ភ្នំពេញៈ មន្ត្រីជំនាញនៃក្រសួងបរិស្ថានកាលពីថ្ងៃទី ២៣ ខែសីហា បានផ្សព្វផ្សាយបទពិសោធនៃផលប៉ះពាល់ពីការប្រែប្រួលអាកាសធាតុតាមប្រព័ន្ធអនឡាញ (Zoom) ទៅដល់មន្ត្រីបរិស្ថាននៅថ្នាក់ក្រោមជាតិរាជធានី-ខេត្ត ទូទាំងប្រទេស ដើម្បីចូលរួមទប់ស្កាត់ការប្រែប្រួលអាកាសធាតុ និងផលប៉ះពាល់ ដែលនឹងអាចកើតមានឡើង។
យោងតាមទំព័រហ្វេសប៊ុករបស់ក្រសួងបរិស្ថានបានឱ្យដឹងថា មន្ត្រីជំនាញបានធ្វើបទបង្ហាញអំពីផលប៉ះពាល់នៃការប្រែប្រួលអាកាសធាតុលើវិស័យធំៗ ដូចជា ផលប៉ះពាល់ទៅលើវិស័យកសិកម្ម ផលប៉ះពាល់ទៅលើវិស័យធនធានទឹក ផលប៉ះពាល់ទៅលើហេដ្ឋារចនាសម្ព័ន្ធ និងផលប៉ះពាល់ចំពោះសុខភាពមនុស្ស។
លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថានបានថ្លែងថា ការដុតសំណល់បានបញ្ចេញឧស្ម័នពុល (CO2) បណ្ដាលឱ្យឧស្ម័នពុលទាំងអស់នឹងហើរទៅក្នុងបរិយាកាស បណ្តាលទៅជាឧស្ម័នផ្ទះកញ្ចក់ ដែលធ្វើឱ្យមានការប្រែប្រួលអាកាសធាតុ។
លោកថ្លែងថា៖ «កាលណាយើងដុតសំណល់ប្លាស្ទិកវាបញ្ចេញឧស្ម័នគីមីពុល CO2 (ឧស្ម័នផ្ទះកញ្ចក់) ដែលធ្វើឱ្យភពផែនដីឡើងកម្ដៅ។ យើងត្រូវចូលរួមទាំងអស់គ្នា មិនឱ្យកម្តៅលើផែនដីបន្តកើនឡើង ដោយកាត់បន្ថយការផលិតឧស្ម័នកាបូនិចឱ្យបានតិចតួចបំផុត ដោយប្រើប្រាស់ថាមពលកកើតឡើងវិញមកប្រើជំនួស»។
លោក ជួប ប៉ារីស៍ បានអះអាងថា គ្រប់គ្នាត្រូវតែចូលរួមយ៉ាងសកម្មក្នុងការដាំដើមឈើឡើងវិញឱ្យបានច្រើន ព្រោះដើមឈើអាចស្រូបយកឧស្ម័នកាបូនិច ហើយដើមឈើក៏ជាអ្នកបង្កើតអុកស៊ីហ្ស៊ែនបន្ថែម ដើម្បីទ្រទ្រង់ជីវិតសត្វនៅលើផែនដីផងដែរ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍នៅថ្ងៃទី ២៤ សីហាថា ការរៀបចំវគ្គបណ្តុះបណ្តាលដល់មន្ត្រីឱ្យមានការយល់ដឹងអំពីការប្រែប្រួលអាកាសធាតុ ព្រោះមន្ត្រីទាំងនោះគឺជាកម្លាំងជួរមុខក្នុងការចុះអប់រំបន្តដល់ប្រជាពលរដ្ឋ និងយុវជនជំនាន់ក្រោយឱ្យមានការចូលរួម និងមានការយល់ដឹងអំពីបញ្ហានៃការប្រែប្រួលអាកាសធាតុ។
