.jpg)
អាជ្ញាធរខណ្ឌសែនសុខ ចុះណែនាំម្ចាស់អាហារដ្ឋានដែលលក់ល្មើសនឹងបម្រាមទប់ស្កាត់ការឆ្លងរាលដាលជំងឺកូវីដ ១៩។ រូបថត រដ្ឋបាលខណ្ឌសែនសុខ
ភ្នំពេញៈ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក) ប្រកាសនៅព្រឹកថ្ងៃទី ២៦ សីហាថា សមត្ថកិច្ចបានឃាត់មនុស្សធ្វើការអប់រំ និងពិន័យចំនួន ២៩៧ នាក់ និងឃាត់យានយន្ត ៦៨ គ្រឿង ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលកាលពីថ្ងៃទី ២៥ សីហា។
តាមសេចក្តីជូនដំណឹង (គ.អ.ក) នៅព្រឹកថ្ងៃទី ២៦ ខែសីហានេះ បានឲ្យដឹងថា សមត្ថកិច្ចបានឃាត់រថយន្ត ១១ គ្រឿង ម៉ូតូ ៥៧ គ្រឿង និងឃាត់ខ្លួនមនុស្សធ្វើការអប់រំនិងពិន័យចំនួន ២៩៧នាក់ នៅថ្ងៃទី ២៥ ខែសីហា ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលក្នុងការទប់ស្កាត់ការឆ្លងរាលដាលជំងឺកូវីដ ១៩។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចក៏បានអនុវត្តវិធានការច្បាប់ចំនួន ១០២ ករណី និងផ្សព្វផ្សាយច្បាប់ទៅលើទីតាំងសរុបចំនួន ៨២៥ និងពិន័យជាប្រាក់បានចំនួន ១ ៤០០ ០០០ រៀលផងដែរ៕
