមិនតម្រូវឱ្យទៅធ្វើការផ្ទៀងផ្ទាត់ឡើងវិញនៅតាមឃុំ-សង្កាត់នោះទេលើកលែងតែគ្រួសារដែលជាប់ថ្មីនៅជុំទី១៤ ត្រូវទៅផ្ទៀងផ្ទាត់ នៅតាមឃុំ សង្កាត់ជាមុនសិនមុនទៅបើកប្រាក់នៅតាមបញ្ជរវីង។
-ករណីគ្រួសារក្រីក្រ និងងាយរងគ្រោះដែលមានបណ្ណសមធម៌មានជុំទី១១ មិនបានជាប់នៅក្នុងជុំទី ១៤ បន្តទៀតតែបានផ្ទៀងផ្ទាត់រួចហើយនៅតាមឃុំសង្កាត់ និងមានលុយនៅសល់ក្នុងគណនីរបស់ខ្លួននោះអ្នកទទួលផលនៅអាចប្រើប្រាស់បណ្ណជុំទី១១ ដើម្បីដកប្រាក់ដែលនៅសល់នោះនៅគ្រប់បញ្ជរវីងបាន តែអ្នកទទួលផលនោះមិនបានទទួលការឧបត្ថម្ភបន្តទៀតនោះទេ។
-ចំពោះគ្រួសារក្រីក្រ និងងាយរងគ្រោះដែលមានបណ្ណសមធម៌មានសុពលភាព ហើយមិនទាន់បានផ្ទៀងផ្ទាត់ទាំង ៥ ជុំ និងគ្រួសារក្រីក្រដែលទើបទទួលបានបណ្ណសមធម៌ថ្មី ត្រូវទៅផ្ទៀងផ្ទាត់នៅសាលាឃុំ-សង្កាត់ណាមួយ ដើម្បីទទួលបានការឧបត្ថម្ភសាច់ប្រាក់ក្នុងជុំទី៦ លើកទី២ នេះ។
យោងតាមក្រសួងសង្គមកិច្ច អតីតយុទ្ធជន និងយុវនីតិសម្បទា ពេលទៅបើកប្រាក់ឧបត្ថម្ភជុំទី៦ លើកទី២ នៅតាមបញ្ជរវីងតម្រូវឱ្យអ្នកទទួលផលត្រូវភ្ជាប់ទៅជាមួយនូវឯកសារពាក់ព័ន្ធដូចគ្នានឹងការបើកប្រាក់ឧបត្ថម្ភលើកមុនៗផងដែរ ពិសេសបណ្ណសមធម៌ដែលនៅមានសុពលភាព និងត្រូវចងចាំលេខកូដសម្ងាត់។
-ករណីភ្លេចលេខសម្ងាត់ ប្រជាពលរដ្ឋត្រូវទំនាក់ទំនងអ្នកទទួលបន្ទុកកម្មវិធីនៅតាមឃុំសង្កាត់ ឬមន្ទីរសង្គមកិច្ចអតីតយុទ្ធជន និងយុវនីតិសម្បទារាជធានី-ខេត្ត។ ក្នុងករណីប្រជាពលរដ្ឋ ឬសាធារណជនពិនិត្យឃើញភាពមិនប្រក្រតីណាមួយក្នុងការអនុវត្តកម្មវិធី ឬដកសាច់ប្រាក់មិនបាននៅតាមបញ្ជរវីងណាមួយនោះ ក្រសួងឱ្យសាធារណជន និងអ្នកទទួលផលទាំងអស់ធ្វើការទំនាក់ទំនងជាមួយអ្នកកាន់កម្មវិធីនៅតាមឃុំ-សង្កាត់ ឬនៅមន្ទីរសង្គមកិច្ចអតីតយុទ្ធជន និងយុវនីតិសម្បទា ឬមន្ទីរផែនការរាជធានី-ខេត្តនីមួយៗ ឬតាមរយៈប្រព័ន្ធទូរស័ព្ទព័ត៌មានទាន់ហេតុការណ៍របស់នាយកដ្ឋានសុខុមាលភាពសង្គមនៃអគ្គនាយកដ្ឋានបច្ចេកទេសលេខ (០៩២ /០១៥) ២១៩ ៨៨៨។
កាលពីថ្ងៃទី ២៤ ខែ មិថុនា ឆ្នាំ ២០២០ លោកនាយករដ្ឋមន្ត្រី ហ៊ុន សែន បានប្រកាសដាក់ឱ្យអនុវត្តជាផ្លូវការនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ហើយក្រសួងសង្គមកិច្ចក៏បានចាប់ផ្តើមដំណើរការអនុវត្តកម្មវិធីឧបត្ថម្ភសាច់ប្រាក់នេះនៅថ្ងៃទី ២៥ ខែ មិថុនា ឆ្នាំ ២០២០ រហូតមកដល់ពេលបច្ចុប្បន្ន៕
វីដេអូ៖