អ្នកនាំពាក្យរូបនេះថ្លែងថា៖ «ការប្រែប្រួលអាកាសធាតុ គឺជាបញ្ហាប្រឈមរបស់កម្ពុជា និងពិភពលោក បើទោះជាកម្ពុជាមិនមែនជាប្រទេសដែលបង្កើតឱ្យមានការប្រែប្រួលអាកាសធាតុយ៉ាងណាក្តី ក៏កម្ពុជាបានទទួលរងនូវការប្រែប្រួលអាកាសធាតុនេះ ដូច្នេះកម្ពុជាត្រូវតែស្វែងរកវិធានការនានា ដើម្បីរួមគ្នាទប់ស្កាត់ការប្រែប្រួលអាកាសធាតុ និងផលប៉ះពាល់ទាំងនេះ»។
លោកបានឱ្យដឹងទៀតថា៖ «យើងជឿជាក់ថា ចំណេះដឹងដែលមន្ត្រីបរិស្ថានយើងមានហ្នឹង នឹងធ្វើការចែករំលែកបន្តអំពីការយល់ដឹង និងការប្រែប្រួលអាកាសធាតុ និងបញ្ហាប្រឈមចំពោះមុខរបស់កម្ពុជា និងពិភពលោកទៅកាន់ប្រជាពលរដ្ឋ និងមន្ត្រីរាជការផ្សេងទៀតនៅថ្នាក់ខេត្ត»។
លោក ហែម ឧត្តម អ្នកជំនាញផ្នែកបរិស្ថានបានថ្លែងថា ការកសាងសមត្ថភាពដល់មន្ត្រីថ្នាក់ក្រោមជាតិពាក់ព័ន្ធនឹងការប្រែប្រួលអាកាសធាតុ គឺជារឿងចាំបាច់ ហើយរយៈពេលកន្លងមក ក្រសួង និងដៃគូអភិវឌ្ឍន៍បានបង្កើតវគ្គបណ្តុះបណ្តាលដល់មន្ត្រីជាច្រើនជុំវិញបញ្ហានេះ។ ប៉ុន្តែជាក់ស្តែង មន្ត្រីទាំងអស់ដែលមានសមត្ថកិច្ច មិនទាន់មានឆន្ទៈចូលរួមដោះស្រាយបញ្ហាប្រឈមពាក់ព័ន្ធនឹងការប្រែប្រួលអាកាសធាតុនេះបានពេញលេញនៅឡើយទេ។
លោកបានថ្លែងថា៖ «ការផ្តល់សិទ្ធិ និងអំណាចដល់មន្ត្រីថ្នាក់ក្រោមជាតិ ដែលជាមន្ត្រីរស់នៅស្និទ្ធនឹងមូលដ្ឋាន និងបញ្ហាប្រឈមដែលបណ្តាលឱ្យមានការប្រែប្រួលអាកាសធាតុ ក៏មិនទាន់បានទូលំទូលាយនៅឡើយដែរ ហើយចំណុចមួយដែលពាក់ព័ន្ធជិតស្និទ្ធនឹងការប្រែប្រួលអាកាសធាតុនេះ គឺការផ្តល់នូវអំណាច និងសិទ្ធិដល់មន្ត្រីថ្នាក់ក្រោមជាតិទាំងអស់នៅតាមខេត្តនីមួយៗ ព្រោះពួកគាត់ហ្នឹងហើយ ដែលរស់នៅក្បែរនឹងបញ្ហាទាំងនោះ ហើយនៅពេលមានបញ្ហាអ្វីកើតឡើង គឺពួកគាត់អាចចាត់វិធានការបានលឿន»។
ទោះយ៉ាងណាក៏ដោយលោក ហែម ឧត្តម បានអះអាងថា ការផ្ទេរអំណាចវិនិច្ឆ័យជាក់លាក់ពីថ្នាក់ជាតិទៅថ្នាក់ក្រោមជាតិនៅមិនទាន់សង្កេតឃើញមានទូលំទូលាយនៅឡើយទេ ដោយការបង្គាប់បញ្ជាអ្វីផ្សេងៗ គឺធ្វើឡើងនៅថ្នាក់ជាតិវិញ៕